ਜਲੰਧਰ-ਜੰਮੂ ਕੌਮੀ ਮਾਰਗ ਉਤੇ ਹਾਦਸਾ ਵਾਪਰਨ ਨਾਲ ਇਕ ਦੀ ਮੌਤ

ਜਲੰਧਰ, 22 ਨਵੰਬਰ (ਪਪ): ਜਲੰਧਰ-ਜੰਮੂ ਕੌਮੀ ਸ਼ਾਹ ਮਾਰਗ ਉਤੇ ਕਾਲਾ ਬੱਕਰਾ ਅਤੇ ਬਿਆਸ ਪਿੰਡ ਵਿਚਕਾਰ ਇਕ ਕਾਰ ਅਤੇ ਟਰੈਕਟਰ ਟਰਾਲੀ ਵਿਚਾਲੇ ਭਿਆਨਕ ਟੱਕਰ ਹੋਣ ਕਰ ਕੇ ਹਾਦਸਾ ਵਾਪਰ ਗਿਆ। ਇਸ ਹਾਦਸੇ ਵਿਚ ਇਕ ਵਿਅਕਤੀ ਦੀ ਮੌਤ ਹੋਣ ਦੀ ਖ਼ਬਰ ਮਿਲੀ ਹੈ। ਇਕੱਤਰ ਕੀਤੀ ਜਾਣਕਾਰੀ ਅਨੁਸਾਰ ਬਲਬੀਰ ਸਿੰਘ ਵਾਸੀ ਗੋਪਾਲਪੁਰ ਅਪਣਾ ਟਰੈਕਟਰ ਲੈ ਕੇ ਬਿਆਸ ਪਿੰਡ ਤੋਂ ਕਾਲਾ ਬੱਕਰਾ ਵਲ ਆ ਰਿਹਾ ਸੀ, ਇਸੇ ਦੌਰਾਨ ਭੋਗਣ ਵਾਲੇ ਪਾਸੇ ਤੋਂ ਇਕ ਕਾਰ ਜਲੰਧਰ ਵਲ ਜਾ ਰਹੀ ਸੀ। ਜਦੋਂ ਇਹ ਕਾਰ ਪਿੰਡ ਗੋਪਾਲਪੁਰ ਮੋੜ ਨੇੜੇ ਪੁੱਜੀ ਤਾਂ ਬੇਕਾਬੂ ਹੋ ਕੇ ਡਿਵਾਈਡਰ ਟੱਪ ਕੇ ਦੂਜੇ ਪਾਸੇ ਇਸ ਟਰੈਕਟਰ-ਟਰਾਲੀ ਵਿਚ ਆਣ ਵੱਜੀ ਅਤੇ ਕਾਰ ਦੇ ਪਰਖੱਚੇ ਉੱਡ ਗਏ। ਟਰੈਕਟਰ ਚਾਲਕ ਟੱਕਰ ਕਾਰਨ ਸੜਕ ਤੇ ਡਿੱਗ ਪਿਆ ਅਤੇ ਉਸ ਦੀ ਟਰਾਲੀ ਉਸ ਦੇ ਉੱਪਰੋਂ ਨਿਕਲ ਗਈ ਅਤੇ ਉਹ ਗੰਭੀਰ ਰੂਪ ਵਿਚ ਜ਼ਖ਼ਮੀ ਹੋ ਗਿਆ ਜਿਸ ਨੂੰ ਜਲੰਧਰ ਦੇ ਨਿਜੀ ਹਸਪਤਾਲ ਲਿਜਾਇਆ ਗਿਆ ਅਤੇ ਉਥੇ ਉਸ ਦੀ ਮੌਤ ਹੋ ਗਈ। ਕਾਰ ਵਿਚ ਸਵਾਰ ਚਾਲਕ, ਉਸ ਦੀ ਪਤਨੀ ਅਤੇ ਦੋਹੇਂ ਬੱਚੇ ਗੰਭੀਰ ਰੂਪ ਜ਼ਖ਼ਮੀ ਹਨ, ਜਿਨ੍ਹਾਂ ਦਾ ਇਲਾਜ ਜਲੰਧਰ ਦੇ ਇਕ ਨਿਜੀ ਹਸਪਤਾਲ ਵਿਚ ਚੱਲ ਰਿਹਾ ਹੈ। ਇਸ ਟੱਕਰ ਦੌਰਾਨ ਜਲੰਧਰ ਵਲੋਂ ਇਕ ਹੋਰ ਕਾਰ ਆ ਰਹੀ ਸੀ ਜੋ ਕਿ ਟਰਾਲੀ ਦੇ ਪਿੱਛੋਂ ਆਣ ਟਕਰਾਈ ਉਸ ਕਾਰ ਵਿਚ ਸਵਾਰ ਲੋਕ  ਦੇ ਵੀ ਜ਼ਖ਼ਮੀ ਹੋ ਜਾਣ ਦੀ ਖ਼ਬਰ ਹੈ। ਪੁਲਿਸ ਪੈਟਰੋਲਿੰਗ ਗੱਡੀ ਨੰਬਰ-16 ਦੇ ਮੁਲਾਜ਼ਮਾਂ ਸਤਨਾਮ ਸਿੰਘ ਅਤੇ ਉਨ੍ਹਾਂ ਦੀ ਟੀਮ ਵਲੋਂ ਮੌਕੇ ਉਤੇ ਪਹੁੰਚ ਕੇ ਸੜਕ ਨੂੰ ਚਾਲੂ ਕਰਵਾਇਆ ਗਿਆ।