ਆਸਟਰੇਲੀਆ ਦੇ ਬਾਜ਼ਾਰਾਂ ’ਚ ਆਵੇਗਾ ਅੱਖਾਂ ’ਚ ਹੰਝੂ ਨਾ ਲਿਆਉਣ ਵਾਲਾ ਪਿਆਜ਼

ਕੈਨਬਰਾ: ਆਸਟ੍ਰੇਲੀਆਈ ਦੀ ਵਿਸ਼ਾਲ ਸੁਪਰਮਾਰਕੀਟ ਕੰਪਨੀ ਵੂਲਵਰਥਸ ਨੇ ਸੋਮਵਾਰ ਨੂੰ ਐਲਾਨ ਕੀਤਾ ਕਿ ਦੇਸ਼ ’ਚ ‘ਅੱਥਰੂ ਰਹਿਤ’ ਪਿਆਜ਼ਾਂ ਦਾ ਪਹਿਲਾ ਬੈਚ ਬੁਧਵਾਰ ਤੋਂ ਸਤੰਬਰ ਤਕ ਨਿਊ ਸਾਊਥ ਵੇਲਜ਼, ਵਿਕਟੋਰੀਆ ਅਤੇ ਆਸਟ੍ਰੇਲੀਆਈ ਰਾਜਧਾਨੀ ਖੇਤਰ ਦੇ ਸਟੋਰਾਂ ’ਚ ਵਿਕਰੀ ਲਈ ਆ ਜਾਵੇਗਾ।

ਵੂਲਵਰਥਸ ਵਲੋਂ ਜਾਰੀ ਇਕ ਬਿਆਨ ’ਚ ਕਿਹਾ ਗਿਆ ਹੈ, ‘‘ਪਿਆਜ਼ ਦੀ ਵਿਲੱਖਣ ਕਿਸਮ ਅਪਣੇ ਨਾਂ ਵਾਂਗ ਹੀ ਕੰਮ ਕਰਦੀ ਹੈ। ਇਹ ਇਕ ਅਜਿਹਾ ਪਿਆਜ਼ ਹੈ ਜਿਸ ਨੂੰ ਕੱਟਣ ’ਤੇ ਤੁਹਾਡੀਆਂ ਅੱਖਾਂ ’ਚ ਹੰਝੂ ਨਹੀਂ ਆ ਸਕਦੇ।’’

ਬਿਆਨ ਦੇ ਅਨੁਸਾਰ, ਅੱਥਰੂ ਰਹਿਤ ਇਸ ਕਿਸਮ ਵਿਚ ਘੱਟ ਕੁਦਰਤੀ ਰਸਾਇਣ ਅਤੇ ਪਾਚਕ ਹੁੰਦੇ ਹਨ, ਜਿਨ੍ਹਾਂ ਨੂੰ ਅਸਥਿਰ ਮਿਸ਼ਰਣ ਵੀ ਕਿਹਾ ਜਾਂਦਾ ਹੈ, ਜੋ ਅੱਖਾਂ ’ਚ ਹੰਝੂ ਅਤੇ ਜਲਣ ਦਾ ਕਾਰਨ ਬਣ ਸਕਦੇ ਹਨ।

ਇਸ ਤੋਂ ਇਲਾਵਾ, ਇਹ ਮਿਸ਼ਰਣ ਪਿਆਜ਼ਾਂ ਦੀ ਕਟਾਈ ਤੋਂ ਬਾਅਦ ਘਟਦੇ ਰਹਿੰਦੇ ਹਨ, ਜਦਕਿ ਨਿਯਮਤ ਪਿਆਜ਼ਾਂ ’ਚ ਇਹ ਮਿਸ਼ਰਣ ਸਮੇਂ ਦੇ ਨਾਲ ਵਧਦੇ ਹਨ, ਜਿਸ ਦਾ ਮਤਲਬ ਹੈ ਕਿ ਪੁਰਾਣੇ ਪਿਆਜ਼ ਕੱਟਣ ’ਤੇ ਅੱਖਾਂ ’ਚੋਂ ਵੱਧ ਅੱਥਰੂ ਨਿਕਲਦੇ ਹਨ।

ਵੂਲਵਰਥਸ ਨੇ ਕਿਹਾ ਕਿ ਹੰਝੂ ਰਹਿਤ ਪਿਆਜ਼ਾਂ ਨੂੰ ਕੁਦਰਤੀ ਤਰੀਕਿਆਂ ਦੀ ਵਰਤੋਂ ਕਰ ਕੇ ਦਹਾਕਿਆਂ ਤੋਂ ਵਿਕਸਤ ਕੀਤਾ ਜਾ ਰਿਹਾ ਸੀ, ਜਿਸ ਵਿਚ ਮੌਜੂਦਾ ਪਿਆਜ਼ ਦੀਆਂ ਕਿਸਮਾਂ ਦਾ ਦੋਗਲਾਕਰਨ ਸ਼ਾਮਲ ਹੈ, ਅਤੇ ਉਹ ਨਿਯਮਤ ਭੂਰੇ ਪਿਆਜ਼ਾਂ ਨਾਲੋਂ ਘੱਟ ਤਿੱਖੇ ਪਰ ਥੋੜ੍ਹਾ ਮਿੱਠੇ ਹੁੰਦੇ ਹਨ।