ਕਰਜੇ ਤੋਂ ਪ੍ਰੇਸ਼ਾਨ ਕਿਸਾਨ ਨੇ ਜ਼ਹਿਰੀਲੀ ਚੀਜ ਪੀ ਕੀਤੀ ਜੀਵਨ ਲੀਲਾ ਸਮਾਪਤ

ਪੰਜਾਬ ਸਰਕਾਰ ਵੱਲੋਂ ਕਰਜਾ ਮੁਆਫ਼ੀ ਦੇ ਕੀਤੇ ਵਾਅਦੇ ਵਫ਼ਾ ਨਾ ਹੋਣ 'ਤੇ ਪੰਜਾਬ ਵਿਚ ਦਿਨ-ਬ-ਦਿਨ ਖੁਦਕਸ਼ੀਆਂ ਦਾ ਸਿਲਸਿਲਾ ਵੱਧਦਾ ਜਾ ਰਿਹਾ ਹੈ। ਹੁਣ ਸ੍ਰੀ ਮੁਕਤਸਰ ਸਾਹਿਬ ਜ਼ਿਲੇ ਦੇ ਪਿੰਡ ਕੋਟਲੀ ਸੰਘਰ ਦੇ ਨੌਜਵਾਨ ਕਿਸਾਨ ਨੇ ਜਹਿਰੀਲੀ ਦਵਾਈ ਪੀ ਕੇ ਆਪਣੀ ਜੀਵਨ ਲੀਲਾ ਸਮਾਪਤ ਕਰ ਲਈ। ਪਿੰਡ ਦੇ 23 ਸਾਲਾ ਕਿਸਾਨ ਕੁਲਦੀਪ ਸਿੰਘ ਦੇ ਪਿਤਾ ਦੀ ਮੌਤ ਉਦੋ ਹੋ ਗਈ ਸੀ, ਜਦ ਉਹ 5 ਸਾਲ ਦਾ ਹੀ ਸੀ, ਉਸ ਉਪਰੰਤ ਕੁਲਦੀਪ ਸਿੰਘ ਨੇ ਪੜਾਈ ਤੋਂ ਬਾਅਦ ਘਰ ਦੀ ਕਬੀਲਦਾਰੀ ਆਪ ਸੰਭਾਲੀ ਅਤੇ ਆਪਣੀ ਇੱਕ ਭੈਣ ਦਾ ਵਿਆਹ ਕੀਤਾ।

ਭੈਣ ਦੇ ਵਿਆਹ ਲਈ ਉਸਨੇ ਬੈਂਕ ਤੋਂ ਕਰੀਬ 3 ਲੱਖ ਰੁਪਏ ਦਾ ਕਰਜਾ ਲਿਆ ਅਤੇ ਖੇਤੀ ਕਾਰਜਾਂ ਲਈ ਸੁਸਾਇਟੀ ਤੋਂ ਕਰੀਬ 50 ਹਜ਼ਾਰ ਰੁਪਏ ਦਾ ਕਰਜਾ ਲਿਆ। ਪਰ ਮਹਿਜ 3 ਕਿਲੇ ਜਮੀਨ ਦੇ ਮਾਲਕ ਕੁਲਦੀਪ ਵੱਲੋਂ ਦਿਨ ਰਾਤ ਮਿਹਨਤ ਕਰਨ ਦੇ ਬਾਵਜੂਦ ਵੀ ਸਰਕਾਰਾਂ ਦੀਆਂ ਨੀਤੀਆਂ ਦੀ ਬਦੌਲਤ ਇਹ ਕਰਜਾ ਨਾ ਉਤਰਿਆ ਅਤੇ ਕਰਜੇ ਤੋਂ ਪ੍ਰੇਸ਼ਾਨ ਕੁਲਦੀਪ ਸਿੰਘ ਨੇ ਜਹਿਰੀਲੀ ਦਵਾਈ ਪੀ ਕੇ ਜੀਵਨ ਲੀਲਾ ਸਮਾਪਤ ਕਰ ਲਈ। ਹੁਣ ਘਰ ਵਿਚ ਮ੍ਰਿਤਕ ਨੌਜਵਾਨ ਕਿਸਾਨ ਦੀ ਦਾਦੀ ਅਤੇ ਮਾਂ ਹੀ ਰਹਿ ਗਏ ਹਨ।

ਕੁਲਦੀਪ ਸਿੰਘ ਅਜੇ ਆਪ ਕੁਆਰਾ ਸੀ ਅਤੇ ਘਰ ਦਾ ਸਾਰਾ ਕੰਮਕਾਰ ਉਹ ਆਪ ਸੰਭਾਲਦਾ ਸੀ। ਮ੍ਰਿਤਕ ਕੁਲਦੀਪ ਸਿੰਘ ਦੇ ਮਾਤਾ ਨੇ ਦੱਸਿਆ ਕੁਲਦੀਪ 5 ਸਾਲ ਦਾ ਸੀ ਜਦ ਇਸਦੇ ਪਿਤਾ ਜੀ ਦੀ ਮੌਤ ਹੋ ਗਈ ਸੀ। ਇਹ ਕਰਜੇ ਤੋਂ ਪ੍ਰੇਸ਼ਾਨ ਸੀ ਅਤੇ ਜਿਸ ਕਾਰਨ ਇਹ ਕਦਮ ਚੁੱਕ ਲਿਆ। ਪਿੰਡ ਦੇ ਸਰਪੰਚ ਹਰਪਾਲ ਸਿੰਘ ਨੇ ਦੱਸਿਆ ਕਿ ਕੁਲਦੀਪ ਸਿੰਘ ਨੇ ਬਹੁਤ ਮਿਹਨਤ ਕੀਤੀ, ਬਹੁਤ ਸਰੀਫ਼ ਨੌਜਵਾਨ ਸੀ, ਪਰ ਕਰਜੇ ਦੀ ਮਾਰ ਨਾ ਝੱਲ ਸਕਿਆ। ਸਰਕਾਰਾਂ ਨੂੰ  ਚਾਹੀਦਾ ਹੈ ਕਿ ਉਹ ਕਿਸਾਨਾਂ ਦੀ ਪਹਿਲਾ ਮਦਦ ਕਰਨ, ਹੁਣ ਸਾਰੇ ਪਰਿਵਾਰ ਦੀ ਰੋਜੀ ਰੋਟੀ ਕੁਲਦੀਪ ਸਿੰਘ ਚਲਾਉਂਦਾ ਸੀ ਇਸ ਪਰਿਵਾਰ ਨੂੰ ਮੁਆਵਜਾ ਦਿੱਤਾ ਜਾਵੇ।