ਇੰਦੌਰ, 17 ਨਵੰਬਰ: ਵਿਨੇਸ਼ ਫ਼ੋਗਾਟ ਅਤੇ ਰਿਤੂ ਫ਼ੋਗਾਟ ਨੇ ਕੌਮੀ ਕੁਸ਼ਤੀ ਚੈਂਪੀਅਨਸ਼ਿਪ ਦੇ ਸ਼ੁਰੂਆਤੀ ਦਿਨ ਇੱਥੇ ਮਹਿਲਾਵਾਂ ਵਰਗ 'ਚ ਅਪਣੇ-ਅਪਣੇ ਭਾਰ ਵਰਗਾਂ 'ਚ ਸੋਨ ਤਮਗ਼ੇ ਜਿੱਤੇ। ਮਹਿਲਾ ਕੁਸ਼ਤੀ 'ਚ ਸਿਰਫ਼ ਦੋ ਭਾਰ ਵਰਗਾਂ 'ਚ ਕੁਸ਼ਤੀ ਲੜੀ ਗਈ ਅਤੇ ਦੋਵਾਂ 'ਚ ਫ਼ੋਗਾਟ ਭੈਣਾਂ ਚੈਂਪੀਅਨ ਬਣੀਆਂ।ਰੇਲਵੇ ਵਲੋਂ ਖੇਡ ਰਹੀ ਰਾਸ਼ਟਰਮੰਡਲ ਖੇਡਾਂ ਦੀ ਸੋਨ ਤਮਗ਼ਾ ਜੇਤੂ ਵਿਨੇਸ਼ ਨੇ ਔਰਤਾਂ ਦੇ 55 ਕਿਲੋਗ੍ਰਾਮ ਭਾਰ ਵਰਗ 'ਚ ਹਰਿਆਣਾ ਦੀ ਮਨੀਸ਼ਾ ਨੂੰ ਹਰਾ ਕੇ ਸੋਨੇ ਦਾ ਤਮਗ਼ਾ ਪ੍ਰਾਪਤ ਕੀਤਾ।
ਉਸ ਦੀ ਛੋਟੀ ਭੈਣ ਰਿਤੂ ਨੇ ਔਰਤਾਂ ਦੇ 50 ਕਿਲੋਗ੍ਰਾਮ 'ਚ ਨਿਰਮਲਾ ਨੂੰ ਹਰਾ ਕੇ ਸੋਨ ਤਮਗ਼ਾ ਜਿੱਤਿਆ। ਕੌਮੀ ਮਹਿਲਾ ਟੀਮ ਦੇ ਕੋਚ ਕੁਲਦੀਪ ਮਲਿਕ ਅਨੁਸਾਰ ਦੋਵੇਂ ਫ਼ੋਗਾਟ ਭੈਣਾਂ ਨੇ ਚੰਗਾ ਪ੍ਰਦਰਸ਼ਨ ਕੀਤਾ ਅਤੇ ਅਪਣੀ ਵਿਰੋਧੀਆਂ ਨੂੰ ਆਸਾਨੀ ਨਾਲ ਹਰਾਇਆ। ਗ੍ਰੀਕੋ ਰੋਮਨ 'ਚ ਪੰਜਾਬ ਦੇ ਹਰਪ੍ਰੀਤ ਸਿੰਘ ਨੇ 82 ਕਿਲੋਗ੍ਰਾਮ ਭਾਰ ਵਰਗ 'ਚ ਰੇਲਵੇ ਦੇ ਅਮਰਨਾਥ ਯਾਦਵ ਨੂੰ ਹਰਾ ਕੇ ਸੋਨ ਤਮਗ਼ਾ ਜਿੱਤਿਆ। (ਏਜੰਸੀ)