ਡਾਕਟਰ ਵਲੋਂ ਮ੍ਰਿਤਕ ਐਲਾਨੀ ਔਰਤ ਮੁੜ ਜਿਉਂਦੀ ਹੋਈ

Bibi Hardev Kaur with Sarpanch Balhar Singh

ਡੇਰਾਬੱਸੀ  : ਇਥੇ ਡਾਕਟਰ ਵਲੋਂ ਮ੍ਰਿਤਕ ਐਲਾਨ ਦਿਤੀ ਇਕ ਬਜ਼ੁਰਗ ਔਰਤ ਮੁੜ ਜਿਉਂਦੀ ਹੋ ਗਈ। ਡੇਰਾਬੱਸੀ ਬਲਾਕ ਅਧੀਨ ਪੈਂਦੇ ਪਿੰਡ ਅਮਲਾਲਾ, ਜਿਥੇ ਅੰਬਾਲਾ ਦੇ ਇਕ ਨਿੱਜੀ ਡਾਕਟਰ ਵਲੋਂ ਮ੍ਰਿਤਕ ਐਲਾਨ ਦਿਤੀ ਬਜ਼ੁਰਗ ਔਰਤ ਢਾਈ ਘੰਟੇ ਬਾਅਦ ਮੁੜ ਜਿਉਂਦੀ ਹੋ ਗਈ। ਕੁਦਰਤ ਦੇ ਇਸ ਕਰਿਸ਼ਮੇ ਦੀ ਇਲਾਕੇ ਵਿਚ ਖ਼ੂਬ ਚਰਚਾ ਹੋ ਰਹੀ ਹੈ। ਕੇਸਰ ਸਿੰਘ ਨੇ ਦਸਿਆ ਕਿ ਉਨ੍ਹਾਂ ਦੀ ਤਾਈ ਹਰਦੇਵ ਕੌਰ ਪਤਨੀ ਸੁੱਚਾ ਸਿੰਘ ਦੀ ਕਲ ਅਚਾਨਕ ਤਬੀਅਤ ਖ਼ਰਾਬ ਹੋ ਗਈ, ਜਿਸ 'ਤੇ ਪਿੰਡ ਦੇ ਡਾਕਟਰ ਨੂੰ ਬੁਲਾਇਆ ਗਿਆ। 

ਡਾਕਟਰ ਨੇ ਔਰਤ ਦੀ ਹਾਲਤ ਜ਼ਿਆਦਾ ਖ਼ਰਾਬ ਹੋਣ ਕਾਰਨ ਉਸ ਨੂੰ ਅੰਬਾਲਾ ਭੇਜ ਦਿਤਾ, ਜਿਥੇ ਹਰਦੇਵ ਕੌਰ ਦਾ ਪਹਿਲਾਂ ਤੋਂ ਇਲਾਜ ਚਲ ਰਿਹਾ ਸੀ। ਬੇਸ਼ੁੱਧ ਹਾਲਤ ਵਿਚ ਔਰਤ ਨੂੰ ਅੰਬਾਲਾ ਦੇ ਇਕ ਨਿੱਜੀ ਹਸਪਤਾਲ ਵਿਚ ਲਿਜਾਇਆ ਗਿਆ, ਜਿਥੇ ਡਾਕਟਰ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿਤਾ। ਇਸ ਉਪਰੰਤ ਪਰਵਾਰ ਵਾਲਿਆਂ ਨੇ ਰਿਸ਼ਤੇਦਾਰਾਂ ਨੂੰ ਹਰਦੇਵ ਕੌਰ ਦੇ ਮਰਨ ਦੀ ਸੂਚਨਾ ਦੇ ਦਿਤੀ। ਘਰ ਵਿਚ ਸ਼ੌਕ ਦਾ ਮਾਹੌਲ ਛਾ ਗਿਆ। ਰਿਸ਼ਤੇਦਾਰ ਦੇ ਸਾਕ-ਸਬੰਧੀ ਇਕੱਠੇ ਹੋਣੇ ਸ਼ੁਰੂ ਹੋ ਗਏ।

ਪਰਵਾਰਕ ਮੈਂਬਰ ਔਰਤ ਦੇ ਸਸਕਾਰ ਦੀਆਂ ਤਿਆਰੀਆਂ ਕਰਨ ਲੱਗ ਪਏ। ਹਸਪਤਾਲ ਤੋਂ ਘਰ ਪਹੁੰਚਣ ਦੇ ਡੇਢ ਘੰਟਾ ਬਾਅਦ ਹਰਦੇਵ ਕੌਰ ਦੇ ਇਕ ਦਮ ਤੋਂ ਸਾਹ ਚਲਣ ਲੱਗ ਪਏ। ਜਿਸ ਤੋਂ ਬਾਅਦ ਹਰਦੇਵ ਕੌਰ ਨੂੰ ਮੁੜ ਅੰਬਾਲਾ ਹਸਪਤਾਲ ਵਿਖੇ ਲਿਜਾਂਦਾ ਗਿਆ, ਜਿਥੇ ਮਹਿਲਾ ਦੇ ਸਾਹ ਚਲਦੇ ਦੇਖ ਡਾਕਟਰ ਵੀ ਹੈਰਾਨ ਹੋ ਗਏ। ਪਿੰਡ ਦੇ ਸਰਪੰਚ ਬਲਿਹਾਰ ਸਿੰਘ ਬੱਲੀ ਨੇ ਦਸਿਆ ਕਿ ਕੁਦਰਤ ਦੇ ਇਸ ਕਰਿਸ਼ਮੇ ਦੀ ਪੂਰੇ ਪਿੰਡ ਤੇ ਖੇਤਰ ਵਿਚ ਚਰਚਾ ਹੈ।