‘ਅਸੀਂ ਦੋਵੇਂ ਇਸਲਾਮੀ ਰਾਸ਼ਟਰ ਹਾਂ’ : ਮਲੇਸ਼ੀਆ ’ਚ ਭਾਰਤ ਵਿਰੁੱਧ ਪਾਕਿਸਤਾਨ ਦਾ ਧਾਰਮਕ ਕਾਰਡ ਹੋਇਆ ਫ਼ਲਾਪ
ਭਾਰਤੀ ਵਫ਼ਦ ਦੇ ਪ੍ਰੋਗਰਾਮਾਂ ਨੂੰ ਰੱਦ ਕਰਨ ਦੀ ਕੀਤੀ ਸੀ ਪਾਕਿਸਤਾਨ ਨੇ ਬੇਨਤੀ
ਮਲੇਸ਼ੀਆ ਸਰਕਾਰ ਨੇ ਪਾਕਿਸਤਾਨ ਦੀ ਮੰਗ ਨੂੰ ਨਜ਼ਰਅੰਦਾਜ਼ ਕਰਦਿਆਂ ਪ੍ਰਗੋਰਾਮਾਂ ਨੂੰ ਦਿਤੀ ਇਜਾਜ਼ਤ
All-party delegation in Malaysia: ਪਾਕਿਸਤਾਨ ਅਪਣੀਆਂ ਨਾਪਾਕ ਚਾਲਾਂ ਤੋਂ ਬਾਜ਼ ਨਹੀਂ ਆ ਰਿਹਾ ਹੈ। ਇਸ ਦਾ ਸਬੂਤ ਇਕ ਵਾਰ ਫਿਰ ਉਸ ਨੇ ਦੇ ਦਿਤਾ। ਪਾਕਿਸਤਾਨ ਨੇ ਅਤਿਵਾਦ ਵਿਰੁਧ ਭਾਰਤ ਵਲੋਂ ਸ਼ੁਰੂ ਕੀਤੇ ਗਏ ਸਰਬ ਪਾਰਟੀ ਵਫ਼ਦ ਦੇ ਆਊਟਰੀਚ ਪ੍ਰਗੋਰਾਮ ਨੂੰ ਇਸਲਾਮਕ ਇਕਜੁਟਤਾ ਦੇ ਦਮ ’ਤੇ ਰੋਕਣ ਦੀ ਕੋਸ਼ਿਸ਼ ਕੀਤੀ ਪਰ ਉਸ ਦਾ ਇਹ ਧਾਰਮਕ ਕਾਰਡ ਫ਼ਲਾਪ ਹੋ ਗਿਆ। ਸੂਤਰਾਂ ਨੇ ਦੱਸਿਆ ਕਿ ਮਲੇਸ਼ੀਆ ਨੇ ‘ਕਸ਼ਮੀਰ ਮਾਮਲਾ ਸੰਯੁਕਤ ਰਾਸ਼ਟਰ ਵਿੱਚ ਹੋਣ‘ ਦਾ ਹਵਾਲਾ ਦਿੰਦੇ ਹੋਏ, ਆਪ੍ਰੇਸ਼ਨ ਸਿੰਦੂਰ ਦੇ ਸਾਰੇ ਆਊਟਰੀਚ ਪ੍ਰੋਗਰਾਮਾਂ ਨੂੰ ਰੱਦ ਕਰਨ ਦੀ ਪਾਕਿਸਤਾਨ ਦੀ ਬੇਨਤੀ ਨੂੰ ਨਜ਼ਰਅੰਦਾਜ਼ ਕਰ ਦਿੱਤਾ।
ਧਰਮ ਕਾਰਡ ਖੇਡਣ ਦੀ ਕੋਸ਼ਿਸ਼ ਕਰਦੇ ਹੋਏ, ਪਾਕਿਸਤਾਨੀ ਦੂਤਾਵਾਸ ਨੇ ਮਲੇਸ਼ੀਆ ਦੇ ਸਰਕਾਰੀ ਅਧਿਕਾਰੀਆਂ ਨੂੰ ਜੇਡੀਯੂ ਸਾਂਸਦ ਸੰਜੇ ਝਾਅ ਦੀ ਅਗਵਾਈ ਵਾਲੇ ਵਫ਼ਦ ਦੇ ਸਾਰੇ 10 ਪ੍ਰੋਗਰਾਮਾਂ ਨੂੰ ਰੱਦ ਕਰਨ ਦੀ ਅਪੀਲ ਕਰਦੇ ਹੋਏ ਕਿਹਾ, ‘‘ਅਸੀਂ ਇੱਕ ਇਸਲਾਮੀ ਦੇਸ਼ ਹਾਂ, ਤੁਸੀਂ ਇੱਕ ਇਸਲਾਮੀ ਦੇਸ਼ ਹੋ... ਭਾਰਤੀ ਵਫ਼ਦ ਦੀ ਗੱਲ ਨਾ ਸੁਣੋ, ਮਲੇਸ਼ੀਆ ਵਿੱਚ ਉਨ੍ਹਾਂ ਦੇ ਸਾਰੇ ਪ੍ਰੋਗਰਾਮ ਰੱਦ ਕਰੋ।’’ ਪਾਕਿਸਤਾਨ ਦੀ ਬੇਨਤੀ ਨੂੰ ਰੱਦ ਕਰਦੇ ਹੋਏ, ਮਲੇਸ਼ੀਆ ਸਰਕਾਰ ਨੇ ਨੌਂ ਮੈਂਬਰੀ ਵਫ਼ਦ ਨੂੰ ਸਾਰੇ 10 ਪ੍ਰਸਤਾਵਿਤ ਸਮਾਗਮਾਂ ਨੂੰ ਕਰਨ ਦੀ ਇਜਾਜ਼ਤ ਦੇ ਦਿਤੀ। ਮਲੇਸ਼ੀਆ ਵਫ਼ਦ ਦੇ ਬਹੁ-ਰਾਸ਼ਟਰੀ ਦੌਰੇ ਦਾ ਆਖ਼ਰੀ ਪੜਾਅ ਸੀ, ਜਿਸ ਵਿੱਚ ਜਾਪਾਨ, ਦੱਖਣੀ ਕੋਰੀਆ, ਸਿੰਗਾਪੁਰ ਅਤੇ ਇੰਡੋਨੇਸ਼ੀਆ ਵਿੱਚ ਰੁਕਣਾ ਸ਼ਾਮਲ ਸੀ। ਵਫ਼ਦ ਸ਼ਨੀਵਾਰ ਨੂੰ ਕੁਆਲਾਲੰਪੁਰ ਪਹੁੰਚਿਆ।
ਜੇਡੀਯੂ ਦੇ ਸੰਸਦ ਮੈਂਬਰ ਸੰਜੇ ਝਾਅ ਦੀ ਅਗਵਾਈ ਵਾਲੇ ਭਾਰਤੀ ਵਫ਼ਦ ਵਿੱਚ ਭਾਜਪਾ ਦੇ ਸੰਸਦ ਮੈਂਬਰ ਅਪਰਾਜਿਤਾ ਸਾਰੰਗੀ, ਬ੍ਰਿਜ ਲਾਲ, ਪ੍ਰਦਾਨ ਬਰੂਆ ਅਤੇ ਹੇਮਾਂਗ ਜੋਸ਼ੀ, ਤ੍ਰਿਣਮੂਲ ਕਾਂਗਰਸ ਦੇ ਅਭਿਸ਼ੇਕ ਬੈਨਰਜੀ, ਸੀਪੀਐਮ ਦੇ ਜੌਨ ਬ੍ਰਿਟਾਸ, ਕਾਂਗਰਸ ਦੇ ਸਲਮਾਨ ਖੁਰਸ਼ੀਦ ਅਤੇ ਬਹਿਰੀਨ ਅਤੇ ਫਰਾਂਸ ਵਿੱਚ ਭਾਰਤ ਦੇ ਸਾਬਕਾ ਰਾਜਦੂਤ ਮੋਹਨ ਕੁਮਾਰ ਸ਼ਾਮਲ ਸਨ। ਭਾਰਤੀ ਵਫ਼ਦ ਨੇ ਮਲੇਸ਼ੀਆ ਦੀ ਪੀਪਲਜ਼ ਜਸਟਿਸ ਪਾਰਟੀ (ਪੀਕੇਆਰ) ਨਾਲ ਮੁਲਾਕਾਤ ਕੀਤੀ, ਜਿਸਦੀ ਅਗਵਾਈ ਪ੍ਰਧਾਨ ਮੰਤਰੀ ਮਹਾਥਿਰ ਮੁਹੰਮਦ ਦੇ ਮੰਤਰੀ ਮੰਡਲ ਵਿੱਚ ਸਾਬਕਾ ਮੰਤਰੀ ਵਾਈਬੀ ਸਿਮ ਤਜ਼ੇ ਤਜ਼ਿਨ ਕਰ ਰਹੇ ਸਨ। ਉਨ੍ਹਾਂ ਨੇ ਆਪ੍ਰੇਸ਼ਨ ਸਿੰਦੂਰ ਅਧੀਨ ਭਾਰਤ ਦੇ ‘ਦ੍ਰਿੜ ਰੁਖ਼’ ’ਤੇ ਜ਼ੋਰ ਦਿੱਤਾ, ਜਦੋਂ ਕਿ ਅਤਿਵਾਦ ’ਤੇ ਆਪਣੇ ਜ਼ੀਰੋ-ਟੌਲਰੈਂਸ ਸਟੈਂਡ ਨੂੰ ਦੁਹਰਾਇਆ। ਭਾਰਤੀ ਵਫ਼ਦ ਨੇ ਮਲੇਸ਼ੀਆ ਦੇ ਆਗੂਆਂ ਨੂੰ ਆਪ੍ਰੇਸ਼ਨ ਸਿੰਦੂਰ ਅਧੀਨ ਪਾਕਿਸਤਾਨ ਵਿੱਚ ਅਤਿਵਾਦੀ ਕੈਂਪਾਂ ਨੂੰ ਨਿਸ਼ਾਨਾ ਬਣਾ ਕੇ ਕੀਤੇ ਗਏ ਸਟੀਕ ਸਟਰਾਈਕ ਬਾਰੇ ਵੀ ਜਾਣਕਾਰੀ ਦਿੱਤੀ।
ਐਤਵਾਰ ਨੂੰ ਕੁਆਲਾਲੰਪੁਰ ਵਿੱਚ ਭਾਰਤੀ ਪ੍ਰਵਾਸੀਆਂ ਨੂੰ ਸੰਬੋਧਨ ਕਰਦੇ ਹੋਏ, ਤ੍ਰਿਣਮੂਲ ਸੰਸਦ ਮੈਂਬਰ ਅਭਿਸ਼ੇਕ ਬੈਨਰਜੀ ਨੇ ਕਿਹਾ ਕਿ ਭਾਰਤ ਨੂੰ ਪਾਕਿਸਤਾਨ ਨਾਲ ਸਿਰਫ਼ ਤਾਂ ਹੀ ਗੱਲਬਾਤ ਕਰਨੀ ਚਾਹੀਦੀ ਹੈ ਜੇਕਰ ਉਹ ਪਾਕਿਸਤਾਨ ਦੇ ਕਬਜ਼ੇ ਵਾਲੇ ਕਸ਼ਮੀਰ ਨੂੰ ਸੌਂਪਣ ਲਈ ਤਿਆਰ ਹੈ। ਅੱਜ ਪੰਜ ਦੇਸ਼ਾਂ ਦੇ ਦੌਰੇ ਤੋਂ ਵਾਪਸ ਆਉਣ ਤੋਂ ਬਾਅਦ, ਸੰਜੇ ਝਾਅ ਨੇ ਨਿਊਜ਼ ਏਜੰਸੀ ਪੀਟੀਆਈ ਨੂੰ ਦੱਸਿਆ ਕਿ ਸਾਰੇ ਦੇਸ਼ਾਂ ਨੇ ‘‘ਪਹਿਲਗਾਮ ਘਟਨਾ ਦੇ ਪੀੜਤਾਂ ਪ੍ਰਤੀ ਆਪਣੀ ਸੰਵੇਦਨਾ ਪ੍ਰਗਟ ਕੀਤੀ ਅਤੇ ਅਤਿਵਾਦੀ ਬੁਨਿਆਦੀ ਢਾਂਚੇ ’ਤੇ ਭਾਰਤ ਦੇ ਸਟੀਕ ਹਮਲੇ ਦੀ ਸ਼ਲਾਘਾ ਕੀਤੀ।’’
(For more news apart from Malaysia Latest News, stay tuned to Rozana Spokesman)