ਆਸਟ੍ਰੇਲੀਆ ਦੇ ਸਿਡਨੀ 'ਚ ਲਾਪਤਾ ਹੋਇਆ ਪੰਜਾਬੀ ਨੌਜਵਾਨ

ਸਿਡਨੀ : ਪੰਜਾਬੀਆਂ ਦੇ ਆਸਟ੍ਰੇਲੀਆ ਵਰਗੇ ਦੇਸ 'ਚ ਲਾਪਤਾ ਹੋਣ ਖ਼ਬਰਾ ਹਰ ਦਿਨ ਸਾਹਮਣੇ ਆਉਦੀਆਂ ਰਹਿੰਦੀਆਂ ਹਨ। ਪੰਜਾਬੀ ਨੌਜਵਾਨ ਕੁੜੀਆਂ-ਮੁੰਡਿਆਂ ਦੇ ਲਾਪਤਾ ਹੋਣ ਕਾਰਨ ਉਥੋਂ ਦੀ ਪੁਲਿਸ ਅਕਸਰ ਪਰੇਸ਼ਾਨੀ ਵਿਚ ਰਹਿੰਦੀ ਹੈ। ਭਾਲ 'ਚ ਲੱਗੀ ਪੁਲਿਸ ਨੂੰ ਥੱਕ ਹਾਰ ਕੇ ਜਨਤਾ ਦੀ ਮਦਦ ਮੰਗਣੀ ਪੈਂਦੀ ਹੈ। ਇਸ ਤਰ੍ਹਾਂ ਦਾ ਹੀ ਇਕ ਤਾਜ਼ਾ ਮਾਮਲਾ ਸਿਡਨੀ ਦੇ ਬਲੈਕਟਾਊਨ 'ਚ ਸਾਹਮਣੇ ਆਇਆ ਹੈ, ਜਿਥੇ 21 ਸਾਲਾ ਪੰਜਾਬੀ ਨੌਜਵਾਨ ਲਾਪਤਾ ਹੋ ਗਿਆ ਹੈ। 

ਪੁਲਿਸ ਮੁਤਾਬਕ ਨੌਜਵਾਨ ਦਾ ਨਾਂ ਹਰਸਿਮਰਨਪ੍ਰੀਤ ਸਿੰਘ ਹੈ, ਜੋ ਕਿ ਬੀਤੀ 18 ਮਾਰਚ 2018 ਤੋਂ ਲਾਪਤਾ ਹੈ। ਪੁਲਿਸ ਨੇ ਹਰਸਿਮਰਨਪ੍ਰੀਤ ਦੀ ਭਾਲ ਲਈ ਜਨਤਕ ਅਪੀਲ ਕੀਤੀ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਨੌਜਵਾਨ ਨੂੰ ਆਖਰੀ ਵਾਰ 18 ਮਾਰਚ ਦੀ ਰਾਤ ਤਕਰੀਬਨ 9.30 ਵਜੇ ਐਲੇਅ ਸਟਰੀਟ ਸਥਿਤ ਘਰ 'ਚ ਦੇਖਿਆ ਗਿਆ ਸੀ। ਪੁਲਿਸ ਵਲੋਂ ਬਲੈਕਟਾਊਨ ਪੁਲਿਸ ਏਰੀਆ ਕਮਾਂਡ ਵਿਚ ਐਲਰਟ ਜਾਰੀ ਕੀਤਾ ਗਿਆ ਹੈ। 

ਪੁਲਿਸ ਨੇ ਉਸ ਦੀ ਪਛਾਣ ਦਸ ਦੇ ਹੋਏ ਕਿਹਾ ਕਿ ਉਹ ਭਾਰਤੀ ਮੂਲ ਦੀ ਦਿੱਖ ਦਾ ਹੈ। ਉਹ 172 ਸੈਂਟੀਮੀਟਰ ਲੰਬਾ, ਪਤਲਾ ਅਤੇ  ਸਿਰ 'ਤੇ ਦਸਤਾਰ ਸਜਾਉਂਦਾ ਹੈ ਅਤੇ ਉਸ ਦੀ ਦਾੜ੍ਹੀ ਵੀ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਉਹ ਘਰੋਂ ਅਪਣੀ ਟੋਇਟਾ ਕਾਰ 'ਚ ਸਵਾਰ ਹੋ ਕੇ ਗਿਆ ਸੀ, ਜਿਸ ਤੋਂ ਬਾਅਦ ਉਸ ਬਾਰੇ ਕੋਈ ਜਾਣਕਾਰੀ ਨਹੀਂ ਹੈ।