ਇੰਦੌਰ ’ਚ ਆਸਟਰੇਲੀਆਈ ਮਹਿਲਾ ਕ੍ਰਿਕਟਰਾਂ ਨਾਲ ਛੇੜਛਾੜ ਦੀ ਦੇਸ਼ ਭਰ ’ਚ ਭਰਵੀਂ ਨਿੰਦਾ

ਇੰਦੌਰ : ਆਈ.ਸੀ.ਸੀ. ਮਹਿਲਾ ਵਨਡੇ ਵਿਸ਼ਵ ਕੱਪ ਦੌਰਾਨ ਇੰਦੌਰ ਵਿਚ ਦੋ ਆਸਟਰੇਲੀਆਈ ਮਹਿਲਾ ਕ੍ਰਿਕਟਰਾਂ ਨਾਲ ਛੇੜਛਾੜ ਕੀਤੀ ਗਈ, ਜਦੋਂ ਉਹ ਅਪਣੇ  ਟੀਮ ਹੋਟਲ ਦੇ ਨੇੜੇ ਇਕ  ਕੈਫੇ ਵਿਚ ਜਾ ਰਹੀਆਂ ਸਨ। ਇਕ  ਬਾਈਕ ਸਵਾਰ, ਜਿਸ ਦੀ ਪਛਾਣ ਬਾਅਦ ਵਿਚ ਅਕੀਲ ਖਾਨ ਵਜੋਂ ਹੋਈ ਸੀ, ਨੇ ਖਿਡਾਰਨਾਂ ਦਾ ਪਿੱਛਾ ਕੀਤਾ ਅਤੇ ਮੋਟਰਸਾਈਕਲ ਉਤੇ ਬੈਠੇ ਹੀ ਅਣਉਚਿਤ ਤਰੀਕੇ ਨਾਲ ਉਨ੍ਹਾਂ ਨੂੰ ਛੂਹਿਆ ਅਤੇ ਭੱਜ ਗਿਆ। ਇਹ ਘਟਨਾ ਵੀਰਵਾਰ ਸਵੇਰੇ 11 ਵਜੇ ਦੇ ਕਰੀਬ ਖਜਰਾਣਾ ਰੋਡ ਨੇੜੇ ਵਾਪਰੀ ਅਤੇ ਸੀ.ਸੀ.ਟੀ.ਵੀ.  ਫੁਟੇਜ, ਚਸ਼ਮਦੀਦ ਗਵਾਹਾਂ ਅਤੇ ਹੋਟਲ ਦੇ ਰੀਕਾਰਡਾਂ ਦੀ ਵਰਤੋਂ ਕਰ ਕੇ  ਤੇਜ਼ੀ ਨਾਲ ਜਾਂਚ ਕੀਤੀ ਗਈ। ਇਕ  ਰਾਹਗੀਰ ਵਲੋਂ ਮੋਟਰਸਾਈਕਲ ਦੀ ਨੰਬਰ ਪਲੇਟ ਦੀ ਰੀਕਾਰਡਿੰਗ ਸ਼ੱਕੀ ਦੀ ਪਛਾਣ ਕਰਨ ਵਿਚ ਮਹੱਤਵਪੂਰਣ ਸਾਬਤ ਹੋਈ, ਜਿਸ ਨੂੰ 24 ਘੰਟਿਆਂ ਦੇ ਅੰਦਰ ਗ੍ਰਿਫਤਾਰ ਕਰ ਲਿਆ ਗਿਆ ਸੀ। 

ਬੀ.ਸੀ.ਸੀ.ਆਈ. ਦੇ ਉਪ ਪ੍ਰਧਾਨ ਰਾਜੀਵ ਸ਼ੁਕਲਾ ਨੇ ਇਸ ਘਟਨਾ ਦੀ ਨਿੰਦਾ ਕਰਦੇ ਹੋਏ ਇਸ ਨੂੰ ‘ਬਹੁਤ ਅਫਸੋਸਨਾਕ’ ਕਰਾਰ ਦਿਤਾ ਅਤੇ ਜ਼ੋਰ ਦੇ ਕੇ ਕਿਹਾ ਕਿ ਅਜਿਹਾ ਕਦੇ ਵੀ ਕਿਸੇ ਨਾਲ ਨਹੀਂ ਹੋਣਾ ਚਾਹੀਦਾ। ਉਨ੍ਹਾਂ ਭਰੋਸਾ ਦਿਵਾਇਆ ਕਿ ਹਾਲਾਂਕਿ ਸਖ਼ਤ ਸੁਰੱਖਿਆ ਉਪਾਅ ਪਹਿਲਾਂ ਹੀ ਲਾਗੂ ਹਨ, ਪਰ ਇਸ ਨੂੰ ਦੁਬਾਰਾ ਹੋਣ ਤੋਂ ਰੋਕਣ ਲਈ ਉਨ੍ਹਾਂ ਨੂੰ ਹੋਰ ਮਜ਼ਬੂਤ ਕੀਤਾ ਜਾਵੇਗਾ। 

ਮੱਧ ਪ੍ਰਦੇਸ਼ ਕ੍ਰਿਕਟ ਐਸੋਸੀਏਸ਼ਨ (ਐਮ.ਪੀ.ਸੀ.ਏ.) ਦੇ ਪ੍ਰਧਾਨ ਮਹਾਨਾਰੀਅਮਨ ਸਿੰਧੀਆ ਨੇ ਵੀ ਡੂੰਘੇ ਦੁੱਖ ਦਾ ਪ੍ਰਗਟਾਵਾ ਕਰਦਿਆਂ ਕਿਹਾ, ‘‘ਕਿਸੇ ਵੀ ਔਰਤ ਨੂੰ ਇਸ ਤਰ੍ਹਾਂ ਦੇ ਅਣਉਚਿਤ ਵਿਵਹਾਰ ਦਾ ਸਾਹਮਣਾ ਨਹੀਂ ਕਰਨਾ ਚਾਹੀਦਾ। ਇਕ  ਵਿਅਕਤੀ ਦੇ ਅਣਉਚਿਤ ਵਿਵਹਾਰ ਤੋਂ ਅਸੀਂ ਸਾਰੇ ਬਹੁਤ ਦੁਖੀ ਹਾਂ।’’ ਉਨ੍ਹਾਂ ਨੇ ਸਥਾਨਕ ਅਧਿਕਾਰੀਆਂ ਵਲੋਂ ਕੀਤੀ ਗਈ ਤੁਰਤ  ਕਾਰਵਾਈ ਦੀ ਤਾਰੀਫ਼ ਕੀਤੀ ਅਤੇ ਪ੍ਰਭਾਵਤ  ਖਿਡਾਰੀਆਂ ਅਤੇ ਆਸਟਰੇਲੀਆਈ ਟੀਮ ਲਈ ਐਮ.ਪੀ.ਸੀ.ਏ. ਦੇ ਸਮਰਥਨ ਦੀ ਪੁਸ਼ਟੀ ਕੀਤੀ। 

ਇਸ ਘਟਨਾ ਨੇ ਵਿਸ਼ਵਵਿਆਪੀ ਗੁੱਸਾ ਪੈਦਾ ਕਰ ਦਿਤਾ ਹੈ ਅਤੇ ਭਾਰਤ ਵਿਚ ਮਹਿਲਾ ਐਥਲੀਟਾਂ ਦੀ ਸੁਰੱਖਿਆ ਬਾਰੇ ਚਿੰਤਾਵਾਂ ਨੂੰ ਮੁੜ ਸੁਰਜੀਤ ਕੀਤਾ ਹੈ। ਇਸ ਘਟਨਾ ਤੋਂ ਬਾਅਦ ਆਸਟਰੇਲੀਆਈ ਟੀਮ ਨੂੰ ਸੁਰੱਖਿਆ ਪ੍ਰਦਾਨ ਕੀਤੀ ਗਈ ਹੈ। ਪੁਲਿਸ ਨੇ ਭਾਰਤੀ ਨਿਆਯ ਸੰਹਿਤਾ ਦੀ ਧਾਰਾ 74 ਅਤੇ 78 ਤਹਿਤ ਦੋਸ਼ ਦਰਜ ਕੀਤੇ ਹਨ ਅਤੇ ਜਾਂਚ ਜਾਰੀ ਹੈ।

ਸੁਰੱਖਿਆ ਪ੍ਰੋਟੋਕੋਲ ’ਚ ਕਿਸੇ ਕਮੀ ਦੀ ਜਾਂਚ ਕੀਤੀ ਜਾ ਰਹੀ ਹੈ : ਇੰਦੌਰ ਪੁਲਿਸ 

ਇੰਦੌਰ ਪੁਲਿਸ  ਨੇ ਕਿਹਾ ਕਿ ਉਹ ਇਸ ਗੱਲ ਦੀ ਜਾਂਚ ਕਰ ਰਹੇ ਹਨ ਕਿ ਕੀ ਸੁਰੱਖਿਆ ਪ੍ਰੋਟੋਕੋਲ ’ਚ ਕੋਈ ਕਮੀਆਂ ਸਨ ਜਾਂ ਨਹੀਂ। ਕ੍ਰਾਈਮ ਬ੍ਰਾਂਚ ਦੇ ਵਧੀਕ ਡਿਪਟੀ ਕਮਿਸ਼ਨਰ (ਡੀ.ਸੀ.ਪੀ.) ਰਾਜੇਸ਼ ਦੰਡੋਤੀਆ ਨੇ ਦਸਿਆ  ਕਿ ਹੋਟਲ ਦੇ ਅਹਾਤੇ ਅਤੇ ਬਾਹਰ ਮਾਨਕ ਪ੍ਰੋਟੋਕੋਲ ਦੇ ਤਹਿਤ ਪੁਲਿਸ ਸੁਰੱਖਿਆ ਪ੍ਰਦਾਨ ਕੀਤੀ ਗਈ ਸੀ। ਉਨ੍ਹਾਂ ਕਿਹਾ, ‘‘ਫਰੈਂਚਾਇਜ਼ੀ (ਟੀਮਾਂ) ਦਾ ਅਪਣਾ  ਸੁਰੱਖਿਆ ਸਟਾਫ ਵੀ ਹੁੰਦਾ ਹੈ, ਅਤੇ ਸਟੈਂਡਰਡ ਪ੍ਰੋਟੋਕੋਲ ਨੂੰ ਬਣਾਈ ਰੱਖਣ ਬਾਰੇ ਇਕ  ਮੀਟਿੰਗ ਕੀਤੀ ਗਈ ਸੀ। ਇੰਦੌਰ ਪੁਲਿਸ ਸੁਰੱਖਿਆ ਅਤੇ ਟੀਮ ਦੇ ਸੁਰੱਖਿਆ ਕਰਮਚਾਰੀਆਂ ਵਿਚਕਾਰ ਤਾਲਮੇਲ ਦੀ ਘਾਟ ਹੋ ਸਕਦੀ ਹੈ। ਇਸ ਹਿੱਸੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।’’ ਇਹ ਪੁੱਛੇ ਜਾਣ ਉਤੇ  ਕਿ ਕੀ ਮਹਿਲਾ ਖਿਡਾਰੀਆਂ ਨੂੰ ਹੋਟਲ ਤੋਂ ਬਾਹਰ ਹੋਣ ਉਤੇ  ਪੁਲਿਸ ਸੁਰੱਖਿਆ ਪ੍ਰਦਾਨ ਕੀਤੀ ਗਈ ਸੀ, ਤਾਂ ਡੀ.ਸੀ.ਪੀ. ਦੰਡੋਟੀਆ ਨੇ ਦਸਿਆ  ਕਿ ਇੰਦੌਰ ਪੁਲਿਸ ਅਧਿਕਾਰੀਆਂ ਦੀ ਇਕ  ਟੀਮ ਰੈਡੀਸਨ ਬਲੂ ਹੋਟਲ ਵਿਚ ਤਾਇਨਾਤ ਸੀ। ਇੰਦੌਰ ਪੁਲਿਸ ਨੇ ਆਸਟਰੇਲੀਆਈ ਟੀਮ ਦੇ ਸੁਰੱਖਿਆ ਕਰਮਚਾਰੀਆਂ ਨਾਲ ਮੀਟਿੰਗ ਕੀਤੀ ਸੀ ਅਤੇ ਪ੍ਰੋਟੋਕੋਲ ਸਥਾਪਤ ਕੀਤੇ ਗਏ ਸਨ। ਅਸੀਂ ਜਾਂਚ ਕਰ ਰਹੇ ਹਾਂ ਕਿ ਕੀ ਸੁਰੱਖਿਆ ਪ੍ਰੋਟੋਕੋਲ ਵਿਚ ਕੋਈ ਕਮੀ ਸੀ।