ਜਪਾਨ ’ਚ ਅੱਗ ਕਾਰਨ ਲਗਭਗ 1800 ਹੈਕਟੇਅਰ ਜੰਗਲੀ ਖੇਤਰ ਸੜ ਕੇ ਸੁਆਹ

Fire in Japan burns down nearly 1800 hectares of forest

ਟੋਕੀਉ : ਜਾਪਾਨ ਦੇ ਇਵਾਤੇ ਸੂਬੇ ਦੇ ਓਫੁਨਾਟੋ ਸ਼ਹਿਰ ਵਿਚ ਜੰਗਲ ਦੀ ਅੱਗ ਤੇਜ਼ੀ ਨਾਲ ਫੈਲ ਰਹੀ ਹੈ, ਹੁਣ ਤੱਕ ਲਗਭਗ 1,800 ਹੈਕਟੇਅਰ ਜੰਗਲੀ ਖੇਤਰ ਸੜ ਚੁੱਕਾ ਹੈ। ਰਾਸ਼ਟਰੀ ਪ੍ਰਸਾਰਕ ਐਨ.ਐਚ.ਕੇ ਅਨੁਸਾਰ, 26 ਫ਼ਰਵਰੀ ਨੂੰ ਲੱਗੀ ਅੱਗ ਨੇ ਵੱਡੇ ਖੇਤਰਾਂ ਨੂੰ ਅਪਣੀ ਲਪੇਟ ਵਿਚ ਲੈ ਲਿਆ ਹੈ।  ਅੱਗ ਕੇਂਦਰੀ ਸੈਨਰੀਕੂ-ਚੋ ਰਿਓਇਰੀ ਦੇ ਉੱਤਰ ਅਤੇ ਪੱਛਮ ਵਿਚ ਫੈਲ ਰਹੀ ਹੈ।

ਮੀਡੀਆ ਅਨੁਸਾਰ, ਸ਼ੋਜੀ ਜ਼ਿਲ੍ਹੇ ਦੇ ਸੈਨਰੀਕੂ-ਚੋ ਰਿਓਇਰੀ ਵਿਚ ਇਕ ਲਾਸ਼ ਮਿਲੀ ਹੈ ਅਤੇ ਕਈ ਘਰਾਂ ਸਮੇਤ ਲਗਭਗ 84 ਇਮਾਰਤਾਂ ਨੂੰ ਨੁਕਸਾਨ ਪਹੁੰਚਿਆ ਹੈ। ਕੱੁਝ ਜ਼ਿਲ੍ਹਿਆਂ ਵਿਚ ਲੋਕਾਂ ਨੂੰ ਕੱਢਣ ਦੇ ਹੁਕਮ ਜਾਰੀ ਕੀਤੇ ਗਏ ਹਨ। ਰਿਪੋਰਟਾਂ ਅਨੁਸਾਰ ਐਤਵਾਰ ਨੂੰ ਸਥਾਨਕ ਸਮੇਂ ਅਨੁਸਾਰ ਸਵੇਰੇ 7 ਵਜੇ ਤਕ ਇਥੋਂ 1,222 ਲੋਕਾਂ ਨੂੰ ਨਿਕਾਸੀ ਕੇਂਦਰਾਂ ਅਤੇ ਭਲਾਈ ਕੇਂਦਰਾਂ ਵਿਚ ਭੇਜਿਆ ਗਿਆ।

ਰਿਪੋਰਟਾਂ ਵਿਚ ਕਿਹਾ ਗਿਆ ਹੈ ਕਿ ਰਿਓਇਰੀ ਪ੍ਰਾਇਦੀਪ, ਸੈਨਰੀਕੂ-ਚੋ ਰਿਓਇਰੀ ਅਤੇ ਸੈਨਰੀਕੂ-ਚੋ ਓਕੀਰਾਈ ਦੀ ਸਰਹੱਦ ਅਤੇ ਅਕੈਸ਼ੀ-ਚੋ ਅਰਿਤਾਸ਼ੀ ਦੇ ਆਲੇ ਦੁਆਲੇ ਦੇ ਖੇਤਰਾਂ ਤੋਂ ਧੂੰਆਂ ਉੱਠਦਾ ਦੇਖਿਆ ਗਿਆ। ਇਨ੍ਹਾਂ ਇਲਾਕਿਆਂ ਵਿਚ ਅੱਗ ’ਤੇ ਕਾਬੂ ਪਾਉਣ ਲਈ ਹੈਲੀਕਾਪਟਰਾਂ ਨੇ ਪਾਣੀ ਦਾ ਛਿੜਕਾਅ ਕੀਤਾ।