ਕੋਲੰਬੋ,
7 ਸਤੰਬਰ : ਵਿਰਾਟ ਕੋਹਲੀ ਨਿਡਰ ਕਪਤਾਨ ਅਤੇ ਖਿਡਾਰੀ ਮੰਨੇ ਜਾਂਦੇ ਹਨ। ਉਹ ਕਿੰਨੇ
ਗੁੱਸੇ ਵਾਲੇ ਹਨ, ਇਹ ਵੀ ਮੈਦਾਨ 'ਤੇ ਦਰਸ਼ਕਾਂ ਨੇ ਕਈ ਵਾਰ ਵੇਖਿਆ ਹੈ। ਗ਼ਲਤ ਆਊਟ ਦਿਤਾ
ਗਿਆ ਹੋਵੇ ਜਾਂ ਕੋਈ ਹੋਰ ਫ਼ੈਸਲਾ, ਕੋਹਲੀ ਬਹੁਤ ਛੇਤੀ ਅਪਣਾ ਆਪਾ ਖੋਹ ਦਿੰਦੇ ਹਨ।
ਬੁੱਧਵਾਰ ਨੂੰ ਸ੍ਰੀਲੰਕਾ ਵਿਰੁਧ ਟੀ-20 ਮੈਚ ਵਿਚ ਵੀ ਵਿਰਾਟ ਇਸ ਅੰਦਾਜ਼ ਵਿਚ ਨਜ਼ਰ ਆਏ।
ਦਰਅਸਲ
ਸ੍ਰੀਲੰਕਾਈ ਪਾਰੀ ਦਾ 15ਵਾਂ ਓਵਰ ਚਲ ਰਿਹਾ ਸੀ ਅਤੇ ਅਕਸ਼ਰ ਪਟੇਲ ਗੇਂਦਬਾਜ਼ੀ ਕਰ ਰਹੇ
ਸਨ। ਬੱਲੇਬਾਜ਼ ਸੇਕੁਗੇ ਪ੍ਰਸੰਨਾ ਦੇ ਬੱਲੇ ਨਾਲ ਲੱਗ ਕੇ ਗੇਂਦ ਮਹਿੰਦਰ ਸਿੰਘ ਧੋਨੀ ਦੇ
ਹੱਥਾਂ ਵਿਚ ਚੱਲੀ ਗਈ। ਭਾਰਤੀ ਟੀਮ ਨੇ ਆਊਟ ਦੀ ਅਪੀਲ ਕੀਤੀ, ਪਰ ਅੰਪਾਇਰ ਨੇ ਕੁੱਝ ਹੀ
ਪਲਾਂ ਵਿਚ ਇਸ ਨੂੰ ਖਾਰਜ ਕਰ ਦਿਤਾ। ਵਿਰਾਟ ਕੋਹਲੀ ਦੀ ਅਗਵਾਈ ਵਿਚ ਕਈ ਭਾਰਤੀ ਖਿਡਾਰੀ
4-5 ਸਕਿੰਟ ਤਕ ਅਪੀਲ ਕਰਦੇ ਰਹੇ। ਵਿਕਟਕੀਪਰ ਮਹਿੰਦਰ ਸਿੰਘ ਧੋਨੀ ਨੇ ਵੀ ਕਿਹਾ ਕਿ
ਉਨ੍ਹਾਂ ਨੂੰ ਆਵਾਜ਼ ਆਈ ਸੀ। ਪਰ ਹਾਲਾਂਕਿ ਟੀ-20 ਕ੍ਰਿਕਟ ਵਿਚ ਡੀ.ਆਰ.ਐਸ. ਲੈਣ ਦਾ ਆਪਸ਼ਨ
ਨਹੀਂ ਹੁੰਦਾ, ਇਸ ਲਈ ਅਪੀਲ ਖਾਰਿਜ ਕਰ ਦਿਤੀ ਗਈ। ਇਹ ਵੇਖ ਕੇ ਵਿਰਾਟ ਕੋਹਲੀ ਅਪਣਾ ਆਪਾ
ਖੋਹ ਬੈਠੇ ਅਤੇ ਉਨ੍ਹਾਂ ਨੇ ਗਾਲ੍ਹ ਦੇ ਕੇ ਅਪਣਾ ਗੁੱਸਾ ਜ਼ਾਹਰ ਕੀਤਾ। ਬਾਅਦ ਵਿਚ ਜਦੋਂ
ਸਨਿਕੋਮੀਟਰ ਉਤੇ ਵੇਖਿਆ ਗਿਆ ਤਾਂ ਗੇਂਦ ਬੱਲੇ ਨਾਲ ਟਕਰਾਈ ਸੀ ਅਤੇ ਭਾਰਤੀ ਟੀਮ ਦੀ ਅਪੀਲ
ਠੀਕ ਸੀ। (ਪੀ.ਟੀ.ਆਈ.)