ਹੁਸ਼ਿਆਰਪੁਰ ਦੇ ਨੌਜਵਾਨ ਨੇ ਵਧਾਇਆ ਪੰਜਾਬ ਦਾ ਮਾਣ, ਕੈਨੇਡੀਅਨ ਆਰਮੀ 'ਚ ਬਣਿਆ ਲੈਫਟੀਨੈਂਟ
ਰੋਹਿਤ ਤਿਵਾੜੀ 6 ਸਾਲ ਪਹਿਲਾਂ ਉਚੇਰੀ ਪੜ੍ਹਾਈ ਲਈ ਗਿਆ ਸੀ ਵਿਦੇਸ਼
ਹੁਸ਼ਿਆਰਪੁਰ : ''ਮਿਹਨਤ ਅੱਗੇ ਲਛਮੀ, ਪੱਖੇ ਅੱਗੇ ਪੌਣ'' ਦੀ ਕਹਾਵਤ ਪੰਜਾਬੀ ਨੌਜਵਾਨਾਂ 'ਤੇ ਉਸ ਵੇਲੇ ਬਿਲਕੁਲ ਸਹੀ ਢੁਕਦੀ ਹੈ ਜਦੋਂ ਉਹ ਵਿਦੇਸ਼ਾਂ ਵਿਚ ਵੱਡੀਆਂ ਮੱਲਾਂ ਮਾਰਦੇ ਹਨ ਤੇ ਆਪਣੀ ਮਿਹਨਤ ਸਦਕਾ ਨਾ ਸਿਰਫ਼ ਪੈਸੇ ਕਮਾਉਂਦੇ ਹਨ ਬਲਕਿ ਉਥੋਂ ਦੇ ਕਈ ਉੱਚ ਅਹੁਦਿਆਂ 'ਤੇ ਕਾਬਜ਼ ਹੋ ਜਾਂਦੇ ਹਨ।
ਅਜਿਹੇ ਨੌਜਵਾਨ ਕੇਵਲ ਆਪਣੀ ਪੜ੍ਹਾਈ ਜਾਂ ਹੁਨਰ ਨੂੰ ਨਿਖਾਰਨ ਲਈ ਮਿਹਨਤ ਦਾ ਪੱਲਾ ਫੜ੍ਹੀ ਰੱਖਦੇ ਹਨ ਅਤੇ ਐਸ਼ਪ੍ਰਸਤੀ ਤੋਂ ਕੋਹਾਂ ਦੂਰ ਰਹਿੰਦੇ ਹਨ। ਅਜਿਹੀ ਦੀ ਉਦਾਹਰਨ ਹੁਸ਼ਿਆਰਪੁਰ ਦੇ ਨੌਜਵਾਨ 'ਤੇ ਪੂਰੀ ਤਰ੍ਹਾਂ ਢੁਕਦੀ ਹੈ। ਹੁਸ਼ਿਆਰਪੁਰ ਦੇ 32 ਸਾਲਾ ਨੌਜਵਾਨ ਨੇ ਵਿਦੇਸ਼ ਵਿਚ ਪੰਜਾਬ ਦਾ ਮਾਣ ਵਧਾਇਆ ਹੈ। 32 ਸਾਲਾ ਰੋਹਿਤ ਤਿਵਾੜੀ ਕੈਨੇਡੀਅਨ ਆਰਮੀ 'ਚ ਲੈਫ਼ਟੀਨੈਂਟ ਬਣਿਆ ਹੈ।
ਜਾਣਕਾਰੀ ਅਨੁਸਾਰ ਨੌਜਵਾਨ 6 ਸਾਲ ਪਹਿਲਾਂ ਉਚੇਰੀ ਪੜ੍ਹਾਈ ਲਈ ਵਿਦੇਸ਼ ਗਿਆ ਸੀ ਭਾਵੇਂ ਉਸ ਨੇ ਆਪਣੀ ਪੜ੍ਹਾਈ ਦਾ ਪੱਲਾ ਤਾਂ ਨਹੀਂ ਛੱਡਿਆ ਪਰ ਉਸ ਦਾ ਹੌਲੀ- ਹੌਲੀ ਰੁਝਾਨ ਫ਼ੌਜ ਵੱਲ ਹੋ ਗਿਆ। ਜੰਗਜੂ ਬਿਰਤੀ ਵਾਲੇ ਇਸ ਨੌਜਵਾਨ ਨੇ ਆਖ਼ਰ ਕੈਨੇਡਾ ਦੀ ਫ਼ੌਜ ਵਿਚ ਭਰਤੀ ਹੋਣ ਦਾ ਫ਼ੈਸਲਾ ਕੀਤਾ। ਮਾਪਿਆਂ ਨੂੰ ਆਪਣੇ ਪੁੱਤ ਦੀ ਇਸ ਪ੍ਰਾਪਤੀ 'ਤੇ ਮਾਣ ਹੈ।