Hardik Pandya ਨਾਲ 4.3 ਕਰੋੜ ਦੀ ਧੋਖਾਧੜੀ ਦੇ ਮਾਮਲੇ 'ਚ ਸੌਤੇਲਾ ਭਰਾ ਵੈਭਵ ਪੰਡਯਾ ਗ੍ਰਿਫਤਾਰ

Vaibhav Pandya-Hardik Pandya News : ਮੁੰਬਈ ਪੁਲਿਸ ਨੇ ਹਾਰਦਿਕ ਪੰਡਯਾ (Hardik pabdya) ਅਤੇ ਕਰੁਣਾਲ ਪੰਡਯਾ (Krunal Pandya) ਦੇ ਸੌਤੇਲੇ ਭਰਾ ਵੈਭਵ ਪੰਡਯਾ ਨੂੰ ਦੋ ਭਾਰਤੀ ਕ੍ਰਿਕਟਰਾਂ ਨਾਲ ਕਰੀਬ 4.3 ਕਰੋੜ ਰੁਪਏ ਦੀ ਕਥਿਤ ਧੋਖਾਧੜੀ ਦੇ ਇੱਕ ਹਾਈ-ਪ੍ਰੋਫਾਈਲ ਮਾਮਲੇ ਵਿੱਚ ਗ੍ਰਿਫਤਾਰ ਕੀਤਾ ਹੈ।

ਟਾਈਮਜ਼ ਆਫ਼ ਇੰਡੀਆ ਦੀ ਇੱਕ ਰਿਪੋਰਟ ਦੇ ਅਨੁਸਾਰ 37 ਸਾਲਾ ਵੈਭਵ 'ਤੇ ਇੱਕ ਸਾਂਝੇਦਾਰੀ ਫਰਮ ਤੋਂ ਲਗਭਗ 4.3 ਕਰੋੜ ਰੁਪਏ ਦੇ ਗਬਨ ਕਰਨ ਦਾ ਦੋਸ਼ ਹੈ, ਜਿਸ ਨਾਲ ਹਾਰਦਿਕ ਅਤੇ ਕਰੁਣਾਲ ਪੰਡਯਾ ਨੂੰ ਭਾਰੀ ਨੁਕਸਾਨ ਹੋਇਆ ਹੈ।

ਰਿਪੋਰਟ ਦੇ ਅਨੁਸਾਰ, ਤਿੰਨਾਂ ਭਰਾਵਾਂ ਨੇ ਸਾਂਝੇ ਤੌਰ 'ਤੇ ਤਿੰਨ ਸਾਲ ਪਹਿਲਾਂ ਖਾਸ ਸ਼ਰਤਾਂ ਨਾਲ ਇੱਕ ਪਾਲੀਮਰ ਕਾਰੋਬਾਰ ਸਥਾਪਤ ਕੀਤਾ ਸੀ, ਜਿਸ ਵਿੱਚ ਕ੍ਰਿਕਟਰ ਭਰਾਵਾਂ ਨੂੰ 40% ਨਿਵੇਸ਼ ਕਰਨਾ ਸੀ ਜਦੋਂ ਕਿ ਵੈਭਵ ਨੂੰ 20% ਯੋਗਦਾਨ ਦੇਣ ਤੋਂ ਇਲਾਵਾ ਰੋਜ਼ਾਨਾ ਕੰਮਕਾਜ ਵੀ ਸੰਭਾਲਣਾ ਸੀ। 

ਕਾਰੋਬਾਰ ਦਾ ਮੁਨਾਫ਼ਾ ਵੀ ਇਨ੍ਹਾਂ ਸ਼ੇਅਰਾਂ ਅਨੁਸਾਰ ਵੰਡਿਆ ਜਾਣਾ ਸੀ। ਹਾਲਾਂਕਿ, ਵੈਭਵ ਨੇ ਕਥਿਤ ਤੌਰ 'ਤੇ ਆਪਣੇ ਸੌਤੇਲੇ ਭਰਾਵਾਂ ਨੂੰ ਦੱਸੇ ਬਿਨਾਂ ਉਸੇ ਕਾਰੋਬਾਰ ਵਿੱਚ ਇੱਕ ਹੋਰ ਫਰਮ ਸਥਾਪਤ ਕੀਤੀ, ਇਸ ਤਰ੍ਹਾਂ ਸਾਂਝੇਦਾਰੀ ਸਮਝੌਤੇ ਦੀ ਉਲੰਘਣਾ ਕੀਤੀ। ਜਿਸ ਦਾ ਨਤੀਜਾ ਇਹ ਰਿਹਾ ਕਿ ਮੂਲ ਭਾਈਵਾਲੀ ਤੋਂ ਮੁਨਾਫੇ ਵਿੱਚ ਗਿਰਾਵਟ ਅਤੇ ਲਗਭਗ ₹3 ਕਰੋੜ ਦਾ ਅਨੁਮਾਨਿਤ ਨੁਕਸਾਨ ਹੋਇਆ ।

ਇਸ ਤੋਂ ਇਲਾਵਾ ਵੈਭਵ 'ਤੇ ਇਹ ਵੀ ਆਰੋਪ ਲਗਾਇਆ ਗਿਆ ਹੈ ਕਿ ਉਨ੍ਹਾਂ ਨੇ ਗੁਪਤ ਤੌਰ 'ਤੇ ਆਪਣੇ ਲਾਭ ਦਾ ਹਿੱਸਾ 20% ਤੋਂ ਵਧਾ ਕੇ 33.3% ਕਰ ਦਿੱਤਾ , ਜਿਸ ਨਾਲ ਹਾਰਦਿਕ ਅਤੇ ਕਰੁਣਾਲ ਪੰਡਯਾ ਦੇ ਵਿੱਤੀ ਹਿੱਤਾਂ 'ਤੇ ਹੋਰ ਵੀ ਅਸਰ ਪਿਆ।

ਮੁੰਬਈ ਪੁਲਸ ਦੀ ਆਰਥਿਕ ਅਪਰਾਧ ਸ਼ਾਖਾ ਨੇ ਵੈਭਵ ਪੰਡਯਾ 'ਤੇ ਇਨ੍ਹਾਂ ਕਾਰਵਾਈਆਂ ਦੇ ਸਬੰਧ 'ਚ ਧੋਖਾਧੜੀ ਅਤੇ ਜਾਅਲਸਾਜ਼ੀ ਦੇ ਦੋਸ਼ ਲਗਾਏ ਹਨ। ਆਪਣੀ ਕ੍ਰਿਕਟ ਪ੍ਰਤਿਭਾ ਲਈ ਜਾਣੇ ਜਾਂਦੇ ਪੰਡਯਾ ਭਰਾਵਾਂ ਨੇ ਇਸ ਮਾਮਲੇ 'ਤੇ ਜਨਤਕ ਤੌਰ 'ਤੇ ਕੋਈ ਟਿੱਪਣੀ ਨਹੀਂ ਕੀਤੀ ਹੈ।

ਹਾਰਦਿਕ ਅਤੇ ਕਰੁਣਾਲ ਇਸ ਸਮੇਂ ਇੰਡੀਅਨ ਪ੍ਰੀਮੀਅਰ ਲੀਗ ਵਿੱਚ ਰੁੱਝੇ ਹੋਏ ਹਨ; ਜਿੱਥੇ ਹਾਰਦਿਕ ਪੰਡਯਾ ਮੁੰਬਈ ਇੰਡੀਅਨਜ਼ ਦੀ ਕਪਤਾਨੀ ਕਰ ਰਹੇ ਹਨ, ਉਥੇ ਹੀ ਕਰੁਣਾਲ ਲਖਨਊ ਸੁਪਰ ਜਾਇੰਟਸ ਲਈ ਖੇਡ ਰਹੇ ਹਨ।