ਸਰੀ - ਕੈਨੇਡਾ ਦੇ ਸਰੀ ਵਿਖੇ ਆਰਸੀਐਮਪੀ ਨੇ ਮੰਗਲਵਾਰ ਨੂੰ ਇਹ ਜਾਣਕਾਰੀ ਦਿੱਤੀ ਕਿ ਅਮਰਦੀਪ ਸਿੰਘ ਰਾਏ - ਜੋ ਜਿਨਸੀ ਸ਼ੋਸ਼ਣ, ਹਥਿਆਰ ਨਾਲ ਹਮਲਾ ਕਰਨ ਅਤੇ ਕਾਨੂੰਨੀ ਅਧਿਕਾਰ ਤੋਂ ਬਿਨ੍ਹਾਂ ਇੱਕ ਵਿਅਕਤੀ ਨੂੰ ਕੈਦ ਕਰਨ ਸਮੇਤ 17 ਦੋਸ਼ਾਂ ਵਿਚ ਲੋੜੀਂਦਾ ਸੀ ਉਸ ਨੂੰ ਫਰੰਟਲਾਈਨ ਅਫਸਰਾਂ ਦੁਆਰਾ ਉਸ ਦੇ ਬਕਾਇਆ ਵਾਰੰਟਾਂ 'ਤੇ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ। 

28 ਅਪ੍ਰੈਲ 2021 ਨੂੰ ਅਮਰਦੀਪ ਰਾਏ ਨੂੰ ਸਰੀ RCMP ਸਟ੍ਰਾਈਕ ਫੋਰਸ ਟਾਰਗੇਟ ਟੀਮ (SFTT) ਦੁਆਰਾ ਅਗਸਤ 2019 ਦੀ ਜਾਂਚ ਨਾਲ ਸਬੰਧਤ ਇੱਕ ਬਕਾਇਆ ਵਾਰੰਟ ਤਹਿਤ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਅਮਰਦੀਪ ਨੂੰ ਅਦਾਲਤਾਂ ਨੇ 7 ਮਈ 2021 ਨੂੰ ਸ਼ਰਤਾਂ ਸਮੇਤ ਰਿਹਾਅ ਕਰ ਦਿੱਤਾ ਸੀ। ਇਹ ਦੋਸ਼ ਲਗਾਇਆ ਗਿਆ ਸੀ ਕਿ ਰਾਏ ਅਗਲੀ ਅਦਾਲਤ ਦੀ ਤਾਰੀਖ਼ ਲਈ ਪੇਸ਼ ਹੋਣ ਵਿਚ ਅਸਫਲ ਰਿਹਾ ਅਤੇ ਇਸ ਲਈ ਉਸ ਦੀ ਗ੍ਰਿਫ਼ਤਾਰੀ ਲਈ ਵਾਰੰਟ ਜਾਰੀ ਕੀਤਾ ਗਿਆ ਸੀ। 20 ਜਨਵਰੀ 2022 ਨੂੰ ਸਰੀ RCMP ਨੇ ਰਾਏ ਦਾ ਪਤਾ ਲਗਾਉਣ ਲਈ ਜਨਤਾ ਦੀ ਸਹਾਇਤਾ ਮੰਗੀ ਸੀ।

ਅਕਤੂਬਰ 2022 ਵਿਚ ਰਾਏ ਨੂੰ ਬੋਲੋ ਪ੍ਰੋਗਰਾਮ ਦੁਆਰਾ ਪੂਰੇ ਕੈਨੇਡਾ ਵਿਚ ਲੋੜੀਂਦੇ ਚੋਟੀ ਦੇ 25 ਵਿਅਕਤੀਆਂ ਵਿਚ ਸ਼ਾਮਲ ਕੀਤਾ ਗਿਆ ਸੀ। 8 ਜਨਵਰੀ 2023 ਨੂੰ ਸਰੀ RCMP ਫਰੰਟਲਾਈਨ ਅਫ਼ਸਰ ਬਕਾਇਆ ਵਾਰੰਟਾਂ ਵਾਲੇ ਵਿਅਕਤੀਆਂ ਨੂੰ ਲੱਭਣ ਲਈ ਸਰਗਰਮੀ ਨਾਲ ਕੰਮ ਕਰ ਰਹੇ ਸਨ। ਜਾਂਚ ਦੌਰਾਨ ਅਧਿਕਾਰੀਆਂ ਨੇ ਇਹ ਪੁਸ਼ਟੀ ਕੀਤੀ ਕਿ ਅਮਰਦੀਪ ਰਾਏ 64 ਐਵੇਨਿਊ ਦੇ 17400-ਬਲਾਕ ਵਿਚ ਇੱਕ ਰਿਹਾਇਸ਼ ਦੇ ਅੰਦਰ ਸੀ। ਇਸ ਮਗਰੋਂ ਰਿਹਾਇਸ਼ ਨੂੰ ਸੁਰੱਖਿਅਤ ਕੀਤਾ ਗਿਆ ਅਤੇ ਰਿਹਾਇਸ਼ ਵਿਚ ਦਾਖਲ ਹੋਣ ਅਤੇ ਉਸ ਨੂੰ ਗ੍ਰਿਫ਼ਤਾਰ ਕਰਨ ਲਈ ਫੀਨੀ ਵਾਰੰਟ (ਇੱਕ ਕਿਸਮ ਦਾ ਗ੍ਰਿਫ਼ਤਾਰੀ ਵਾਰੰਟ ਹੈ

 ਜੋ ਪੁਲਸ ਨੂੰ ਕਿਸੇ ਦੀ ਜਾਇਦਾਦ ਅਤੇ ਘਰ ਜਾਂ ਕਾਰੋਬਾਰ ਵਿੱਚ ਉਸ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕਰਨ ਦੀ ਸ਼ਕਤੀ ਦਿੰਦਾ ਹੈ, ਜਿਸਦਾ ਨਾਮ ਵਾਰੰਟ ਵਿਚ ਹੈ) ਦੀ ਮੰਗ ਕੀਤੀ ਗਈ ਸੀ। ਲੋਅਰ ਮੇਨਲੈਂਡ ਏਕੀਕ੍ਰਿਤ ਐਮਰਜੈਂਸੀ ਰਿਸਪਾਂਸ ਟੀਮ ਨੇ ਵਾਰੰਟ ਨੂੰ ਲਾਗੂ ਕਰਨ ਵਿਚ ਸਹਾਇਤਾ ਕੀਤੀ ਅਤੇ ਰਾਏ ਨੂੰ ਬਿਨਾਂ ਕਿਸੇ ਘਟਨਾ ਦੇ ਪੁਲਿਸ ਹਿਰਾਸਤ ਵਿਚ ਲੈ ਲਿਆ ਗਿਆ। ਉਸ ਨੂੰ ਸਰੀ RCMP ਸੈੱਲਾਂ ਵਿਚ ਲਿਜਾਇਆ ਗਿਆ ਅਤੇ ਅਦਾਲਤ ਵਿਚ ਉਸ ਦੀ ਅਗਲੀ ਪੇਸ਼ੀ ਦੀ ਉਡੀਕ ਕੀਤੀ ਜਾ ਰਹੀ ਹੈ।