ਪੂਰਨ ਸ਼ਰਾਬਬੰਦੀ ਵਾਲੇ ਬਿਹਾਰ 'ਚ ਜ਼ਹਿਰੀਲੀ ਸ਼ਰਾਬ ਪੀਣ ਨਾਲ ਦੋ ਮੌਤਾਂ

ਮੁਜ਼ੱਫਰਪੁਰ, 24 ਸਤੰਬਰ: ਸ਼ਰਾਬ 'ਤੇ ਪੂਰੀ ਤਰ੍ਹਾਂ ਪਾਬੰਦੀ ਲਗਾਉਣ ਵਾਲੇ ਬਿਹਾਰ ਵਿਚ ਜ਼ਹਿਰੀਲੀ ਸ਼ਰਾਬ ਪੀਣ ਨਾਲ ਦੋ ਲੋਕਾਂ ਦੀ ਮੌਤ ਹੋ ਗਈ ਜਦਕਿ ਕਈ ਲੋਕਾਂ ਦੀ ਅੱਖਾਂ ਦੀ ਰੌਸ਼ਨੀ ਚਲੀ ਗਈ | ਇਕ ਪੁਲਿਸ ਅਧਿਕਾਰੀ ਨੇ ਇਹ ਜਾਣਕਾਰੀ ਦਿਤੀ | ਵਧੀਕ ਪੁਲਿਸ ਸੁਪਰਡੈਂਟ (ਏ.ਐਸ.ਪੀ.) ਅਵਧੇਸ਼ ਦੀਕਸ਼ਿਤ ਅਨੁਸਾਰ, ਇਹ ਘਟਨਾ ਕਾਜ਼ੀ ਮੁਹੰਮਦਪੁਰ ਥਾਣਾ ਖੇਤਰ 'ਚ ਵਾਪਰੀ ਅਤੇ ਫ਼ਰਾਰ ਕਥਿਤ ਸਪਲਾਇਰ ਦੀ ਪਤਨੀ ਅਤੇ ਧੀ ਨੂੰ ਹਿਰਾਸਤ 'ਚ ਲੈ ਲਿਆ ਗਿਆ ਹੈ | ਦੀਕਸ਼ਿਤ ਨੇ ਫ਼ੋਨ 'ਤੇ ਦਸਿਆ, ''ਸਾਨੂੰ ਸੂਚਨਾ ਮਿਲੀ ਸੀ ਕਿ ਪੋਖਰੀਆ ਪੀਰ ਇਲਾਕੇ ਵਿਚ ਉਮੇਸ਼ ਸਾਹ (55) ਅਤੇ ਪੱਪੂ ਰਾਮ ਦੀ ਮੌਤ ਹੋ ਗਈ ਹੈ | ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਨੇ ਕਿਹਾ ਕਿ ਉਹ ਤਿੰਨ ਦਿਨ ਪਹਿਲਾਂ ਸ਼ੱਕੀ ਨਕਲੀ ਸ਼ਰਾਬ ਪੀਣ ਤੋਂ ਬਾਅਦ ਘਰ ਪਰਤੇ ਸਨ | ਉਹ ਬੀਮਾਰ ਹੋ ਗਏ ਅਤੇ ਇਲਾਜ ਦੇ ਬਾਵਜੂਦ ਉਨ੍ਹਾਂ ਦੀ ਹਾਲਤ ਵਿਗੜ ਗਈ |'' ਏ.ਐਸ.ਪੀ. ਨੇ ਦਸਿਆ, ''ਦੋ ਹੋਰ, ਧਰਮਿੰਦਰ ਰਾਮ ਅਤੇ ਰਾਜੂ ਰਾਮ, ਦੋਵੇਂ ਇੱਕੋ ਇਲਾਕੇ ਦੇ ਵਸਨੀਕ ਹਨ, ਨੇ ਅਪਣੀਆਂ ਅੱਖਾਂ ਦੀ ਰੌਸ਼ਨੀ ਗੁਆਉਣ ਦੀ ਸੂਚਨਾ ਦਿਤੀ | ਧਰਮਿੰਦਰ ਰਾਮ ਨੇ ਪੁਲਿਸ ਨੂੰ ਦਸਿਆ ਕਿ ਉਸ ਨੇ ਸ਼ਿਵਚੰਦਰ ਪਾਸਵਾਨ ਤੋਂ ਸ਼ਰਾਬ ਖ਼ਰੀਦੀ ਸੀ, ਜਿਸ ਦਾ ਪ੍ਰਵਾਰ ਨਾਜਾਇਜ਼ ਕਾਰੋਬਾਰ ਕਰਦਾ ਸੀ |''          (ਏਜੰਸੀ)