Singapore News: ਸਿੰਗਾਪੁਰ ਦੀਆਂ ਆਮ ਚੋਣਾਂ ’ਚ ਪ੍ਰਧਾਨ ਮੰਤਰੀ ਵੋਂਗ ਤੇ ਪੀ.ਏ.ਪੀ ਦੀ ਸ਼ਾਨਦਾਰ ਜਿੱਤ
Singapore News: ਪਾਰਟੀ ਨੂੰ ਮਿਲੀਆਂ 97 ’ਚੋਂ 87 ਸੀਟਾਂ
Singapore News:ਸਿੰਗਾਪੁਰ ਦੀਆਂ ਆਮ ਚੋਣਾਂ ਵਿਚ ਪ੍ਰਧਾਨ ਮੰਤਰੀ ਲਾਰੈਂਸ ਵੋਂਗ ਦੀ ਪੀਪਲਜ਼ ਐਕਸ਼ਨ ਪਾਰਟੀ ਨੇ ਸ਼ਾਨਦਾਰ ਜਿੱਤ ਹਾਸਲ ਕੀਤੀ। ਉਸ ਨੇ 97 ਸੰਸਦੀ ਸੀਟਾਂ ਵਿਚੋਂ 87 ’ਤੇ ਜਿੱਤ ਪ੍ਰਾਪਤ ਕੀਤੀ। ਅਮਰੀਕੀ ਵਪਾਰ ਟੈਰਿਫ਼ਾਂ ਕਾਰਨ ਵਿਸ਼ਵ ਅਰਥਵਿਵਸਥਾ ਵਿੱਚ ਅਨਿਸ਼ਚਿਤਤਾਵਾਂ ਦੇ ਵਿਚਕਾਰ ਵੋਂਗ ਅਤੇ ਪੀਏਪੀ ਨੂੰ ਆਮ ਚੋਣਾਂ ਤੋਂ ਨਵਾਂ ਫ਼ਤਵਾ ਮਿਲਿਆ ਹੈ। ਸਿੰਗਾਪੁਰ ਦੀ ਸੱਭ ਤੋਂ ਪੁਰਾਣੀ ਅਤੇ ਸੱਭ ਤੋਂ ਵੱਡੀ ਰਾਜਨੀਤਿਕ ਪਾਰਟੀ ਪੀਏਪੀ, 1965 ਵਿਚ ਆਜ਼ਾਦੀ ਤੋਂ ਬਾਅਦ ਸਿੰਗਾਪੁਰ ’ਤੇ ਰਾਜ ਕਰ ਰਹੀ ਹੈ।
ਮਾਰਸਿਲਿੰਗ-ਯੂ ਟੀ ਗਰੁੱਪ ਰਿਪ੍ਰਜ਼ੈਂਟੇਸ਼ਨ ਕਾਂਸਟੀਚਿਊਂਸੀ (ਜੀਆਰਸੀ) ਦੇ ਨਤੀਜਿਆਂ ਦਾ ਐਲਾਨ ਹੋਣ ਤੋਂ ਬਾਅਦ ਵੋਂਗ ਨੇ ਕਿਹਾ ਕਿ ਇਹ ਉਸਦਾ ਪਹਿਲਾ ਅਤੇ ਇਕ ਸ਼ਾਨਦਾਰ ਅਨੁਭਵ ਸੀ। ਉਨ੍ਹਾਂ ਵੋਟਰਾਂ ਲਈ ਸਖ਼ਤ ਮਿਹਨਤ ਕਰਨ ਦਾ ਵਾਅਦਾ ਕੀਤਾ। ਲਾਰੈਂਸ ਵੋਂਗ (52) ਨੇ ਕਿਹਾ, ‘ਅਸੀਂ ਤੁਹਾਡੇ ਮਜ਼ਬੂਤ ਫ਼ਤਵੇ ਲਈ ਧਨਵਾਦੀ ਹਾਂ ਅਤੇ ਤੁਹਾਡੇ ਸਾਰਿਆਂ ਲਈ ਹੋਰ ਵੀ ਸਖ਼ਤ ਮਿਹਨਤ ਕਰ ਕੇ ਤੁਹਾਡੇ ਦੁਆਰਾ ਸਾਡੇ ਵਿਚ ਪ੍ਰਗਟਾਏ ਗਏ ਭਰੋਸੇ ਦਾ ਸਨਮਾਨ ਕਰਾਂਗੇ।’
ਪਿਛਲੇ ਸਾਲ ਪ੍ਰਧਾਨ ਮੰਤਰੀ ਬਣੇ ਸਨ ਲਾਰੈਂਸ ਵੋਂਗ
ਇਸ ਚੋਣ ਨੂੰ ਪ੍ਰਧਾਨ ਮੰਤਰੀ ਲਾਰੈਂਸ ਵੋਂਗ ਲਈ ਪਹਿਲੀ ਮਹੱਤਵਪੂਰਨ ਪ੍ਰੀਖਿਆ ਵਜੋਂ ਦੇਖਿਆ ਜਾ ਰਿਹਾ ਹੈ, ਜਿਨ੍ਹਾਂ ਨੇ ਪਿਛਲੇ ਸਾਲ ਅਹੁਦਾ ਸੰਭਾਲਿਆ ਸੀ। ਉਹ ਪੀਏਪੀ ਦੀ ਅਗਵਾਈ ਕਰਦੇ ਹਨ, ਜੋ ਆਜ਼ਾਦੀ ਤੋਂ ਬਾਅਦ ਸਿੰਗਾਪੁਰ ’ਤੇ ਰਾਜ ਕਰ ਰਿਹਾ ਹੈ। ਚੋਣ ਵਿਭਾਗ (ਈਐੱਲਡੀ) ਨੇ ਕਿਹਾ ਕਿ ਸਿੰਗਾਪੁਰ ਦੇ ਵੋਟਰਾਂ ਨੇ ਦੇਸ਼ ਦੇ ਭਵਿੱਖ ਦੇ ਰਾਜਨੀਤਿਕ ਭਵਿੱਖ ਦਾ ਫ਼ੈਸਲਾ ਕਰਨ ਲਈ 1,240 ਪੋਲਿੰਗ ਸਟੇਸ਼ਨਾਂ ’ਤੇ 97 ਸੰਸਦੀ ਸੀਟਾਂ ਵਿਚੋਂ 92 ਲਈ ਅਪਣੀਆਂ ਵੋਟਾਂ ਪਾਈਆਂ। ਦੇਸ਼ ਵਿਚ 27,58,846 ਰਜਿਸਟਰਡ ਵੋਟਰ ਹਨ। (ਏਜੰਸੀ)