ਮੋਦੀ ਜੀ ਦਾ ਸ਼ਾਸਨ, ਗ਼ਰੀਬਾਂ ਦਾ ਸ਼ੋਸ਼ਣ, ਦੋਸਤਾਂ ਦਾ ਪੋਸ਼ਣ : ਰਾਹੁਲ

ਨਵੀਂ ਦਿੱਲੀ, 24 ਸਤੰਬਰ : ਪਿਛਲੇ ਕੁੱਝ ਦਿਨਾਂ ਤੋਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ  'ਤੇ ਹਮਲਾਵਰ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਰਾਹੁਲ ਗਾਂਧੀ ਨੇ ਇਕ ਵਾਰ ਫਿਰ ਤੋਂ ਅਪਣੀ ਭੜਾਸ ਕੱਢੀ ਹੈ। ਕਿਰਤ ਸੁਧਾਰ ਬਿਲਾਂ ਨੂੰ ਰਾਜ ਸਭਾ 'ਚ ਮਨਜ਼ੂਰੀ ਮਿਲਣ ਤੋਂ ਬਾਅਦ ਉਨ੍ਹਾਂ  ਕੇਂਦਰ ਸਰਕਾਰ 'ਤੇ ਨਿਸ਼ਾਨਾ ਸਾਧਿਆ ਹੈ।
ਰਾਹੁਲ ਗਾਂਧੀ ਨੇ ਦੋਸ਼ ਲਗਾਇਆ ਕਿ ਕਿਸਾਨਾਂ ਤੋਂ ਬਾਅਦ ਮਜ਼ਦੂਰਾਂ 'ਤੇ ਵਾਰ ਕੀਤਾ ਜਾ ਰਿਹਾ ਹੈ। ਰਾਹੁਲ ਗਾਂਧੀ ਨੇ ਅੱਜ ਟਵੀਟ ਕਰਦਿਆਂ ਲਿਖਿਆ ਕਿ ਕਿਸਾਨਾਂ ਤੋਂ ਬਾਅਦ ਮਜ਼ਦੂਰਾਂ 'ਤੇ ਵਾਰ! ਗ਼ਰੀਬਾਂ ਦਾ ਸ਼ੋਸ਼ਣ,  'ਦੋਸਤਾਂ' ਦਾ ਪੋਸ਼ਣ, ਇਹੀ ਹੈ ਸਿਰਫ਼ ਮੋਦੀ ਜੀ ਦਾ ਸ਼ਾਸਨ। ਦਸਣਯੋਗ ਹੈ ਕਿ ਵਿਰੋਧੀ ਧਿਰ ਦੇ ਸੰਸਦ ਮੈਂਬਰਾਂ ਵਲੋਂ ਰਾਜ ਸਭਾ ਦੀ ਕਾਰਵਾਈ ਦਾ ਬਾਈਕਾਟ ਕਰਨ ਦੇ ਬਾਵਜੂਦ ਬੁਧਵਾਰ ਨੂੰ ਕਿਰਤ ਕਾਨੂੰਨਾਂ ਨਾਲ ਜੁੜੇ ਤਿੰਨ ਬਿਲਾਂ (ਰਾਜ ਸਭਾ ਵਪਾਰਕ ਸੁਰੱਖਿਆ, ਸਿਹਤ ਅਤੇ ਕੰਮ ਦੀ ਸਥਿਤੀ ਕੋਡ 2020, ਉਦਯੋਗਿਕ ਸਬੰਧ ਕੋਡ 2020 ਅਤੇ ਸਮਾਜਕ ਸੁਰੱਖਿਆ 'ਤੇ ਕੋਡ, 2020) ਨੂੰ ਪਾਸ ਕਰ ਦਿਤਾ ਗਿਆ ਹੈ।                     (ਏਜੰਸੀ)