ਚੰਡੀਗੜ੍ਹ, 3 ਫ਼ਰਵਰੀ (ਜੀ.ਸੀ. ਭਾਰਦਵਾਜ) : ਪੰਜਾਬ ਦੇ ਸਿਖਿਆ ਮਹਿਕਮੇ ਸੱਭ ਤੋਂ ਵੱਧ ਹਜ਼ਾਰਾਂ ਦੀ ਗਿਣਤੀ 'ਚ ਅਦਾਲਤੀ ਕੇਸ ਚਲਦੇ ਹਨ, ਜਿਨ੍ਹਾਂ 'ਚ ਜ਼ਿਆਦਾਤਰ ਅਧਿਆਪਕਾਂ ਦੀ ਭਰਤੀ ਸਬੰਧੀ ਮਾਮਲੇ ਸ਼ਾਮਲ ਹਨ।
ਅੱਜ ਇਥੇ ਪ੍ਰੈੱਸ ਕਲੱਬ 'ਚ ਮੀਡੀਆ ਕਾਨਫ਼ਰੰਸ ਦੌਰਾਨ ਇਕਵਿਟੀ-ਜਸਟਿਸ ਇੰਟਰਨੈਸ਼ਨਲ ਸੰਸਥਾ ਦੇ ਸਰਪ੍ਰਸਤ ਅਸ਼ੋਕ ਕੁਮਾਰ ਤੇ ਉਸ ਦੇ ਸਾਥੀ ਅਹੁਦੇਦਾਰਾਂ ਨੇ ਦਸਿਆ ਕਿ 12 ਸਾਲ ਪਹਿਲਾਂ ਪੀ.ਟੀ.ਆਈ. ਟੀਚਰਾਂ ਦੀ ਭਰਤੀ ਵਾਸਤੇ ਦਿਤੇ ਇਸ਼ਤਿਹਾਰ ਸਬੰਧੀ 244 ਪੋਸਟਾਂ ਲਈ ਕੀਤੀ ਚੋਣ ਦੇ ਨਿਯੁਕਤੀ ਪੱਤਰ ਅਜੇ ਤਕ ਨਹੀਂ ਦਿਤੇ ਗਏ।ਪੀੜਤ ਅਧਿਆਪਕਾਂ ਦੀ ਦਲੀਲ ਦਿੰਦੇ ਹੋਏ ਸੰਸਥਾ ਦੇ ਪ੍ਰਤੀਨਿਧਾਂ ਨੇ ਕਿਹਾ ਕਿ ਇਸ 'ਚ ਹਾਈ ਕੋਰਟ ਦੇ ਹੁਕਮਾਂ ਦੀ ਉਲੰਘਣਾ ਹੋ ਰਹੀ ਹੈ। ਉਚੇਰੀ ਮੈਰਿਟ ਵਾਲੇ 5 ਸਾਲ ਤੋਂ ਨਿਯੁਕਤੀ ਲਈ ਭਟਕ ਰਹੇ ਹਨ, ਪਰ ਸਕੂਲਾਂ 'ਚ ਖ਼ਾਲੀ ਪੋਸਟਾਂ ਦੇ ਬਾਵਜੂਦ ਸਿਖਿਆ ਮਹਿਕਮਾ, ਇਸ ਦੇ ਚੋਟੀ ਦੇ ਅਧਿਕਾਰੀ, ਸਿਆਸੀ ਨੇਤਾ ਸੱਭ ਟਾਲ-ਮਟੋਲ ਕਰੀ ਜਾ ਰਹੇ ਹਨ।ਇਥੋਂ ਤਕ ਕਿ ਅਸੈਂਬਲੀ ਚੋਣਾਂ ਮੌਕੇ ਕੀਤੇ ਵਾਅਦੇ ਤੋਂ ਵੀ ਕਾਂਗਰਸ ਹੁਣ ਮੁਕਰ ਗਈ ਹੈ ਅਤੇ ਅਦਾਲਤੀ ਫ਼ੈਸਲੇ ਦੀ ਉਲੰਘਣਾ, ਹੁਕਮ ਅਦੂਲੀ ਅਤੇ ਮਾਣਹਾਨੀ ਦੇ ਮਾਮਲੇ ਦੀ ਸੁਣਵਾਈ ਮੌਕੇ ਕਾਂਰਗਸ ਸਰਕਾਰ ਬੇਤੁਕੇ ਜਵਾਬ ਦੇ ਰਹੀ ਹੈ। ਮਾਮਲੇ ਦੀ ਅਗਾਲੀ ਸੁਣਵਾਈ 13 ਮਾਰਚ ਨੂੰ ਹੈ।