ਮੋਹਾਲੀ ਸਮੇਤ 15 ਟੀਅਰ-2 ਸ਼ਹਿਰਾਂ ’ਚ ਮਕਾਨ ਵਿਕਰੀ ਦੀ ਕੀਮਤ ਬੀਤੀ ਤਿਮਾਹੀ ਦੌਰਾਨ 4 ਫ਼ੀ ਸਦੀ ਵਧੀ
ਸਾਲ-ਦਰ-ਸਾਲ ਮਕਾਨਾਂ ਦੀ ਵਿਕਰੀ 4 ਫ਼ੀ ਸਦੀ ਘਟ ਕੇ 39,201 ਇਕਾਈ ਰਹਿ ਗਈ
ਨਵੀਂ ਦਿੱਲੀ : ਪ੍ਰੋਪ ਇਕੁਇਟੀ ਮੁਤਾਬਕ 15 ਪ੍ਰਮੁੱਖ ਟੀਅਰ-2 ਸ਼ਹਿਰਾਂ ’ਚ ਮਕਾਨਾਂ ਦੀ ਵਿਕਰੀ ਜੁਲਾਈ-ਸਤੰਬਰ ਤਿਮਾਹੀ ’ਚ ਸਾਲਾਨਾ ਆਧਾਰ ਉਤੇ 4 ਫੀ ਸਦੀ ਵਧ ਕੇ 37,409 ਕਰੋੜ ਰੁਪਏ ਹੋ ਗਈ ਹੈ। ਰੀਅਲ ਅਸਟੇਟ ਅੰਕੜੇ ਵਿਸ਼ਲੇਸ਼ਕ ਫਰਮ ਪ੍ਰੋਪ ਇਕੁਇਟੀ ਦੇ ਅੰਕੜਿਆਂ ਤੋਂ ਪਤਾ ਲੱਗਾ ਹੈ ਕਿ ਇਸ ਕੈਲੰਡਰ ਸਾਲ ਦੀ ਸਤੰਬਰ ਤਿਮਾਹੀ ਵਿਚ ਭਾਰਤ ਦੇ ਚੋਟੀ ਦੇ 15 ਟੀਅਰ-2 ਸ਼ਹਿਰਾਂ ਵਿਚ ਮਕਾਨਾਂ ਦੀ ਵਿਕਰੀ ਸਾਲ-ਦਰ-ਸਾਲ 4 ਫ਼ੀ ਸਦੀ ਘਟ ਕੇ 39,201 ਇਕਾਈ ਰਹਿ ਗਈ। ਇਹ 15 ਟੀਅਰ 2 ਸ਼ਹਿਰ ਹਨ ਮੋਹਾਲੀ, ਅਹਿਮਦਾਬਾਦ, ਸੂਰਤ, ਗਾਂਧੀ ਨਗਰ, ਵਡੋਦਰਾ, ਜੈਪੁਰ, ਨਾਸਿਕ, ਨਾਗਪੁਰ, ਭੁਵਨੇਸ਼ਵਰ, ਲਖਨਊ, ਭੋਪਾਲ, ਕੋਇੰਬਟੂਰ, ਗੋਆ, ਤਿ੍ਰਵੇਂਦਰਮ ਅਤੇ ਕੋਚੀ। ਸਤੰਬਰ 2025 ਨੂੰ ਖਤਮ ਹੋਈ ਤੀਜੀ ਤਿਮਾਹੀ ਵਿਚ ਨਵੀਂ ਸਪਲਾਈ 10 ਫ਼ੀ ਸਦੀ ਸਾਲ-ਦਰ-ਸਾਲ ਘਟ ਕੇ 28,721 ਯੂਨਿਟ ਰਹਿ ਗਈ।
ਇਨ੍ਹਾਂ 15 ਸ਼ਹਿਰਾਂ ਵਿਚੋਂ ਸੱਭ ਤੋਂ ਵੱਡਾ ਪ੍ਰਾਪਰਟੀ ਬਾਜ਼ਾਰ ਅਹਿਮਦਾਬਾਦ ’ਚ ਜੁਲਾਈ-ਸਤੰਬਰ ਤਿਮਾਹੀ ’ਚ ਮਕਾਨਾਂ ਦੀ ਵਿਕਰੀ 6 ਫੀ ਸਦੀ ਘਟ ਕੇ 13,021 ਇਕਾਈ ਰਹਿ ਗਈ। ਸੂਰਤ ’ਚ ਵਿਕਰੀ 8 ਫੀ ਸਦੀ ਡਿੱਗ ਕੇ 4,936 ਇਕਾਈ ਰਹਿ ਗਈ। ਪ੍ਰੋਪਇਕੁਇਟੀ ਦੇ ਸੰਸਥਾਪਕ ਅਤੇ ਸੀ.ਈ.ਓ. ਸਮੀਰ ਜਸੂਜਾ ਨੇ ਕਿਹਾ, ‘‘ਟੀਅਰ 2 ਸ਼ਹਿਰ ਭਾਰਤ ਦੀ ਵਿਕਾਸ ਕਹਾਣੀ ਦੇ ਮੁੱਖ ਇੰਜਣ ਬਣੇ ਹੋਏ ਹਨ। ਰੁਜ਼ਗਾਰ ਦੇ ਮੌਕਿਆਂ ਦਾ ਵਿਸਥਾਰ, ਬੁਨਿਆਦੀ ਢਾਂਚੇ ਵਿਚ ਸੁਧਾਰ ਅਤੇ ਮਜ਼ਬੂਤ ਸੰਪਰਕ ਰਿਹਾਇਸ਼ੀ, ਵਪਾਰਕ ਅਤੇ ਪ੍ਰਚੂਨ ਰੀਅਲ ਅਸਟੇਟ ਵਿਚ ਨਿਰੰਤਰ ਮੰਗ ਨੂੰ ਵਧਾਉਣਾ ਜਾਰੀ ਰੱਖਦਾ ਹੈ।’’ ਧੋਲੇਰਾ ਸਥਿਤ ਰੀਅਲ ਅਸਟੇਟ ਫਰਮ ਆਈਜੀ ਗਰੁੱਪ ਦੇ ਮੈਨੇਜਿੰਗ ਡਾਇਰੈਕਟਰ ਲਲਿਤ ਪਰਿਹਾਰ ਨੇ ਕਿਹਾ ਕਿ ਗੁਜਰਾਤ ਦੇ ਚਾਰ ਸ਼ਹਿਰ ਅਹਿਮਦਾਬਾਦ, ਸੂਰਤ, ਗਾਂਧੀ ਨਗਰ ਅਤੇ ਵਡੋਦਰਾ ਟੀਅਰ 2 ਸ਼ਹਿਰਾਂ ਵਿਚ ਲਾਂਚ ਅਤੇ ਵਿਕਰੀ ਦੋਹਾਂ ਵਿਚ ਦਬਦਬਾ ਬਣੇ ਹੋਏ ਹਨ।