ਸਟੈਚੂ ਆਫ਼ ਲਿਬਰਟੀ 'ਤੇ ਚੜ੍ਹੀ ਔਰਤ

Woman Climbed Up the Statue of Liberty

ਨਿਊਯਾਰਕ : ਅਮਰੀਕਾ 'ਚ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਇਮੀਗ੍ਰੇਸ਼ਨ ਨੀਤੀ ਦਾ ਵਿਰੋਧ ਲਗਾਤਾਰ ਵਧਦਾ ਜਾ ਰਿਹਾ ਹੈ। ਅਮਰੀਕਾ ਦੇ ਆਜ਼ਾਦੀ ਦਿਹਾੜੇ 'ਤੇ ਬੁਧਵਾਰ ਨੂੰ ਇਕ ਔਰਤ ਸਟੈਚੂ ਆਫ਼ ਲਿਬਰਟੀ 'ਤੇ ਚੜ੍ਹ ਗਈ ਅਤੇ ਲਗਭਗ 3 ਘੰਟੇ ਤਕ ਉਥੇ ਬੈਠੀ ਰਹੀ। ਉਸ ਦੀ ਮੰਗ ਸੀ ਕਿ ਜਦੋਂ ਤਕ ਸ਼ਰਨਾਰਥੀ ਕੈਂਪ 'ਚ ਬੰਦ ਸਾਰੇ ਬੱਚੇ ਛੱਡ ਨਹੀਂ ਦਿਤੇ ਜਾਂਦੇ ਅਤੇ ਉਨ੍ਹਾਂ ਨੂੰ ਪਰਵਾਰ ਵਾਲਿਆਂ ਤੋਂ ਮਿਲਵਾ ਨਹੀਂ ਦਿਤਾ ਜਾਂਦਾ, ਉਦੋਂ ਤਕ ਉਹ ਸਟੈਚੂ 'ਤੇ ਨਹੀਂ ਉਤਰੇਗੀ। ਪੁਲਿਸ ਅਧਿਕਾਰੀਆਂ ਨੇ ਔਰਤ ਨੂੰ ਕਾਫ਼ੀ ਸਮਝਾਉਣ ਦੀ ਕੋਸ਼ਿਸ਼ ਕੀਤੀ, ਪਰ ਉਹ ਨਹੀਂ ਮੰਨੀ।

ਫਿਰ ਅਧਿਕਾਰੀ ਰੱਸੀ ਸਹਾਰੇ ਉੱਪਰ ਚੜ੍ਹੇ ਅਤੇ ਔਰਤਾਂ ਨੂੰ ਜ਼ਬਰੀ ਉਤਾਰਿਆ। ਬਾਅਦ 'ਚ ਉਸ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ।  ਸਟੈਚੂ ਆਫ਼ ਲਿਬਰਟੀ ਦੀ ਉਚਾਈ 305.6 ਫ਼ੁਟ ਹੈ। ਔਰਤ 200 ਫ਼ੁਟ ਉੱਪਰ ਤਕ ਚੜ੍ਹ ਗਈ ਸੀ। ਇਸ ਔਰਤ ਦਾ ਨਾਂ ਥੈਰੇਸਾ ਪੈਟ੍ਰਿਕਾ ਓਕੋਮੋ ਹੈ। ਥੈਰੇਸਾ ਰਾਈਜ਼ ਐਂਡ ਰੇਸਿਸਟ ਗਰੁੱਪ ਨਾਲ ਜੁੜੀ ਹੈ। ਇਹ ਗਰੁੱਪ ਟਰੰਪ ਸਰਕਾਰ ਦੀ ਇਮੀਗ੍ਰੇਸ਼ਨ ਨੀਤੀ ਦਾ ਵਿਰੋਧ ਕਰ ਰਿਹਾ ਹੈ। ਬੁਧਵਾਰ ਨੂੰ ਉਸ ਨੇ ਇਕ ਰੈਲੀ ਦਾ ਆਯੋਜਨ ਕੀਤਾ ਸੀ। ਇਸੇ ਦੌਰਾਨ ਥੈਰੇਸਾ ਸਟੈਚੂ ਆਫ਼ ਲਿਬਰਟੀ 'ਤੇ ਚੜ੍ਹ ਗਈ। ਉਧਰ ਇਸ ਗਰੁੱਪ ਦਾ ਕਹਿਣਾ ਹੈ ਕਿ ਸਟੈਚੂ 'ਤੇ ਚੜ੍ਹਨਾ ਪ੍ਰਦਰਸ਼ਨ ਦਾ ਹਿੱਸਾ ਨਹੀਂ ਸੀ।

ਨਿਊਯਾਰਕ ਪੁਲਿਸ ਨੇ ਦਸਿਆ, ''ਔਰਤ ਨੂੰ ਹੇਠਾਂ ਉਤਾਰਨ ਲਈ 16 ਪੁਲਿਸ ਮੁਲਾਜ਼ਮਾਂ ਨੂੰ ਕਾਫ਼ੀ ਮਿਹਨਤ ਕਰਨੀ ਪਈ। ਸ਼ੁਰੂਆਤ 'ਚ ਉਸ ਨੇ ਸਾਡੀ ਮਦਦ ਨਹੀਂ ਕੀਤੀ, ਪਰ ਅਸੀ ਲਗਾਤਾਰ ਔਰਤ ਦੀਆਂ ਗੱਲਾਂ ਨੂੰ ਸੁਣਦੇ ਰਹੇ। ਪਹਿਲਾਂ ਉਸ ਨੇ ਛਾਲ ਮਾਰਨ ਦੀ ਧਮਕੀ ਦਿਤੀ, ਪਰ ਬਾਅਦ 'ਚ ਉਸ ਨੇ ਸਾਡੀ ਗੱਲ ਮੰਨ ਲਈ।'' ਤਕਰੀਬਨ 4 ਘੰਟੇ ਦੀ ਲਗਾਤਾਰ ਕੋਸ਼ਿਸ਼ ਤੋਂ ਬਾਅਦ ਪੁਲਿਸ ਇਸ ਔਰਤ ਨੂੰ ਹੇਠਾਂ ਉਤਾਰਨ 'ਚ ਸਫ਼ਲ ਹੋਈ। (ਪੀਟੀਆਈ)