Indian man sentenced to six years jail for duping women

ਬ੍ਰਿਟੇਨ ਵਿਚ ਛੇ ਔਰਤਾਂ ਨਾਲ ਧੋਖਾਧੜੀ ਦੇ ਮਾਮਲੇ ਵਿਚ ਦੋਸ਼ੀ ਪਾਏ ਗਏ ਭਾਰਤੀ ਮੂਲ ਦੇ ਇਕ ਵਿਅਕਤੀ ਨੂੰ ਛੇ ਸਾਲ ਅਤੇ ਇਕ ਮਹੀਨੇ ਦੀ ਜੇਲ ਦੀ ਸਜ਼ਾ ਸੁਣਾਈ ਗਈ ਹੈ। ਬ੍ਰਿਟੇਨ ਪੁਲਿਸ ਨੇ ਇਸ ਵਿਅਕਤੀ ਨੂੰ ‘ਧੋਖੇਬਾਜ਼ ਪ੍ਰੇਮੀ’ ਦਾ ਨਾਂਅ ਦਿੱਤਾ ਹੈ। ਇਹ ਵਿਅਕਤੀ ਔਰਤਾਂ ਨੂੰ ਆਨਲਾਈਨ ਮਿਲਦਾ ਸੀ ਅਤੇ ਬਿਨਾਂ ਕਿਸੇ ਹੋਂਦ ਵਾਲੀਆਂ ਕੰਪਨੀਆਂ ਵਿਚ ਉਹਨਾਂ ਨੂੰ ਨਿਵੇਸ਼ ਦਾ ਲਾਲਚ ਦਿੰਦਾ ਸੀ। ਕਿੰਗਡਮ ਕ੍ਰਾਉਨ ਕੋਰਟ ਨੇ ਧੋਖਾਧੜੀ ਦੇ ਮਾਮਲਿਆਂ ਵਿਚ ਸਕਾਟਲੈਂਡ ਯਾਰਡ ਦੀ ਚਾਰ ਸਾਲਾਂ ਤੋਂ ਚੱਲ ਰਹੀ ਜਾਂਚ ਦੇ ਅਧਾਰ ‘ਤੇ ਪੂਰਬੀ ਲੰਡਨ ਨਿਵਾਸੀ ਕੇਯੁਰ ਵਿਆਸ ਨੂੰ ਬੁੱਧਵਾਰ ਨੂੰ ਇਹ ਸਜ਼ਾ ਸੁਣਾਈ ਗਈ।

ਮੈਟਰੋਪੋਲੀਟਨ ਪੁਲਿਸ ਨੂੰ ਪਤਾ ਲੱਗਿਆ ਕਿ ਇਸ ਵਿਅਕਤੀ ਨੇ ਛੇ ਅਲੱਗ ਅਲੱਗ ਔਰਤਾਂ ਨਾਲ ਅੱਠ ਲੱਖ ਪੌਂਡ ਤੋਂ ਜ਼ਿਆਦਾ ਦੀ ਧੋਖਾਧੜੀ ਕੀਤੀ ਸੀ। ਮੈਟਰੋਪੋਲੀਟਨ ਪੁਲਿਸ ਦੇ ਕੇਂਦਰੀ ਸਪੈਸ਼ਲਿਸਟ ਕਮਾਂਡ ਜਾਂਚਕਰਤਾ ਡਿਟੈਕਟਿਵ ਕਾਂਸਟੇਬਲ ਐਂਡੀ ਚੈਪਮੈਨ ਨੇ ਕਿਹਾ ਕਿ ਇਹ ਵਿਅਕਤੀ ਉਹਨਾਂ ਛੇ ਔਰਤਾਂ ਦਾ ਭਰੋਸਾ ਜਿੱਤਦਾ ਸੀ ਅਤੇ ਫਿਰ ਉਹਨਾਂ ਦੇ ਇਸੇ ਭਰੋਸੇ ਦਾ ਫਾਇਦਾ ਚੁੱਕ ਕੇ ਉਹਨਾਂ ਨੂੰ ਬਿਨਾਂ ਕਿਸੇ ਹੋਂਦ ਵਾਲੀਆਂ ਕੰਪਨੀਆਂ ਵਿਚ ਨਿਵੇਸ਼ ਕਰਨ ਲਈ ਕਹਿੰਦਾ ਸੀ।

ਮੈਟਰੋਪੋਲੀਟਨ ਪੁਲਿਸ ਨੇ ਅਕਤੂਬਰ 2014 ਵਿਚ ਇਹਨਾਂ ਮਾਮਲਿਆਂ ਦੀ ਜਾਂਚ ਸ਼ੁਰੂ ਕੀਤੀ ਸੀ। ਅਦਾਲਤ ਨੂੰ ਦੱਸਿਆ ਗਿਆ ਸੀ ਕਿ ਕਥਿਤ ਦੋਸ਼ੀ ਔਰਤਾਂ ਨੂੰ ਅਪਣੇ ਪਿਆਰ ਦੇ ਜਾਲ ਵਿਚ ਫਸਾ ਕੇ ਉਹਨਾਂ ਨੂੰ ਯਕੀਨ ਦਿਵਾਉਂਦਾ ਸੀ ਕਿ ਉਹ ਇਕ ਪ੍ਰਭਾਵਸ਼ਾਲੀ ਵਿਅਕਤੀ ਹੈ ਜੋ ਵਿੱਤੀ ਖੇਤਰ ਵਿਚ ਕੰਮ ਕਰਦਾ ਹੈ। ਵਿਆਸ ਨੇ ਇਸੇ ਸਾਲ ਮਾਰਚ ਵਿਚ ਚਾਰ ਮਾਮਲਿਆਂ ‘ਚ ਅਪਣਾ ਜ਼ੁਰਮ ਕਬੂਲਿਆ ਹੈ ਅਤੇ ਦੋ ਮਾਮਲਿਆਂ ਵਿਚ ਇਲਜ਼ਾਮ ਉਸਦੀ ਫਾਇਲ ਦੇ ਅਧਾਰ ‘ਤੇ ਤੈਅ ਹੋਣਗੇ।