ਖਾਣਾ ਬਣਾਉਂਦੇ ਸਮੇਂ ਲੱਗੀ ਭਿਆਨਕ ਅੱਗ, ਔਰਤ ਸਣੇ 4 ਮਾਸੂਮ ਜ਼ਿੰਦਾ ਸੜੇ
ਅੱਗ ਲੱਗਣ ਕਾਰਨ ਖ਼ਾਨਾਬਦੋਸ਼ਾਂ ਦੇ ਕਈ ਅਸਥਾਈ ਘਰ ਪੂਰੀ ਤਰ੍ਹਾਂ ਸੜ ਕੇ ਹੋਏ ਸੁਆਹ
ਲਾਹੌਰ, 6 ਮਾਰਚ : ਪਾਕਿਸਤਾਨ ਦੇ ਪੰਜਾਬ ਸੂਬੇ ਵਿਚ ਇਕ ਖ਼ਾਨਾਬਦੋਸ਼ ਦੇ ਅਸਥਾਈ ਘਰ ਵਿਚ ਅੱਗ ਲੱਗਣ ਕਾਰਨ ਇੱਕ ਔਰਤ ਅਤੇ ਘੱਟੋ-ਘੱਟ ਚਾਰ ਬੱਚਿਆਂ ਦੀ ਮੌਤ ਹੋ ਗਈ। ਇਕ ਅਧਿਕਾਰੀ ਨੇ ਇਹ ਜਾਣਕਾਰੀ ਦਿਤੀ।
ਅਧਿਕਾਰੀ ਨੇ ਦਸਿਆ ਕਿ ਇਹ ਘਟਨਾ ਲਾਹੌਰ ਤੋਂ ਲਗਭਗ 600 ਕਿਲੋਮੀਟਰ ਦੂਰ ਬਚੋਲਿਸਤਾਨ ਦੇ ਟੋਬਾ ਕਾਸਿਮਵਾਲਾ ਵਿਚ ਵਾਪਰੀ। ‘ਰੈਸਕਿਊ 1122’ ਅਨੁਸਾਰ, ਅਸਥਾਈ ਰਿਹਾਇਸ਼ ਵਿੱਚ ਜਦੋਂ ਔਰਤ ਖਾਣਾ ਬਣਾ ਰਹੀ ਸੀ, ਉਸ ਸਮੇਂ ਅੱਗ ਲੱਗ ਗਈ।
ਇਕ ਬੁਲਾਰੇ ਨੇ ਦਸਿਆ ਕਿ ਹਵਾ ਕਾਰਨ ਅੱਗ ਦੂਜੇ ਸਥਾਈ ਘਰਾਂ ਤਕ ਫੈਲ ਗਈ, ਜਿਸ ਦੇ ਨਤੀਜੇ ਵਜੋਂ ਔਰਤ ਸਣੇ ਇਕ ਤੋਂ ਚਾਰ ਸਾਲ ਦੀ ਉਮਰ ਦੇ 4 ਬੱਚਿਆਂ ਦੀ ਝੁਲਸਣ ਕਾਰਨ ਮੌਤ ਹੋ ਗਈ।
ਉਨ੍ਹਾਂ ਦਸਿਆ ਕਿ ਅੱਗ ਲੱਗਣ ਕਾਰਨ ਖ਼ਾਨਾਬਦੋਸ਼ਾਂ ਦੇ ਕਈ ਅਸਥਾਈ ਘਰ ਪੂਰੀ ਤਰ੍ਹਾਂ ਸੜ ਕੇ ਸੁਆਹ ਹੋ ਗਏ ਅਤੇ ਕਈ ਪਰਵਾਰ ਅਪਣੀ ਜਾਨ ਬਚਾਉਣ ਲਈ ਦੌੜੇ। ਪੰਜਾਬ ਦੀ ਮੁੱਖ ਮੰਤਰੀ ਮਰੀਅਮ ਨਵਾਜ਼ ਨੇ ਇਸ ਘਟਨਾ ’ਤੇ ਦੁਖ ਪ੍ਰਗਟਾਇਆ ਅਤੇ ਸਬੰਧਤ ਅਧਿਕਾਰੀਆਂ ਨੂੰ ਪ੍ਰਭਾਵਿਤ ਪਰਵਾਰਾਂ ਨੂੰ ਮਦਦ ਦਾ ਹੁਕਮ ਦਿਤਾ। (ਏਜੰਸੀ)