ਨੀਰਜ ਨੇ ਅਪਣਾ ਰਾਸ਼ਟਰੀ ਰਿਕਾਰਡ ਤੋੜਿਆ, ਦੋਹਾ ਡਾਇਮੰਡ ਲੀਗ 'ਚ ਚੌਥੇ ਸਥਾਨ 'ਤੇ ਰਹੇ

Neeraj Chopra

ਦੋਹਾ, 5 ਮਈ : ਭਾਰਤ ਦੇ ਸਟਾਰ ਐਥਲੀਟ ਨੀਰਜ ਚੋਪੜਾ ਨੇ ਪਹਿਲੀ ਡਾਇਮੰਡ ਲੀਗ ਸੀਰੀਜ਼ ਮੁਕਾਬਲੇ 'ਚ 87.43 ਮੀਟਰ ਦੂਰ ਤਕ ਭਾਲਾ ਸੁੱਟ ਕੇ ਅਪਣਾ ਰਾਸ਼ਟਰੀ ਰਿਕਾਰਡ ਤੋੜਿਆ, ਹਾਲਾਂਕਿ ਉਹ ਇਸ 'ਚ ਚੌਥੇ ਸਥਾਨ 'ਤੇ ਰਹੇ।

ਹਾਲ 'ਚ ਰਾਸ਼ਟਰਮੰਡਲ ਖੇਡਾਂ 'ਚ ਸੋਨੇ ਤਮਗਾ ਜਿੱਤਣ ਵਾਲੇ ਨੀਰਜ ਦੇ ਸਾਹਮਣੇ ਓਲੰਪਿਕ ਚੈਂਪਿਅਨ ਥਾਮਸ ਰੋਹਲਰ, ਵਿਸ਼ਵ ਚੈਂਪਿਅਨ ਜੋਹਾਨੇਸ ਵੇਟਰ ਅਤੇ ਆਂਡਰਿਆਸ ਹਾਫ਼ਮੈਨ ਵਰਗੇ ਧੁਰੰਧਰ ਸਨ, ਜੋ 90 ਮੀਟਰ ਦੇ ਕਲੱਬ 'ਚ ਸ਼ਾਮਲ ਹਨ ਪਰ ਇਸ 22 ਸਾਲ ਦੇ ਭਾਰਤੀ ਨੇ ਦੂਜੀ ਕੋਸ਼ਿਸ਼ 'ਚ 87.43 ਮੀਟਰ ਦੂਰ ਤਕ ਭਾਲਾ ਸੁਟਿਆ ਅਤੇ 86.48 ਮੀਟਰ ਦਾ ਰਾਸ਼ਟਰੀ ਰਿਕਾਰਡ ਤੋਡ਼ ਦਿਤਾ।

ਨੀਰਜ ਨੇ ਪੋਲੈਂਡ 'ਚ 2016 ਵਿਸ਼ਵ ਜੂਨੀਅਰ ਚੈਂਪਿਅਨਸ਼ਿਪ 'ਚ ਸੋਨੇ ਦਾ ਤਮਗਾ ਜਿੱਤਣ ਦੌਰਾਨ 86.48 ਮੀਟਰ ਨਾਲ ਰਾਸ਼ਟਰੀ ਰਿਕਾਰਡ ਬਣਾਇਆ ਸੀ ਜੋ ਹੁਣ ਵੀ ਵਿਸ਼ਵ ਜੂਨੀਅਰ ਰਿਕਾਰਡ ਹੈ। ਉਨ੍ਹਾਂ ਨੇ 81.17 ਮੀਟਰ ਤੋਂ ਸ਼ੁਰੂਆਤ ਕੀਤੀ ਜਿਸ ਤੋਂ ਬਾਅਦ ਉਨ੍ਹਾਂ ਨੇ 87.78 ਮੀਟਰ ਭਾਲਾ ਸੁਟਿਆ। ਛੇਵੇਂ ਅਤੇ ਅੰਤਮ ਕੋਸ਼ਿਸ਼ 'ਚ ਉਨ੍ਹਾਂ ਨੇ 81.06 ਮੀਟਰ ਦਾ ਭਾਲਾ ਸੁੱਟਿਆ।

ਰੋਹਲਰ ਨੇ 91.78 ਮੀਟਰ ਨਾਲ ਸੋਨਾ, ਵੇਟਰ ਨੇ 91.56 ਮੀਟਰ ਨਾਲ ਸਿਲਵਰ ਅਤੇ ਹਾਫਮੈਨ ਨੇ 90.08 ਮੀਟਰ ਨਾਲ ਕਾਂਸੀ ਤਮਗਾ ਹਾਸਲ ਕੀਤਾ। ਨੀਰਜ ਹੁਣ 26 ਮਈ ਨੂੰ ਡਾਇਮੰਡ ਲੀਗ ਸੀਰੀਜ਼ ਦੇ ਦੂਜੇ ਪੜਾਅ 'ਚ ਭਾਗ ਲੈਣਗੇ ਜਿਸ 'ਚ ਫਿਰ ਉਨ੍ਹਾਂ ਦਾ ਸਾਹਮਣਾ ਇਨ੍ਹਾਂ ਧੁਰੰਧਰਾਂ ਨਾਲ ਹੋਵੇਗਾ।