Khanna police station akali congress fight

ਖੰਨਾ : ਖੰਨਾ ਵਿੱਚ ਸਿਆਸੀ ਆਗੂਆਂ ਦੇ ਝਗੜੇ ਦਾ ਇੱਕ ਮਾਮਲਾ ਸਾਹਮਣੇ ਆਇਆ ਹੈ। ਜਿਸ ਵਿਚ ਜੀਟੀ ਰੋਡ 'ਤੇ ਹੋਏ ਦੋ ਗੁਟਾਂ ਦੇ ਆਪਸੀ ਝਗੜੇ ਨੇ ਪੁਲਿਸ ਪ੍ਰਸ਼ਾਸ਼ਨ ਦੀ ਕਾਰਗੁਜ਼ਾਰੀ 'ਤੇ ਸਵਾਲੀਆ ਨਿਸ਼ਾਨ ਖੜੇ ਕਰ ਦਿੱਤੇ ਹਨ। ਇਹ ਮਾਮਲਾ ਹੈ ਹਨੀ ਰੋਸ਼ਾ ਅਕਾਲੀ ਨੇਤਾ ਅਤੇ ਗੁਰਪ੍ਰੀਤ ਲਾਡੀ ਦੀ ਲੜਾਈ ਦਾ। ਦੱਸ ਦਈਏ ਕਿ ਗੁਰਪ੍ਰੀਤ ਲਾਡੀ ਦੀ ਪਤਨੀ ਨੇ ਹਨੀ ਰੋਸ਼ਾ ਅਤੇ ਉਸ ਦੇ ਸਾਥੀਆਂ 'ਤੇ ਲਾਡੀ ਨੂੰ ਜਾਨੋਂ ਮਾਰਨ ਦੀ ਸ਼ਾਜਿਸ਼ ਰਚਣ ਦੇ ਆਰੋਪ ਲਗਾਉਂਦੇ ਹੋਏ ਪੁਲਿਸ 'ਤੇ ਸਵਾਲੀਆ ਨਿਸ਼ਾਨ ਲਗਾਏ ਹਨ।

ਉਨ੍ਹਾਂ ਦਾ ਕਹਿਣਾ ਹੈ ਕਿ ਹਨੀ ਰੋਸ਼ ਲਾਡੀ ਨੂੰ ਜਾਨੋਂ ਮਾਰਨ ਦੀ ਪਲੈਨਿਗ ਕਰ ਰਿਹਾ ਸੀ। ਉਧਰ ਜਦੋਂ ਇਸ ਸੰਬੰਧ ਵਿੱਚ ਅਕਾਲੀ ਆਗੂ ਹਨੀ ਰੋਸ਼ਾ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਦਾ ਕਹਿਣਾ ਸੀ ਕਿ ਲਾਡੀ ਨੇ ਉਨ੍ਹਾਂ ਦੇ ਭਤੀਜੇ ਨੂੰ ਸਵੇਰੇ ਘੇਰ ਕੇ ਉਸਨੂੰ ਬੁਰੀ ਤਰ੍ਹਾਂ ਕੁੱਟਿਆ ਅਤੇ ਉਸ ਤੇ ਚਾਕੂਆਂ ਨਾਲ ਵੀ ਹਮਲਾ ਕੀਤਾ। ਰੋਸ ਨੇ ਇਸ ਸਭ ਦੇ ਪਿੱਛੇ ਕਾਂਗਰਸੀ ਆਗੂ ਦਾ ਹੱਥ ਦੱਸਿਆ।  

ਇਸ ਮਾਮਲੇ ਬਾਰੇ ਜਦੋਂ ਕਾਂਗਰਸੀ ਆਗੂ ਅਮਿਤ ਤ੍ਰਿਪਾਠੀ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਦਾ ਕਹਿਣਾ ਸੀ ਕਿ ਉਨ੍ਹਾਂ ਦਾ ਕਿਸੇ ਵੀ ਗਰੁੱਪ ਨਾਲ ਕੋਈ ਸੰਬੰਧ ਨਹੀਂ ਹੈ। ਉਨ੍ਹਾਂ ਤੇ ਬਿਲਕੁਲ ਬੇਬੁਨਿਆਦ ਇਲਜ਼ਾਮ ਲਗਾਏ ਜਾ ਰਹੇ ਹਨ। ਇਸ ਸੰਬੰਧ ਵਿੱਚ ਖੰਨੇ ਦੇ ਐਸਪੀ (ਡੀ) ਜਸਬੀਰ ਸਿੰਘ ਨੇ ਕਿਹਾ ਕਿ ਜਖ਼ਮੀਆਂ ਦੇ ਡਾਕਟਰੀ ਮੁਆਇਨੇ ਤੋਂ ਬਾਅਦ ਜੋ ਵੀ ਸਾਹਮਣੇ ਆਵੇਗਾ ਉਸਦੇ ਅਨੁਸਾਰ ਕਾਰਵਾਈ ਕੀਤੀ ਜਾਵੇਗੀ ।