ਉੱਤਰ ਪ੍ਰਦੇਸ਼ ’ਚ ਸ਼ਰੇਆਮ ਦੋ ਸਿੱਖਾਂ ਨਾਲ ਘੇਰ ਕੇ ਕੁੱਟਮਾਰ

ਏਜੰਸੀ

ਖ਼ਬਰਾਂ, ਉੱਤਰ ਪ੍ਰਦੇਸ਼

ਅਖੰਡ ਪਾਠ ਕਰਵਾ ਕੇ ਪਰਤ ਰਹੇ ਸਨ ਨੌਜੁਆਨ

ਸ਼ਿਕਾਇਤ ਕੀਤੇ ਜਾਣ ਦੇ ਬਾਵਜੂਦ ਕਾਰਵਾਈ ਨਾ ਹੋਣ ਕਾਰਨ ਸਨਿਚਰਵਾਰ ਨੂੰ ਇਲਾਕੇ ਦੇ ਸਿੱਖ ਥਾਣੇ ਦੀ ਘੇਰਾਬੰਦੀ ਕਰਨ ਪਹੁੰਚ ਗਏ

ਲਖੀਮਪੁਰ ਖੀਰੀ: ਲਖੀਮਪੁਰ ਖੀਰੀ ਦੇ ਲੁਧੌਰੀ ਪਿੰਡ ਵਿਚ ਸ਼ਰੇਆਮ ਦੋ ਸਿੱਖਾਂ ਦੀ ਕੁੱਟਮਾਰ ਕੀਤੇ ਜਾਣ ਮਗਰੋਂ ਸਥਾਨਕ ਸਿੱਖਾਂ ਵਿਚ ਰੋਸ ਫੈਲ ਗਿਆ ਹੈ। ਸ਼ੁਕਰਵਾਰ ਨੂੰ ਵਾਪਰੀ ਘਟਨਾ ਉਦੋਂ ਸਾਹਮਣੇ ਆਈ ਜਦੋਂ ਇਸ ਦਾ ਇਕ ਵੀਡੀਉ ਸੋਸ਼ਲ ਮੀਡੀਆ ਉਤੇ ਵਾਇਰਲ ਹੋਇਆ। ਸ਼ਿਕਾਇਤ ਕੀਤੇ ਜਾਣ ਦੇ ਬਾਵਜੂਦ ਕਾਰਵਾਈ ਨਾ ਹੋਣ ਕਾਰਨ ਸਨਿਚਰਵਾਰ ਨੂੰ ਇਲਾਕੇ ਦੇ ਸਿੱਖ ਥਾਣੇ ਦੀ ਘੇਰਾਬੰਦੀ ਕਰਨ ਪਹੁੰਚ ਗਏ। ਰੀਪੋਰਟ ਦਰਜ ਕਰਨ ਦਾ ਭਰੋਸਾ ਦੇਣ ਮਗਰੋਂ ਹੀ ਉਹ ਸ਼ਾਂਤ ਹੋਏ। 

ਲੁਧੌਰੀ ਦੇ ਗੋਵਿੰਦਪੁਰ ਫ਼ਾਰਮ ਵਾਸੀ ਅਤੇ ਗੁਰਦਵਾਰੇ ਵਿਚ ਸੇਵਾਦਾਰ ਮਨਪ੍ਰੀਤ ਸਿੰਘ ਪੁਲਿਸ ਨੂੰ ਦਿਤੀ ਸ਼ਿਕਾਇਤ ’ਚ ਕਿਹਾ ਕਿ ਸ਼ੁਕਰਵਾਰ ਉਹ ਥਾਣਾ ਸੰਪੂਰਨਾਨਗਰ ਦੇ ਪਿੰਡ ਮਹਿੰਗਾਪੁਰ ’ਚ ਅਪਣੇ ਸਾਥੀ ਗੁਰਵਿੰਦਰ ਸਿੰਘ ਨਾਲ ਗੁਆਂਢੀ ਪਿੰਡ ਬਿਰਜਾ ਪੁਰਵਾ ’ਚ ਸ੍ਰੀ ਅਖੰਡ ਪਾਠ ਕਰਵਾਉਣ ਗਿਆ ਸੀ। ਸ਼ਾਮ ਕਰੀਬ ਸਾਢੇ ਪੰਜ ਕੁ ਵਜੇ ਬਾਈਕ ਤੋਂ ਘਰ ਪਰਤਦੇ ਸਮੇਂ ਲੁਧੂਰੀ ’ਚ ਨਿਸਹਾਰ ਅਹਿਮਦ ਦੇ ਘਰ ਕੋਲ ਪਿੰਡ ਵਾਸੀ ਅਜੈ, ਵਿਜੈ, ਅੰਕਿਤ, ਅਖਿਲੇਸ਼, ਅਨੁਜ, ਸ਼ਿਵਮ ਅਤੇ ਬਿਹਾਰੀਪੁਰਾ ਪਿੰਡ ਦੇ ਸੋਨੂ ਅਤੇ ਸ਼ੁਭਮ ਨੇ ਅਪਣੇ ਅੱਠ-ਦਸ ਸਾਥੀਆਂ ਨਾਲ ਉਨ੍ਹਾਂ ਦੇ ਘੇਰ ਕੇ ਰੋਕ ਲਿਆ। ਉਨ੍ਹਾਂ ਨੂੰ ਅਪਸ਼ਬਦ ਬੋਲੇ ਧਾਰਮਕ ਭਾਵਨਾਵਾਂ ਨੂੰ ਢਾਹ ਲਾਉਣ ਵਾਲੀਆਂ ਗੱਲਾਂ ਕਹਿੰਦਿਆਂ ਉਨ੍ਹਾਂ ਉਤੇ ਹਮਲਾ ਕਰ ਦਿਤਾ। ਸਿਰ ਤੋਂ ਪੱਗ ਉਤਾਰ ਦਿਤੀ ਅਤੇ ਲਾਠੀਆਂ-ਡੰਡਿਆਂ ਅਤੇ ਬੈਲਟ ਆਦਿ ਨਾਲ ਕੁੱਟ-ਕੁੱਟ ਕੇ ਜ਼ਖ਼ਮੀ ਕਰ ਦਿਤਾ। 

ਝਗੜਾ ਪਿੰਡ ’ਚ ਲੱਗੇ ਹਫ਼ਤਾਵਾਰੀ ਬਾਜ਼ਾਰ ਵਿਚ ਹੌਰਨ ਵਜਾਉਣ ਨੂੰ ਲੈ ਕੇ ਹੋਇਆ ਦਸਿਆ ਜਾ ਰਿਹਾ ਹੈ। ਪਿੰਡ ਵਾਸੀਆਂ ਦੀ ਸੂਚਨਾ ਉਤੇ ਪੁਲਿਸ ਨੇ ਮੌਕੇ ਉਤੇ ਪਹੁੰਚ ਕੇ ਹਮਲਾਵਰਾਂ ਨੂੰ ਭਜਾਇਆ। ਪੁਲਿਸ ਨੇ ਰੀਪੋਰਟ ਦਰਜ ਕਰ ਲਈ ਹੈ ਅਤੇ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।