ਆਕਲੈਂਡ (ਹਰਜਿੰਦਰ ਸਿੰਘ ਬਸਿਆਲਾ) : ਵਲਿੰਗਟਨ ਸ਼ਹਿਰ ਤੋਂ ਲਗਪਗ 21 ਕਿਲੋਮੀਟਰ ਦੂਰ ਸ਼ਹਿਰ ਪੋਰੀਰੁਆ ਦੀ ਪੁਲਿਸ ਨੂੰ ਉਸ ਵੇਲੇ ਇਕ ਪੰਜਾਬੀ ਨੌਜਵਾਨ ਸੁਖਵਿੰਦਰ ਸਿੰਘ ਵਾਸੀ ਪਿੰਡ ਖ਼ੁਰਦਪੁਰ, ਨੇੜੇ ਆਦਮਪੁਰ (ਪੁੱਤਰ ਇਕਬਾਲ ਸਿੰਘ ਤੇ ਰੇਸ਼ਮ ਕੌਰ) ਨੂੰ ਦਾਦ ਦੇਣੀ ਪਈ ਜਦੋਂ ਉਸ ਨੇ ਪਿਛਲੇ ਮਹੀਨੇ ਨੇੜੇ ਹੀ ਇਕ ‘ਤਤਾਹੀ’ ਨਾਂਅ ਦੇ ਬੀਚ ਉਤੇ ਇਕ ਡੁੱਬ ਰਹੇ 34-35 ਸਾਲਾ ਵਿਅਕਤੀ ਨੂੰ ਅਪਣੀ ਜਾਨ ’ਤੇ ਖੇਡ ਕੇ ਬਚਾ ਲਿਆ। 

ਘਟਨਾ ਵੇਲੇ ਸੁਖਵਿੰਦਰ ਸਿੰਘ ਅਤੇ ਉਸ ਦੀ ਪਤਨੀ ਓਰੀਨਾਹ ਕੌਰ ਉਸ ਵੇਲੇ ਬੀਚ ਉਤੇ ਗਏ ਹੋਏ ਸਨ। ਠੰਡ ਦਾ ਮੌਸਮ ਸੀ ਅਤੇ ਉਹ ਕਾਰ ਵਿਚ ਬੈਠ ਕੇ ਹੀ ਕੁੱਝ ਖਾ-ਪੀ ਰਹੇ ਸਨ। ਐਨੇ ਨੂੰ ਇਕ ਵਿਅਕਤੀ ਜੋ ਨਸ਼ੇ ਦੀ ਹਾਲਤ ਵਿਚ ਸੀ, ਟਹਿਲਦਾ ਹੋਇਆ ਸਮੁੰਦਰ ਵਿਚ ਵੜ ਗਿਆ, ਛੱਲਾਂ ਦਾ ਪੂਰਾ ਜ਼ੋਰ ਸੀ, ਉਹ ਵਿਅਕਤੀ ਕੁੱਝ ਮਿੰਟ ਹੀ ਪਾਣੀ ’ਚ ਤੈਰਿਆ ਅਤੇ ਫਿਰ ਸਮੁੰਦਰੀ ਲਹਿਰਾਂ ਨਾਲ ਉਪਰ ਥੱਲੇ ਹੋਣ ਲੱਗਾ।

ਸੁਖਵਿੰਦਰ ਸਿੰਘ ਸਾਹਮਣੇ ਬੈਠਾ ਹੋਣ ਕਰ ਕੇ ਇਹ ਸਾਰਾ ਕੁੱਝ ਵੇਖ ਰਿਹਾ ਸੀ ਕਿਉਂਕਿ ਉਸ ਨੂੰ ਪਹਿਲਾਂ ਹੀ ਥੋੜੀ ਸ਼ੱਕ ਹੋ ਗਈ ਸੀ, ਉਸ ਨੇ ਤੁਰਤ ਅਪਣੀ ਪਤਨੀ ਨੂੰ ਕਿਹਾ ਕਿ ਤੂੰ ਪੁਲਿਸ ਨੂੰ ਫ਼ੋਨ ਕਰ, ਮੈਂ ਉਸ ਨੂੰ ਬਚਾਉਣ ਦੀ ਕੋਸ਼ਿਸ ਕਰਦਾ। ਅਪਣੇ ਬੂਟ ਆਦਿ ਉਤਾਰ ਕੇ ਉਹ ਲੱਕ-ਲੱਕ ਪੱਧਰ ਦੇ ਪਾਣੀ ਤਕ ਸਮੁੰਦਰ ’ਚ ਚਲਾ ਗਿਆ ਅਤੇ ਉਸ ਨੂੰ ਕਿਸੀ ਤਰ੍ਹਾਂ ਫੜ ਕੇ ਬਚਾ ਲਿਆ।

 ਇਹ ਵੀ ਪੜ੍ਹੋ:  ਫ਼ੇਸਬੁਕ, ਟਵਿੱਟਰ ਅਤੇ ਗੂਗਲ ਵਿਰੁਧ ਮੁਕੱਦਮਾ ਦਰਜ ਕਰਨਗੇ ਟਰੰਪ

ਉਸ ਨੌਜਵਾਨ ਨੇ ਮੂੰਹ ’ਤੇ ਕਪੜਾ ਬੰਨਿ੍ਹਆ ਹੋਇਆ ਸੀ, ਜਿਸ ਨੂੰ ਸੁਖਵਿੰਦਰ ਨੇ ਉਤਾਰ ਦਿਤਾ ਤਾਂ ਕਿ ਸਾਹ ਸੌਖਾ ਆ ਸਕੇ। ਇਸ ਭਾਰੀ ਭਰਕਮ ਬੰਦੇ ਨੂੰ ਉਹ ਹੌਲੀ-ਹੌਲੀ ਕਰਕੇ ਕੰਢੇ ਉਤੇ ਲੈ ਆਇਆ। ਉਸ ਨੇ ਕੁੱਝ ਲੋਕਾਂ ਨੂੰ ਆਵਾਜ਼ ਮਾਰੀ ਪਰ ਉਹ ਵੀਡੀਉ ਤਾਂ ਜ਼ਰੂਰ ਬਣਾਉਣ ਲੱਗ ਪਏ ਪਰ ਪਾਣੀ ਅੰਦਰ ਕੋਈ ਨਾ ਆਇਆ। ਕੰਢੇ ਉਤੇ ਉਸ ਵਿਅਕਤੀ ਦੇ ਆਉਣ ਵੇਲੇ ਕੁੱਝ ਲੋਕ ਜ਼ਰੂਰ ਸਹਾਇਤਾ ਲਈ ਪਹੁੰਚੇ। ਐਨੇ ਨੂੰ ਪੁਲਿਸ ਅਤੇ ਐਂਬੂਲੈਂਸ ਪਹੁੰਚ ਗਈ ਜਿਨ੍ਹਾਂ ਆ ਕੇ ਸੀ.ਪੀ.ਆਰ ਦਿਤਾ ਅਤੇ ਉਸ ਨੂੰ ਹਸਪਤਾਲ ਲੈ ਗਏ। 

ਇਸ ਨੌਜਵਾਨ ਦੀ ਇਸ ਬਹਾਦਰੀ ਭਰੇ ਹੌਂਸਲੇ ਦੀ ਅਤੇ ਕਿਸੀ ਅਣਜਾਣ ਵਿਅਕਤੀ ਦੀ ਜਾਨ ਬਚਾਉਣ ਦੇ ਲਈ ਪੁਲਿਸ ਨੇ ਉਸ ਨਾਲ ਰਾਬਤਾ ਕਾਇਮ ਰੱਖਿਆ ਅਤੇ ਰਸਮੀ ਬੇਨਤੀ ਕੀਤੀ ਕਿ ਉਹ ਉਸਨੂੰ ਵਿਸ਼ੇਸ਼ ਪ੍ਰਸੰਸ਼ਾ ਪੱਤਰ ਦੇਣਾ ਚਾਹੁੰਦੇ ਹਨ। ਐਕਟਿੰਗ ਏਰੀਆ ਕਮਾਂਡਰ ਇੰਸਪੈਕਟਰ ਨਿੱਕ ਥੌਮ ਨੇ ਵਿਸ਼ੇਸ਼ ਤੌਰ ’ਤੇ ਇਕ ਸੰਖੇਪ ਸਮਾਗਮ ਕਰ ਕੇ ਇਸ ਨੌਜਵਾਨ ਨੂੰ ਪ੍ਰਸੰਸ਼ਾ ਪੱਤਰ ਭੇਟ ਕੀਤਾ ਤੇ ਪੁਲਿਸ ਟੀਮ ਨੇ ਫ਼ੋਟੋ ਖਿਚਵਾਈ।