ਰੇਲਵੇ ਦਾ ਪੰਜਾਬ ਨੂੰ ਮਹਿੰਗਾ ਦੀਵਾਲੀ ਦਾ ਤੋਹਫਾ, 10 ਰੁਪਏ ਵਾਲੀ ਪਲੇਟਫਾਰਮ ਟਿਕਟ ਹੁਣ ਮਿਲੇਗੀ 30 ਰੁਪਏ ਵਿਚ

Railways' expensive Diwali gift to Punjab

 

ਮੁਹਾਲੀ: ਰੇਲਵੇ ਦੇ ਫ਼ਿਰੋਜ਼ਪੁਰ ਡਿਵੀਜ਼ਨ ਨੇ ਆਪਣਾ ਖ਼ਜ਼ਾਨਾ ਭਰਨ ਲਈ ਬਹੁਤ ਹੀ ਅਜੀਬ ਫ਼ੈਸਲਾ ਲਿਆ ਹੈ। ਜਿੱਥੇ ਸਰਕਾਰਾਂ ਜਾਂ ਵਿਭਾਗ ਤਿਉਹਾਰਾਂ ਦੇ ਮੌਕੇ 'ਤੇ ਰਾਹਤ ਦੇ ਕੇ ਲੋਕਾਂ ਨੂੰ ਤੋਹਫੇ ਦਿੰਦੇ ਹਨ, ਉੱਥੇ ਹੀ ਰੇਲਵੇ ਦੇ ਫਿਰੋਜ਼ਪੁਰ ਡਿਵੀਜ਼ਨ ਨੇ ਆਪਣੇ ਅਧੀਨ ਆਉਂਦੇ ਸਾਰੇ ਸਟੇਸ਼ਨਾਂ 'ਤੇ ਪਲੇਟਫਾਰਮ ਟਿਕਟਾਂ ਦੇ ਰੇਟ ਵਧਾ ਕੇ ਲੋਕਾਂ ਨੂੰ ਭੰਬਲਭੂਸੇ 'ਚ ਪਾ ਦਿੱਤਾ ਹੈ।

ਰੇਲਵੇ ਦੇ ਫਿਰੋਜ਼ਪੁਰ ਡਿਵੀਜ਼ਨ ਦੇ ਵਣਜ ਵਿਭਾਗ ਨੇ ਆਪਣੇ ਅਧੀਨ ਪੈਂਦੇ ਸਾਰੇ ਸਟੇਸ਼ਨਾਂ ਦੇ ਸੁਪਰਡੈਂਟਾਂ ਨੂੰ ਹੁਕਮ ਜਾਰੀ ਕੀਤਾ ਹੈ ਕਿ ਉਹ ਦੀਵਾਲੀ ਤੋਂ ਛਠ ਪੂਜਾ ਤੱਕ ਯਾਤਰੀਆਂ ਨੂੰ ਪਲੇਟਫਾਰਮ 'ਤੇ ਉਤਾਰਨ ਲਈ ਆਉਣ ਵਾਲੇ ਲੋਕਾਂ ਤੋਂ 10 ਰੁਪਏ ਦੀ ਪਲੇਟਫਾਰਮ ਟਿਕਟ ਦੇ 30 ਰੁਪਏ ਵਸੂਲੇ। ਇਹ ਹੁਕਮ ਕੱਲ੍ਹ 23 ਅਕਤੂਬਰ ਤੋਂ ਲਾਗੂ ਹੋ ਗਏ ਹਨ ਅਤੇ 6 ਨਵੰਬਰ ਤੱਕ ਲਾਗੂ ਰਹਿਣਗੇ।

ਰੇਲਵੇ ਦੇ ਵਣਜ ਵਿਭਾਗ ਨੇ ਆਪਣੇ ਪੱਤਰ ਵਿੱਚ ਲਿਖਿਆ ਹੈ ਕਿ ਪਲੇਟਫਾਰਮ ਟਿਕਟਾਂ ਵਿੱਚ ਵਾਧਾ ਅਸਥਾਈ ਹੈ। ਇਹ ਦੀਵਾਲੀ ਤੋਂ ਛਠ ਪੂਜਾ ਤੱਕ ਹੀ ਜਾਰੀ ਰਹੇਗਾ। ਤਿਉਹਾਰਾਂ ਦੌਰਾਨ ਸਟੇਸ਼ਨ 'ਤੇ ਹੋਣ ਵਾਲੀ ਭੀੜ ਨੂੰ ਦੇਖਦੇ ਹੋਏ ਪਲੇਟਫਾਰਮ ਟਿਕਟ 'ਚ ਵਾਧਾ ਕੀਤਾ ਗਿਆ ਹੈ। ਛੱਠ ਪੂਜਾ ਤੋਂ ਬਾਅਦ 7 ਨਵੰਬਰ ਤੋਂ ਪਲੇਟਫਾਰਮ ਟਿਕਟਾਂ ਲਈ 10 ਰੁਪਏ ਦੀ ਪੁਰਾਣੀ ਦਰ ਮੁੜ ਲਾਗੂ ਹੋਵੇਗੀ।

ਰੇਲਵੇ ਦੇ ਪਲੇਟਫਾਰਮ ਟਿਕਟ ਦੀ ਦਰ ਵਿਚ ਤਿੰਨ ਗੁਣਾ ਵਾਧੇ ਦਾ ਫਰਮਾਨ ਜੰਮੂ ਕਸ਼ਮੀਰ ਸਮੇਤ ਪੰਜਾਬ ਦੇ 12 ਰੇਲਵੇ ਸਟੇਸ਼ਨਾ ਲੁਧਿਆਣਾ, ਜਲੰਧਰ, ਜਲੰਧਰ ਕੈਂਟ, ਅੰਮ੍ਰਿਤਸਰ, ਪਠਾਨਕੋਟ, ਪਠਾਨਕੋਟ ਕੈਂਟ, ਬਿਆਸ, ਫਗਵਾੜਾ, ਫਿਰੋਜ਼ਪੁਰ ਕੈਂਟ, ਜੰਮੂ ਤਵੀ, ਸ਼੍ਰੀ ਮਾਤਾ ਵੈਸ਼ਨੋ ਦੇਵੀ ਸਟੇਸ਼ਨ, ਊਧਮਪੁਰ, ਫਿਰੋਜ਼ਪੁਰ ਛਾਉਣੀ ਵਿਚ ਲਾਗੂ ਹੋਵੇਗਾ।