ਨਵੀਂ ਦਿੱਲੀ: ਭਾਰਤੀ ਕ੍ਰਿਕਟਰ ਨਾਥੂ ਸਿੰਘ ਨੇ ਵੀਰਵਾਰ (8 ਸਤੰਬਰ) ਨੂੰ ਆਪਣਾ 23ਵਾਂ ਬਰਥਡੇ ਸੈਲੀਬ੍ਰੇਟ ਕੀਤਾ। ਨਾਥੂ ਸਿੰਘ ਉਨ੍ਹਾਂ ਕ੍ਰਿਕਟਰਾਂ ਵਿੱਚੋਂ ਇਕ ਹਨ ਜੋ ਬੇਹੱਦ ਗਰੀਬ ਪਰਿਵਾਰ ਤੋਂ ਆਉਂਦੇ ਹਨ ਪਰ ਰਾਤੋਂ-ਰਾਤ ਜਿਨ੍ਹਾਂ ਦੀ ਕਿਸਮਤ ਬਦਲ ਗਈ। ਨਾਥੂ ਸਿੰਘ ਦੇ ਪਿਤਾ ਇੱਕ ਵਾਇਰ ਫੈਕਟਰੀ ਵਿਚ ਮਜ਼ਦੂਰ ਹਨ, ਜਿਨ੍ਹਾਂ ਨੇ ਬੇਹੱਦ ਮੁਸ਼ਕਿਲਾਂ ਨਾਲ ਉਨ੍ਹਾਂ ਨੂੰ ਵੱਡਾ ਕੀਤਾ। ਉਨ੍ਹਾਂ ਨੂੰ ਕ੍ਰਿਕਟਰ ਬਣਾਉਣ ਲਈ ਉਹ ਆਪਣਾ ਘਰ ਤੱਕ ਵੇਚਣ ਨੂੰ ਤਿਆਰ ਹੋ ਗਏ ਸਨ। ਪਰ ਆਈ.ਪੀ.ਐਲ. ਨੇ ਉਨ੍ਹਾਂ ਨੂੰ ਕਰੋੜਪਤੀ ਬਣਾ ਦਿੱਤਾ।
ਇੰਝ ਬਦਲੀ ਕਿਸਮਤ
ਪਿਛਲੇ ਸਾਲ ਆਈ.ਪੀ.ਐਲ. ਨਿਲਾਮੀ ਵਿਚ 10 ਲੱਖ ਦੀ ਬੇਸ ਕੀਮਤ ਵਾਲੇ ਨਾਥੂ ਨੂੰ ਮੁੰਬਈ ਇੰਡੀਅਨਸ ਨੇ 3.2 ਕਰੋੜ ਰੁਪਏ ਦੀ ਹੈਰਾਨ ਕਰਨ ਵਾਲੀ ਕੀਮਤ ਉੱਤੇ ਖਰੀਦਿਆ ਸੀ। ਇਸਦੇ ਬਾਅਦ ਗਰੀਬ ਘਰ ਦਾ ਇਹ ਖਿਡਾਰੀ ਰਾਤੋਂ-ਰਾਤ ਸਟਾਰ ਬਣ ਗਿਆ ਸੀ। ਹਾਲਾਂਕਿ ਪਿਛਲੇ ਸੀਜ਼ਨ ਵਿਚ ਨਾਥੂ ਨੂੰ ਇੱਕ ਵੀ ਮੈਚ ਖੇਡਣ ਨੂੰ ਨਹੀਂ ਮਿਲਿਆ। ਇਸ ਸਾਲ ਗੁਜਰਾਤ ਲਾਇੰਸ ਦੀ ਟੀਮ ਨੇ 10 ਲੱਖ ਰੁਪਏ ਦੀ ਬੇਸ ਕੀਮਤ ਵਾਲੇ ਨਾਥੂ ਨੂੰ 50 ਲੱਖ ਰੁਪਏ ਵਿਚ ਖਰੀਦਿਆ ਸੀ। ਇਸ ਵਾਰ ਉਨ੍ਹਾਂ ਨੂੰ ਦੋ ਮੈਚ ਖੇਡਣ ਦੇ ਮੌਕੇ ਵੀ ਮਿਲੇ, ਜਿਸ ਵਿੱਚ ਉਨ੍ਹਾਂ ਨੇ ਇਕ ਵਿਕਟ ਲਿਆ।
ਪਰਿਵਾਰ ਲਈ ਬਣਵਾ ਰਿਹਾ ਬੰਗਲਾ
ਆਈ.ਪੀ.ਐਲ. 'ਚ ਰਾਤੋਂ-ਰਾਤ ਕਿਸਮਤ ਬਦਲਣ ਦੇ ਬਾਅਦ ਦਿੱਤੇ ਇਕ ਇੰਟਰਵਿਊ ਵਿਚ ਨਾਥੂ ਨੇ ਕਿਹਾ ਸੀ ਕਿ ਉਹ ਇਨ੍ਹਾਂ ਪੈਸਿਆਂ ਨਾਲ ਸਭ ਤੋਂ ਪਹਿਲਾ ਆਪਣੇ ਪਰਿਵਾਰ ਅਤੇ ਛੋਟੇ ਭਰਾ ਲਈ ਇੱਕ ਵੱਡਾ ਜਿਹਾ ਮਕਾਨ ਬਣਾਉਣਾ ਚਾਹੁੰਦਾ ਹੈ। ਉਨ੍ਹਾਂ ਦਾ ਇਹ ਸੁਪਨਾ ਹੁਣ ਪੂਰਾ ਹੋ ਰਿਹਾ ਹੈ, ਉਹ ਜੈਪੁਰ ਵਿਚ ਆਪਣੇ ਮਾਤਾ-ਪਿਤਾ ਲਈ ਕਰੀਬ ਡੇਢ ਕਰੋੜ ਰੁਪਏ ਵਿਚ ਤਿੰਨ ਮੰਜ਼ਿਲਾ ਆਲੀਸ਼ਾਨ ਮਕਾਨ ਤਿਆਰ ਕਰਵਾ ਰਿਹਾ ਹੈ।