TV ਮਕੈਨਿਕ ਦੀ ਧੀ ਨੇ ਪੁੱਟੀ ਵੱਡੀ ਪੁਲਾਂਘ: ਬਣੀ ਦੇਸ਼ ਦੀ ਪਹਿਲੀ ਮੁਸਲਿਮ ਮਹਿਲਾ ਫਾਈਟਰ ਪਾਇਲਟ
ਸਾਨੀਆ ਮਿਰਜ਼ਾ ਨੇ ਕਿਹਾ- ਮੇਰਾ ਬਚਪਨ ਦਾ ਸੁਫ਼ਨਾ ਪੂਰਾ ਹੋ ਗਿਆ
27 ਦਸੰਬਰ ਨੂੰ ਕਰੇਗੀ ਜੁਆਇਨ
ਮਿਰਜ਼ਾਪੁਰ (ਉੱਤਰ ਪ੍ਰਦੇਸ਼) : ਹੌਸਲੇ ਬੁਲੰਦ ਹੋਣ ਤਾਂ ਕੋਈ ਵੀ ਮੰਜ਼ਿਲ ਸਰ ਕਰਨੀ ਮੁਸ਼ਕਿਲ ਨਹੀਂ ਹੁੰਦੀ, ਵਿਅਕਤੀ ਆਪਣੇ ਸੰਘਰਸ਼ ਅਤੇ ਲਗਨ ਨਾਲ ਕੋਈ ਵੀ ਮੰਜ਼ਿਲ ਹਾਸਲ ਕਰ ਸਕਦਾ ਹੈ। ਅਸੀਂ ਗੱਲ ਕਰ ਰਹੇ ਹਾਂ ਮਿਰਜ਼ਾਪੁਰ ਦੇ ਇੱਕ ਟੀਵੀ ਮਕੈਨਿਕ ਦੀ ਬੇਟੀ ਦੀ, ਜੋ ਐਨਡੀਏ ਦੀ ਪ੍ਰੀਖਿਆ ਪਾਸ ਕਰਨ ਤੋਂ ਬਾਅਦ ਭਾਰਤੀ ਹਵਾਈ ਸੈਨਾ ਵਿੱਚ ਦੇਸ਼ ਦੀ ਪਹਿਲੀ ਮੁਸਲਿਮ ਲੜਕੀ ਲੜਾਕੂ ਪਾਇਲਟ ਬਣਨ ਜਾ ਰਹੀ ਹੈ। ਉੱਤਰ ਪ੍ਰਦੇਸ਼ ਦੀ ਸਾਨੀਆ ਮਿਰਜ਼ਾ ਪਹਿਲੀ ਮੁਸਲਿਮ ਲੜਕੀ ਹੈ ਜਿਸ ਨੇ ਫਾਈਟਰ ਪਾਇਲਟ ਵਿੱਚ ਜਗ੍ਹਾ ਬਣਾਈ ਹੈ। ਉਹ 27 ਦਸੰਬਰ ਨੂੰ ਜੁਆਇਨ ਕਰੇਗੀ।
ਦੱਸ ਦੇਈਏ ਕਿ ਹੁਨਰ ਅਤੇ ਕਿਸਮਤ ਕਿਸੇ ਦਾ ਮੁਥਾਜ ਨਹੀਂ ਹੁੰਦੀ, ਕੋਈ ਨਹੀਂ ਜਾਣਦਾ ਕਿ ਕਦੋਂ ਕਿਸੇ ਨੂੰ ਬੁਲੰਦੀਆਂ 'ਤੇ ਲੈ ਜਾਵੇ, ਇਸ ਲਈ ਸਿਰਫ ਜਨੂੰਨ ਦੀ ਲੋੜ ਹੈ। ਇਸੇ ਤਰ੍ਹਾਂ ਦੀ ਇੱਕ ਘਟਨਾ ਵਿੱਚ ਮਿਰਜ਼ਾਪੁਰ ਜ਼ਿਲ੍ਹੇ ਦੇ ਦੇਹਤ ਕੋਤਵਾਲੀ ਥਾਣਾ ਖੇਤਰ ਦੇ ਇੱਕ ਛੋਟੇ ਜਿਹੇ ਪਿੰਡ ਤੋਂ ਸਾਹਮਣੇ ਆਇਆ ਹੈ ਜਿਥੋਂ ਦੀ ਸਾਨੀਆ ਮਿਰਜ਼ਾ ਜੋ ਕਿ ਇੱਕ ਟੀਵੀ ਮਕੈਨਿਕ ਦੀ ਧੀ ਹੈ, ਨੇ ਜ਼ਿਲ੍ਹੇ ਦਾ ਹੀ ਨਹੀਂ ਸਗੋਂ ਦੇਸ਼ ਦਾ ਨਾਂ ਰੌਸ਼ਨ ਕੀਤਾ ਹੈ। ਟੀਵੀ ਮਕੈਨਿਕ ਸ਼ਾਹਿਦ ਅਲੀ ਦੀ ਬੇਟੀ ਸਾਨੀਆ ਮਿਰਜ਼ਾ ਨੇ ਐਨਡੀਏ ਦੀ ਪ੍ਰੀਖਿਆ ਪਾਸ ਕਰ ਕੇ ਇਹ ਮੁਕਾਮ ਹਾਸਲ ਕੀਤਾ ਹੈ। ਸਾਨੀਆ ਮਿਰਜ਼ਾ ਨੂੰ ਭਾਰਤੀ ਹਵਾਈ ਸੈਨਾ ਦੀ ਲੜਾਕੂ ਪਾਇਲਟ ਵਜੋਂ ਚੁਣਿਆ ਗਿਆ ਹੈ। ਸਾਨੀਆ ਮਿਰਜ਼ਾ ਦੇਸ਼ ਦੀ ਪਹਿਲੀ ਮੁਸਲਿਮ ਲੜਾਕੂ ਪਾਇਲਟ ਮਹਿਲਾ ਹੋਵੇਗੀ। ਬੇਟੀ ਦੇ ਇਸ ਮੁਕਾਮ 'ਤੇ ਪਹੁੰਚਣ 'ਤੇ ਮਾਪਿਆਂ ਦੇ ਨਾਲ-ਨਾਲ ਪਿੰਡ ਵਾਸੀ ਵੀ ਮਾਣ ਮਹਿਸੂਸ ਕਰ ਰਹੇ ਹਨ।
ਜਾਣਕਾਰੀ ਮੁਤਾਬਕ ਸਾਨੀਆ ਮਿਰਜ਼ਾ ਨੇ ਦੱਸਿਆ ਕਿ ਲੜਾਕੂ ਪਾਇਲਟਾਂ 'ਚ ਔਰਤਾਂ ਦੀ ਗਿਣਤੀ ਘੱਟ ਹੈ। ਇਸ ਨੂੰ ਦੇਖਦੇ ਹੋਏ ਦੇਸ਼ ਦੀ ਪਹਿਲੀ ਮਹਿਲਾ ਲੜਾਕੂ ਪਾਇਲਟ ਅਵਨੀ ਚਤੁਰਵੇਦੀ ਤੋਂ ਪ੍ਰੇਰਿਤ ਹੋ ਕੇ ਮੈਂ ਹਾਈ ਸਕੂਲ ਦੀ ਪ੍ਰੀਖਿਆ ਪਾਸ ਕਰਨ ਤੋਂ ਬਾਅਦ ਹੀ ਮਨ ਬਣਾ ਲਿਆ ਕਿ ਮੈਂ ਫਾਈਟਰ ਪਾਇਲਟ ਬਣਾਂਗੀ। ਅੱਜ ਮੈਂ ਯੂਪੀ ਬੋਰਡ ਵਿੱਚ ਪੜ੍ਹ ਕੇ ਵੀ ਇਹ ਮੁਕਾਮ ਹਾਸਲ ਕੀਤਾ ਹੈ। ਕਿਹਾ ਜਾਂਦਾ ਹੈ ਕਿ ਸੀਬੀਐਸਈ, ਆਈਐਸਸੀ ਬੋਰਡ ਦੇ ਬੱਚੇ ਹੀ ਐਨਡੀਏ ਵਿੱਚ ਸਫ਼ਲਤਾ ਪ੍ਰਾਪਤ ਕਰਦੇ ਹਨ, ਪਰ ਅਸੀਂ ਇਸ ਨੂੰ ਪ੍ਰਾਪਤ ਕਰ ਕੇ ਦਿਖਾਇਆ ਹੈ ਕਿ ਯੂਪੀ ਬੋਰਡ ਦੇ ਬੱਚੇ ਵੀ ਐਨਡੀਏ ਪਾਸ ਕਰ ਸਕਦੇ ਹਨ। ਉਨ੍ਹਾਂ ਕਿਹਾ ਕਿ ਮੈਂ ਲੜਾਕੂ ਪਾਇਲਟਾਂ ਵਿੱਚ ਜਗ੍ਹਾ ਬਣਾਉਣੀ ਸੀ ਜੋ ਮੈਂ ਅੱਜ ਬਣਾ ਲਈ ਹੈ। ਇਸ ਨਾਲ ਮੇਰੇ ਬਚਪਨ ਦਾ ਸੁਫ਼ਨਾ ਪੂਰਾ ਹੋ ਗਿਆ ਹੈ।
ਸਾਨੀਆ ਮਿਰਜ਼ਾ ਮਿਰਜ਼ਾਪੁਰ ਦੇਹਤ ਕੋਤਵਾਲੀ ਥਾਣਾ ਖੇਤਰ ਦੇ ਛੋਟੇ ਜਿਹੇ ਪਿੰਡ ਜਸੋਵਰ ਦੀ ਰਹਿਣ ਵਾਲੀ ਹੈ। ਸਾਨੀਆ ਦੀ ਪ੍ਰਾਇਮਰੀ ਤੋਂ 10ਵੀਂ ਤੱਕ ਦੀ ਪੜ੍ਹਾਈ ਪਿੰਡ ਦੇ ਪੰਡਿਤ ਚਿੰਤਾਮਣੀ ਦੂਬੇ ਇੰਟਰ ਸਕੂਲ ਵਿੱਚ ਹੋਈ ਹੈ। ਇਸ ਤੋਂ ਬਾਅਦ ਸਾਨੀਆ ਮਿਰਜ਼ਾ ਨੇ ਸ਼ਹਿਰ ਦੇ ਗੁਰੂ ਨਾਨਕ ਗਰਲਜ਼ ਇੰਟਰ ਕਾਲਜ ਵਿੱਚ 12ਵੀਂ ਦੀ ਪ੍ਰੀਖਿਆ ਪਾਸ ਕੀਤੀ ਹੈ। ਸਾਨੀਆ ਮਿਰਜ਼ਾ 12ਵੀਂ ਯੂਪੀ ਬੋਰਡ ਜ਼ਿਲ੍ਹਾ ਟਾਪਰ ਵੀ ਰਹੀ ਹੈ। ਇਸ ਤੋਂ ਬਾਅਦ ਸਾਨੀਆ ਮਿਰਜ਼ਾ ਨੇ ਸੈਂਚੁਰੀਅਨ ਡਿਫੈਂਸ ਅਕੈਡਮੀ ਤੋਂ ਤਿਆਰੀ ਕਰ ਕੇ ਅੱਜ ਸਫਲਤਾ ਹਾਸਲ ਕੀਤੀ ਹੈ। ਸਾਨੀਆ ਮਿਰਜ਼ਾ ਨੇ ਦੱਸਿਆ ਕਿ ਜੁਆਇਨਿੰਗ ਲੈਟਰ ਇੱਕ ਦਿਨ ਪਹਿਲਾਂ ਆਇਆ ਹੈ। 27 ਨੂੰ ਪੁਣੇ ਜਾ ਕੇ ਜੁਆਇਨ ਕਰਨਾ ਹੈ। ਸਾਨੀਆ ਮਿਰਜ਼ਾ ਨੇ ਇਸ ਸਫਲਤਾ ਦਾ ਸਿਹਰਾ ਆਪਣੇ ਮਾਤਾ-ਪਿਤਾ ਦੇ ਨਾਲ-ਨਾਲ ਸੈਂਚੁਰੀਅਨ ਡਿਫੈਂਸ ਅਕੈਡਮੀ ਨੂੰ ਦਿੱਤਾ ਹੈ।
ਨੈਸ਼ਨਲ ਡਿਫੈਂਸ ਅਕੈਡਮੀ 2022 ਦੀ ਪ੍ਰੀਖਿਆ ਵਿੱਚ ਪੁਰਸ਼ ਅਤੇ ਔਰਤਾਂ ਸਮੇਤ ਕੁੱਲ 400 ਸੀਟਾਂ ਸਨ। ਜਿਸ ਵਿੱਚ ਔਰਤਾਂ ਲਈ 19 ਸੀਟਾਂ ਸਨ, ਦੋ ਸੀਟਾਂ ਲੜਾਕੂ ਪਾਇਲਟਾਂ ਲਈ ਰਾਖਵੀਆਂ ਸਨ। ਇਨ੍ਹਾਂ ਦੋ ਸੀਟਾਂ 'ਤੇ ਸਾਨੀਆ ਮਿਰਜ਼ਾ ਨੇ ਆਪਣੇ ਹੁਨਰ ਦੇ ਦਮ 'ਤੇ ਸਫਲਤਾ ਹਾਸਲ ਕੀਤੀ ਹੈ। ਸਾਨੀਆ ਮਿਰਜ਼ਾ ਨੇ ਪਹਿਲੀ ਵਾਰ ਕੁਆਲੀਫਾਈਂਗ ਇਮਤਿਹਾਨ ਦਿੱਤਾ ਸੀ ਪਰ ਉਸ ਸਮੇਂ, ਸਮੇਂ ਦੀ ਕਮੀ ਕਾਰਨ ਉਹ ਕੁਆਲੀਫਾਈ ਨਹੀਂ ਕਰ ਸਕੀ ਸੀ। ਦੂਜੀ ਵਾਰ CPS ਮੈਡੀਕਲ ਫਿਟਨੈਸ ਲਈ ਵਾਪਸੀ ਇੰਟਰਵਿਊ ਲਈ ਯੋਗਤਾ ਪੂਰੀ ਕੀਤੀ। ਦੂਜੀ ਵਾਰ ਫਲਾਇੰਗ 'ਚ ਜਗ੍ਹਾ ਬਣਾਉਣ 'ਚ ਕਾਮਯਾਬ ਰਹੀ।