ਅਲਾਸਕਾ : ਦੋ ਜਹਾਜ਼ਾਂ ਦੀ ਟੱਕਰ 'ਚ ਅਸੈਂਬਲੀ ਮੈਂਬਰ ਸਣੇ ਸੱਤ ਮੌਤਾਂ

ਅਲਾਸਕਾ, 1 ਅਗੱਸਤ: ਅਮਰੀਕਾ ਦੇ ਅਲਾਸਕਾ ਸੂਬੇ ਵਿਚ ਹਵਾ ਵਿਚ ਦੋ ਜਹਾਜ਼ਾਂ ਦੇ ਆਪਸ ਵਿਚ ਟਕਰਾਉਣ ਕਾਰਨ 7 ਲੋਕਾਂ ਦੀ ਮੌਤ ਹੋ ਗਈ। ਮਾਰੇ ਗਏ ਲੋਕਾਂ ਵਿਚ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਰਿਪਬਲਿਕਨ ਪਾਰਟੀ ਦੇ ਇਕ ਸਟੇਟ ਅਸੈਂਬਲੀ ਮੈਂਬਰ ਗੈਰੀ ਨੋਪੇ ਵੀ ਸ਼ਾਮਲ ਹਨ।

ਮੀਡੀਆ ਰੀਪੋਰਟਾਂ ਮੁਤਾਬਕ ਅਮਰੀਕਾ ਦੇ ਅਲਾਸਕਾ ਸੂਬੇ ਵਿਚ ਸੋਲਤੋਨਾ ਹਵਾਈ ਅੱਡੇ ਦੇ ਕੋਲ ਹਵਾ ਵਿਚ ਸਵੇਰੇ ਦੋ ਜਹਾਜ਼ਾਂ ਦੀ ਆਪਸ ਵਿਚ ਟੱਕਰ ਹੋ ਗਈ। ਐਫ਼ਏਏ ਦੇ ਇਕ ਬਿਆਨ ਮੁਤਾਬਕ ਸਵੇਰੇ ਕਰੀਬ ਸਾਢੇ 8 ਵਜੇ ਹਵਾਈ ਅੱਡੇ ਤੋਂ ਉਤਰ-ਪੂਰਬ ਵਿਚ ਦੋ ਮੀਲ ਦੀ ਦੂਰੀ ਉਤੇ ਇਕ ਇੰਜਣ ਵਾਲਾ ਡੀ ਹੈਵਿਲੈਂਡ ਡੀਐਚਸੀ 2 ਬੀਵਰ ਜਹਾਜ਼ ਦੂਜੇ ਦੋ ਇੰਜਣ ਵਾਲੇ ਪਾਈਪਰ ਪੀ 12 ਜਹਾਜ਼ ਨਾਲ ਟਕਰਾ ਕੇ ਹਾਦਸਾਗ੍ਰਸਤ ਹੋ ਗਿਆ।

ਐਫ਼ਏਏ ਅਤੇ ਐਨਟੀਐਸਬੀ ਦੇ ਅਧਿਕਾਰੀ ਹਾਦਸੇ ਦੀ ਜਾਂਚ ਕਰ ਰਹੇ ਹਨ। ਐਨਟੀਐਸਬੀ ਅਲਾਸਕਾ ਦੇ ਮੁਖੀ ਜੌਨਸਨ ਦੇ ਅਨੁਸਾਰ ਹਾਦਸਾਗ੍ਰਸਤ ਜਹਾਜ਼ ਦਾ ਮਲਬਾ ਸਟਰਲਿੰਗ ਹਾਈਵੇ ਦੇ ਕੋਲ ਡਿੱਗਿਆ। ਦੋਵੇਂ ਹੀ ਜਹਾਜ਼ਾਂ ਨੇ ਸੋਲਡੋਂਟਾ ਏਅਰਪੋਰਟ ਤੋਂ ਉਡਾਨ ਭਰੀ ਅਤੇ ਐਂਕੋਰੇਜ ਸ਼ਹਿਰ ਤੋਂ ਕਰੀਬ 150 ਮੀਲ ਦੂਰ ਹਵਾ ਵਿਚ ਇਹ ਆਪਸ ਵਿਚ ਟਕਰਾ ਗਏ।

ਦੋਵੇਂ ਜਹਾਜ਼ਾਂ ਵਿਚ ਸਵਾਰ ਲੋਕਾਂ ਦੀ ਗਿਣਤੀ ਦੇ ਬਾਰੇ ਵਿਚ ਅਜੇ ਪਤਾ ਨਹੀਂ ਚਲਿਆ ਹੈ। ਇਸ ਹਾਦਸੇ ਵਿਚ ਅਲਾਸਕਾ ਹਾਊਸ ਦੇ ਪ੍ਰਤੀਨਿਧੀ ਗੈਰੀ ਨੋਪੇ ਦੀ ਮੌਤ ਦੀ ਉਨ੍ਹਾਂ ਦੇ ਕਈ ਸਹਿਯੋਗੀਆਂ ਨੇ ਪੁਸ਼ਟੀ ਕੀਤੀ ਹੈ। ਨੋਪੇ ਦੀ ਪਤਨੀ ਨੇ ਕਿਹਾ ਕਿ ਉਹ ਸ਼ੁਕਰਵਾਰ ਸਵੇਰੇ ਅਪਣਾ ਜਹਾਜ਼ ਉਡਾ ਰਹੇ ਸੀ। ਅਲਾਸਕਾ ਦੇ ਗਵਰਨਰ ਮਾਈਕ ਨੇ ਸ਼ੁਕਰਵਾਰ ਤੋਂ ਸੋਮਵਾਰ ਤਕ ਨੋਪੇ ਦੇ ਸਨਮਾਨ ਵਿਚ ਅਮਰੀਕੀ ਝੰਡਾ ਅਤੇ ਅਲਾਸਕਾ ਸੂਬੇ ਦੇ ਝੰਡੇ ਨੂੰ ਅੱਧਾ ਝੁਕਾਉਣ ਦਾ ਆਦੇਸ਼ ਦਿਤਾ ਹੈ। ਅਲਾਸਕ ਦੇ ਕਈ ਨੇਤਾਵਾਂ ਨੇ ਨੋਪੇ ਦੇ ਦੇਹਾਂਤ 'ਤੇ ਦੁੱਖ ਪ੍ਰਗਟਾਇਆ ਹੈ।  (ਪੀਟੀਆਈ)