ਪ੍ਰਧਾਨ ਮੰਤਰੀ ਦੇ ਅਸਤੀਫ਼ੇ ਲਈ ਚਲਾਏ ਗਏ ਹੈਸ਼ਟੈਗ ਨੂੰ ਗ਼ਲਤੀ ਨਾਲ ਬਲਾਕ ਕੀਤਾ : ਫ਼ੇਸਬੁੱਕ
ਪ੍ਰਧਾਨ ਮੰਤਰੀ ਦੇ ਅਸਤੀਫ਼ੇ ਲਈ ਚਲਾਏ ਗਏ ਹੈਸ਼ਟੈਗ ਨੂੰ ਗ਼ਲਤੀ ਨਾਲ ਬਲਾਕ ਕੀਤਾ : ਫ਼ੇਸਬੁੱਕ
ਨਵੀਂ ਦਿੱਲੀ, 29 ਅਪ੍ਰੈਲ : ਸੋਸ਼ਲ ਮੀਡੀਆ ਕੰਪਨੀ ਫ਼ੇਸਬੁੱਕ ਨੇ ਵੀਰਵਾਰ ਨੂੰ ਕਿਹਾ ਕਿ ਉਸ ਨੇ ਗ਼ਲਤੀ ਨਾਲ ਹੈਸ਼ਟੈਗ ਨੂੰ ਬਲਾਕ ਕੀਤਾ, ਜਿਸ 'ਚ ਪ੍ਰਧਾਨ ਮੰਤਰੀ ਦੇ ਅਸਤੀਫ਼ੇ ਦੀ ਮੰਗ ਕੀਤੀ ਜਾ ਰਹੀ ਹੈ | ਕੰਪਨੀ ਨੇ ਸਪੱਸ਼ਟ ਕੀਤਾ ਕਿ ਇਹ ਸਰਕਾਰ ਦੇ ਆਦੇਸ਼ 'ਤੇ ਨਹੀਂ ਕੀਤਾ ਗਿਆ | ਕੰਪਨੀ ਦੀ ਇਹ ਸਫ਼ਾਈ ਉਨ੍ਹਾਂ ਖ਼ਬਰਾਂ ਵਿਚਾਲੇ ਆਈ ਹੈ, ਜਿਨ੍ਹਾਂ 'ਚ ਕਿਹਾ ਗਿਆ ਸੀ ਕਿ ਕੋਰੋਨਾ ਲਾਗ ਨਾਲ ਨਜਿੱਠਣ ਨੂੰ ਲੈ ਕੇ ਸਰਕਾਰ ਦੀ ਆਲੋਚਨਾ ਕਰਨ ਵਾਲੇ ਪੋਸਟ ਨੂੰ ਹਟਾਉਣ ਦਾ ਨਿਰਦੇਸ਼ ਦਿਤਾ ਗਿਆ ਹੈ |
ਫ਼ੇਸਬੁੱਕ ਦੇ ਬੁਲਾਰੇ ਨੇ ਇਕ ਬਿਆਨ 'ਚ ਕਿਹਾ,''ਅਸੀਂ ਗ਼ਲਤੀ ਨਾਲ ਇਸ ਹੈਸ਼ਟੈਗ ਨੂੰ ਅਸਥਾਈ ਰੂਪ ਨਾਲ ਬੰਦ ਕੀਤਾ ਸੀ, ਨਾ ਕਿ ਭਾਰਤ ਸਰਕਾਰ ਵਲੋਂ ਸਾਨੂੰ ਅਜਿਹਾ ਕਰਨ ਲਈ ਕਿਹਾ ਗਿਆ ਸੀ | ਅਸੀਂ ਇਸ ਨੂੰ ਬਹਾਲ ਕਰ ਦਿਤਾ ਹੈ |'' ਖ਼ਬਰਾਂ ਅਨੁਸਾਰ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਅਸਤੀਫ਼ੇ ਦੀ ਮੰਗ ਨੂੰ ਲੈ ਕੇ ਚੱਲ ਰਹੇ ਹੈਸ਼ਟੈਗ ਨੂੰ ਬੁਧਵਾਰ ਨੂੰ ਕੁੱਝ ਸਮੇਂ ਲਈ ਬਲਾਕ ਕਰ ਦਿਤਾ ਗਿਆ ਸੀ | ਉਪਯੋਗਕਰਤਾ ਜੇਕਰ ਇਸ ਹੈਸ਼ਟੈਗ ਦੀ ਤਲਾਸ਼ ਕਰਦੇ ਤਾਂ ਸੰਦੇਸ਼ ਆ ਰਿਹਾ ਸੀ ਕਿ ਅਸਥਾਈ ਰੂਪ ਨਾਲ ਇਸ ਤਕ ਪਹੁੰਚ ਰੋਕ ਦਿਤੀ ਗਈ ਹੈ, ਕਿਉਂਕਿ ਪੋਸਟ 'ਚ ਮੌਜੂਦ ਕੁੱਝ ਸਮੱਗਰੀ ਸਾਡੇ ਭਾਈਚਾਰਕ ਮਾਨਕਾਂ ਦੇ ਉਲਟ ਹੈ |'' ਹੈਸ਼ਟੈਗ ਰਿਜ਼ਾਈਨ ਮੋਦੀ ਨੂੰ ਬਲਾਕ ਕਰਨ ਦਾ ਮਾਮਲਾ ਪਛਮੀ ਬੰਗਾਲ ਵਿਧਾਨ ਸਭਾ ਚੋਣਾਂ ਦੇ ਆਖ਼ਰੀ ਚੜਾਅ ਤੋਂ ਪਹਿਲਾਂ ਆਇਆ ਹੈ | (ਏਜੰਸੀ)