File Photo

ਜਰਮਨੀ - ਜਰਮਨੀ ਵਿਚ ਕੋਰੋਨਾ ਦੇ ਸ਼ੁਰੂਆਤੀ ਮਾਮਲਿਆਂ ਤੋਂ ਬਾਅਦ ਹੀ ਦੇਸ਼ ਭਰ ਵਿਚ ਲੋਕਾਂ ਨੇ 'ਪੈਨਿਕ ਬਾਇੰਗ' ਯਾਨੀ ਘਬਰਾਹਟ ਵਿਚ ਵੱਡੀ ਗਿਣਤੀ ਵਿਚ ਸਾਮਾਨ ਖਰੀਦਣਾ ਸ਼ੁਰੂ ਕਰ ਦਿੱਤਾ ਸੀ। ਟਾਇਲਟ ਪੇਪਰ, ਸੈਨੇਟਾਈਜ਼ਰ ਅਤੇ ਸਾਬਣ ਤੋਂ ਬਾਅਦ ਜਿਸ ਇਕ ਚੀਜ਼ ਦੀ ਇਥੇ ਸਭ ਤੋਂ ਜ਼ਿਆਦਾ ਮੰਗ ਦੇਖੀ ਜਾ ਰਹੀ ਹੈ। ਉਹ ਹੈ ਪਾਸਤਾ, ਖਾਣ ਦੇ ਸਾਮਾਨ ਵਿਚ ਸਭ ਤੋਂ ਜ਼ਿਆਦਾ ਕਮੀ ਪਾਸਤਾ ਦੀ ਹੀ ਦੇਖੀ ਜਾ ਰਹੀ ਹੈ।

ਇਸ ਦੀ ਵਜ੍ਹਾ ਹੈ ਪਾਸਤਾ ਨੂੰ ਕਈ-ਕਈ ਮਹੀਨਿਆਂ ਤੱਕ ਸੰਭਾਲ ਕੇ ਰੱਖਿਆ ਜਾ ਸਕਦਾ ਹੈ ਅਤੇ ਖਾਸ ਗੱਲ ਇਹ ਹੈ ਕਿ ਇਹ ਖਰਾਬ ਨਹੀਂ ਹੁੰਦਾ। ਇਸ ਦੇ ਨਾਲ ਹੀ ਪਾਸਤਾ ਸੌਸ ਦੀਆਂ ਬੋਤਲਾਂ ਦੀ ਮੰਗ ਵੀ ਪਿਛਲੇ ਕੁਝ ਹਫਤਿਆਂ ਵਿਚ ਕਾਫੀ ਵੱਧ ਗਈ ਹੈ। ਇਸ ਮੰਗ ਨੂੰ ਧਿਆਨ ਵਿਚ ਰੱਖਦੇ ਹੋਏ ਜਰਮਨੀ ਦੀ ਸੁਪਰਮਾਰਕੀਟ ਚੇਨ ਆਲਡੀ ਨੇ ਇਟਲੀ ਤੋਂ ਪਾਸਤਾ ਮੰਗਾਉਣ ਦਾ ਫੈਸਲਾ ਕੀਤਾ।ਇਸ ਦੇ ਲਈ ਖਾਸ ਰੇਲ ਗੱਡੀਆਂ ਵੀ ਚਲਾਈਆਂ ਗਈਆਂ ਹਨ।

ਆਪਣੇ ਬਿਆਨ ਵਿਚ ਆਲਡੀ ਨੇ ਕਿਹਾ ਕਿ ਪਹਿਲੀ ਡਲਿਵਰੀ ਦੇ ਤਹਿਤ ਕਈ ਖਾਸ ਰੇਲ ਗੱਡੀਆਂ ਪਹਿਲਾਂ ਹੀ ਫਿਊਸੀਲੀ ਦੇ 60,000 ਤੋਂ ਜ਼ਿਆਦਾ ਪੈਕੇਟ, ਪੇਨੇ ਦੇ 75,000 ਤੋਂ ਜ਼ਿਆਦਾ ਪੈਕੇਟ ਅਤੇ ਸਪਗੇਟੀ ਦੇ 25,000 ਤੋਂ ਜ਼ਿਆਦਾ ਪੈਕੇਟ ਇਟਲੀ ਤੋਂ (ਜਰਮਨੀ ਦੇ) ਨਿਊਰੇਮਬਰਗ ਵਿਚ ਪਹੁੰਚਾ ਚੁੱਕੀ ਹੈ। ਨਿਊਰੇਮਬਰਗ ਤੋਂ ਇਨ੍ਹਾਂ ਨੂੰ ਦੱਖਣੀ ਜਰਮਨੀ ਵਿਚ ਮੌਜੂਦਾ ਆਲਡੀ ਦੇ ਸਟੋਰਾਂ ਵਿਚ ਪਹੁੰਚਾਇਆ ਜਾਵੇਗਾ, ਫਿਊਸੀਲੀ, ਪੇਨੇ ਅਤੇ ਸਪਗੇਟੀ ਪਾਸਤਾ ਦੀ ਵੱਖ-ਵੱਖ ਕਿਸਮਾਂ ਹਨ।

ਬਿਆਨ ਵਿਚ ਕਿਹਾ ਗਿਆ ਹੈ ਕਿ ਜਰਮਨ ਰੇਲਵੇ ਅਜੇ ਤੱਕ ਕੁਲ ਮਿਲਾ ਕੇ 300 ਪੈਕੇਟ ਪਾਸਤਾ ਇਟਲੀ ਤੋਂ ਜਰਮਨੀ ਲਿਆ ਚੁੱਕੀ ਹੈ ਜਿਨ੍ਹਾਂ ਵਿਚ ਕੁੱਲ 200 ਟਨ ਪਾਸਤਾ ਸੀ। ਅਜਿਹੇ ਹੀ 250 ਅਤੇ ਪੈਲੇਟ ਲਿਆਉਣ 'ਤੇ ਕੰਮ ਚੱਲ ਰਿਹਾ ਹੈ। ਰੇਲਵੇ ਦੇ ਬੁਲਾਰੇ ਦਾ ਕਹਿਣਾ ਹੈ ਕਿ ਭਵਿੱਖ ਵਿਚ ਲੋੜ ਪੈਣ 'ਤੇ ਇਸ ਤਰ੍ਹਾਂ ਦੀ ਡਿਲਵਰੀ ਲਈ ਨਿਯਮਿਤ ਰੂਪ ਨਾਲ ਰੇਲ ਚਲਾਈ ਜਾ ਸਕਦੀ ਹੈ।

ਆਲਡੀ ਮੁਤਾਬਕ ਕੋਰੋਨਾ ਸੰਕਟ ਵਿਚਾਲੇ ਇਟਲੀ ਤੋਂ ਸਾਮਾਨ ਮੰਗਾਉਣਾ ਕਾਫੀ ਮੁਸ਼ਕਲ ਹੋ ਗਿਆ ਹੈ ਕਿਉਂਕਿ ਨਾ ਟਰੱਕ ਡਰਾਈਵਰ ਮਿਲ ਰਹੇ ਹਨ ਅਤੇ ਨਾ ਹੀ ਟਰਾਂਸਪੋਰਟ ਦੇ ਦੂਜੇ ਜ਼ਰੀਏ ਨਿਯਮਿਤ ਤੌਰ 'ਤੇ ਕੰਮ ਕਰ ਰਹੇ ਹਨ। ਇਸੇ ਕਾਰਨ ਸਪੈਸ਼ਲ ਟ੍ਰੇਨ ਚਲਾਉਣ ਦਾ ਵਿਚਾਰ ਆਇਆ। ਚਾਂਸਲਰ ਮਰਕੇਲ ਨੇ ਦੇਸ਼ਵਾਸੀਆਂ ਨੂੰ ਵਾਅਦਾ ਕੀਤਾ ਹੈ ਕਿ ਕੋਰੋਨਾ ਸੰਕਟ ਵਿਚਾਲੇ ਦੇਸ਼ ਵਿਚ ਖਾਣ-ਪੀਣ ਦੇ ਸਾਮਾਨ ਦੀ ਕਮੀ ਨਹੀਂ ਹੋਵੇਗੀ।

ਦੇਸ਼ ਵਿਚ ਲੱਗਭਗ ਲੌਕਡਾਊਨ ਵਰਗੀ ਸਥਿਤੀ ਹੈ ਪਰ ਸਾਰੀਆਂ ਸੁਪਰਮਾਰਕੀਟ ਖੁੱਲ੍ਹੀਆਂ ਹਨ। ਲੋਕਆਂ ਦੀ ਸਹੂਲੀਅਤ ਨੂੰ ਧਿਆਨ ਵਿਚ ਰੱਖਦੇ ਹੋਏ ਹਫਤੇ ਦੇ 7 ਦਿਨ ਇਨ੍ਹਾਂ ਨੂੰ ਖੋਲ੍ਹਣ ਦਾ ਪ੍ਰਸਤਾਵ ਵੀ ਦਿੱਤਾ ਗਿਆ ਸੀ ਪਰ ਜ਼ਿਆਦਾਤਰ ਦੁਕਾਨਾਂ ਨੇ ਐਤਵਾਰ ਨੂੰ ਛੁੱਟੀ ਦਾ ਫੈਸਲਾ ਲਿਆ। ਖਾਣ-ਪੀਣ ਦੇ ਸਾਮਾਨ ਤੋਂ ਇਲਾਵਾ ਜਰਮਨੀ ਸਾਬਣ ਅਤੇ ਸੈਨੇਟਾਈਜ਼ਰ ਦੀ ਕਿੱਲਤ ਦਾ ਵੀ ਸਾਹਮਣਾ ਕਰ ਰਿਹਾ ਹੈ।

ਜਰਮਨੀ ਦੀ ਕੈਮੀਕਲ ਕੰਪਨੀ ਬੀ.ਏ.ਐਸ.ਐਫ. ਇਸ ਕਿੱਲਤ ਨੂੰ ਪੂਰਾ ਕਰਨ ਦੀ ਕੋਸ਼ਿਸ਼ ਵਿਚ ਲੱਗੀ ਹੈ। ਕੰਪਨੀ ਹਰ ਹਫ਼ਤੇ 35 ਟਨ ਸੈਨੇਟਾਈਜ਼ਰ ਬਣਾ ਕੇ ਹਸਪਤਾਲਾਂ ਤੱਕ ਇਸ ਨੂੰ ਮੁਫਤ ਪਹੁੰਚਾ ਰਹੀ ਹੈ। ਹੁਣ ਤੱਕ 1000 ਹਸਪਤਾਲਾਂ ਨੂੰ ਇਸ ਦਾ ਫਾਇਦਾ ਪਹੁੰਚਿਆ ਹੈ। ਅਮਰੀਕਾ ਦੀ ਡਾਊਡੂਪੌਂਟ ਤੋਂ ਬਾਅਦ ਬੀ.ਏ.ਐਸ.ਐਫ. ਦੁਨੀਆ ਦੀ ਦੂਜੀ ਸਭ ਤੋਂ ਵੱਡੀ ਕੈਮੀਕਲ ਕੰਪਨੀ ਹੈ।

Punjabi News  ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ  Facebook  ਤੇ ਲਾਈਕ Twitter  ਤੇ follow  ਕਰੋ।