ਚੰਡੀਗੜ੍ਹ, 3 ਫ਼ਰਵਰੀ (ਜੀ.ਸੀ. ਭਾਰਦਵਾਜ): ਮਕਾਨ ਉਸਾਰੀ ਅਤੇ ਸ਼ਹਿਰੀ ਮਾਮਲਿਆਂ ਦੇ ਕੇਂਦਰੀ ਮੰਤਰੀ ਸ. ਹਰਦੀਪ ਸਿੰਘ ਪੁਰੀ ਨੇ ਅੱਜ ਪੰਜਾਬ ਤੇ ਹਰਿਆਣਾ ਦੇ ਮੁੱਖ ਮੰਤਰੀਆਂ ਅਤੇ ਸ਼ਹਿਰੀ ਪ੍ਰਾਜੈਕਟਾਂ ਨਾਲ ਸਬੰਧਤ ਮੰਤਰੀਆਂ, ਮੁੱਖ ਸਕੱਤਰਾਂ ਤੇ ਹੋਰ ਸੀਨੀਅਰ ਅਧਿਕਾਰੀਆਂ ਨਾਲ ਰਿਵਿਊ ਬੈਠਕਾਂ ਕਰ ਕੇ ਵਿਕਾਸ ਸਕੀਮਾਂ ਦਾ ਜਾਇਜ਼ਾ ਲਿਆ। ਹਰ ਤਿਮਾਹੀ ਮਗਰੋਂ ਕੀਤੀ ਜਾ ਰਹੀ ਇਸ ਮੀਟਿੰਗ ਤੋਂ ਪਹਿਲਾਂ ਪੁਰੀ ਆਸਾਮ ਵਿਚ ਗੁਹਾਟੀ ਅਤੇ ਕਰਨਾਟਕਾ ਦੇ ਬੈਂਗਲੁਰੂ ਵਿਚ ਵੀ ਬੈਠਕਾਂ ਕਰ ਆਏ ਹਨ।
ਸ. ਹਰਦੀਪ ਸਿੰਘ ਪੁਰੀ ਨੇ ਮੁੱਖ ਮੰੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨਾਲ ਦੁਪਹਿਰ-ਭੋਜ ਦੌਰਾਨ ਇਕ ਮਹੱਤਵਪੂਰਨ ਮੁਲਾਕਾਤ ਵਿਚ ਸੂਬੇ ਦੇ ਵਿਕਾਸ ਤੇ ਅਧਾਰਤ ਮੁੱਦਿਆਂ ਤੇ ਵਿਚਾਰ ਚਰਚਾ ਕੀਤੀ। ਇਸ ਮੌਕੇ ਕੇਂਦਰੀ ਮੰਤਰੀ ਨੇ ਉਨ੍ਹਾਂ ਵਲੋਂ ਲਿਖੀ ਕਿਤਾਬ 'ਪੈਰੀਲਸ ਇੰਟਰਵੈਂਸ਼ਨਜ਼: ਦ ਸਕਿਉਰਿਟੀ ਕੌਂਸਲ ਐਂਡ ਪੌਲਟਿਕਸ ਆਫ਼ ਚਾਓਜ਼' ਵੀ ਮੁੱਖ ਮੰਤਰੀ ਅਤੇ ਕਈ ਹੋਰ ਸਥਾਨਕ ਸਰਕਾਰਾਂ ਮੰਤਰੀਆਂ ਨੂੰ ਭੇਂਟ ਕੀਤੀ। ਇਸੇ ਮਿਲਣੀ ਦੌਰਾਨ ਮੁੱਖ ਮੰਤਰੀ ਨੇ ਵੀ ਕੇਂਦਰੀ ਮੰਤਰੀ ਨੂੰ ਉਨ੍ਹਾਂ ਦੁਆਰਾ ਲਿਖੀਆਂ 6 ਕਿਤਾਬਾਂ ਦਾ ਇਕ ਸੈੱਟ ਭੇਂਟ ਕੀਤਾ।ਇਸ ਉਪਰੰਤ ਸੈਕਟਰ 6 ਦੇ ਯੂਟੀ ਗੈਸਟ ਹਾਊਸ ਵਿਚ ਸੱਦੀ ਪ੍ਰੈੱਸ ਕਾਨਫ਼ਰੰਸ ਨੂੰ 15 ਮਿੰਟ ਸੰਬੋਧਨ ਕਰਨ ਤੋਂ ਬਾਅਦ ਹਰਦੀਪ ਸਿੰਘ ਚਲਦੇ ਬਣੇ। ਇਕ ਦੋ ਸਵਾਲਾਂ ਦਾ ਕਾਹਲੀ ਵਿਚ ਜਵਾਬ ਦਿੰਦੇ ਹੋਏ ਉਨ੍ਹਾਂ, ਪੰਜਾਬ ਦੇ ਮੁੱਖ ਮੰਤਰੀ ਵਲੋਂ ਲਿਖੀ ਚਿੱਠੀ ਕਿ ਕੇਂਦਰ ਦੀਆਂ ਵਿਕਾਸ ਸਕੀਮਾਂ ਵਿਚ ਹਿੱਸੇਦਾਰੀ ਦੇ ਅਨੁਪਾਤ 60-40 ਨੂੰ ਵਧਾ ਕੇ ਕੇਂਦਰ ਤੇ ਰਾਜਾਂ ਦੇ ਹਿੱਸੇ ਦਾ ਅਨੁਪਾਤ 90-10 ਕਰ ਦਿਤਾ ਜਾਵੇ, ਨੂੰ ਰੱਦ ਕਰ ਦਿਤਾ। ਪੁਰੀ ਨੇ ਕਿਹਾ ਕਿ ਜੇ ਸੂਬਿਆਂ ਵਿਚ ਵਿੱਤੀ ਸੰਕਟ ਹੈ ਤਾਂ ਕੇਂਦਰ ਕੋਲ ਵੀ ਵਾਧੂ ਪੈਸਾ ਨਹੀਂ ਹੈ ਅਤੇ ਕੇਂਦਰ ਸਰਕਾਰ ਦੀ ਵਿੱਤੀ ਹਾਲਤ ਖ਼ਰਾਬ ਹੀ ਹੈ। ਇਹ ਪੁੱਛੇ ਜਾਣ 'ਤੇ ਕਿ ਕੇਂਦਰ ਦੀਆਂ ਜ਼ਿਆਦਾਤਰ ਸਕੀਮਾਂ ਸ਼ਹਿਰਾਂ ਲਈ ਹੀ ਹਨ ਜਿਥੇ 35 ਫ਼ੀ ਸਦੀ ਆਬਾਦੀ ਹੈ, ਪਿੰਡਾਂ ਵਲ ਧਿਆਨ ਘੱਟ ਹੈ, ਦੇ ਜਵਾਬ ਵਿਚ ਪੁਰੀ ਨੇ ਇਹ ਕਹਿ ਕੇ ਟਾਲ ਦਿਤਾ ਕਿ ਉਨ੍ਹਾਂ ਕੋਲ ਤਾਂ ਸ਼ਹਿਰੀ ਵਿਕਾਸ ਸਕੀਮਾਂ ਦਾ ਹੀ ਚਾਰਜ ਹੈ।