Pakistan News : ਕਰਾਚੀ ਦੀਆਂ ਸੜਕਾਂ 'ਤੇ ਆਏ 4 ਲੱਖ ਪੇਸ਼ੇਵਰ ਭਿਖਾਰੀ, ਬਾਜ਼ਾਰ, ਟ੍ਰੈਫਿਕ ਸਿਗਨਲਾਂ 'ਤੇ ਲਾਇਆ ਡੇਰਾ

Pakistan News : ਪਾਕਿਸਤਾਨ 'ਚ ਈਦ ਦੇ ਮੌਕੇ 'ਤੇ ਜਿੱਥੇ ਇਕ ਪਾਸੇ ਬਾਜ਼ਾਰਾਂ 'ਚ ਰੌਣਕਾਂ ਲੱਗੀਆਂ ਹੋਈਆਂ ਹਨ, ਉਥੇ ਹੀ ਦੂਜੇ ਪਾਸੇ ਲੋਕਾਂ ਨੂੰ ਵੱਖ-ਵੱਖ ਪਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਦੇਸ਼ ਦੀ ਆਰਥਿਕ ਰਾਜਧਾਨੀ ਕਰਾਚੀ ਵਿੱਚ ਹਜ਼ਾਰਾਂ ਭਿਖਾਰੀਆਂ ਨੇ ਡੇਰੇ ਲਾਏ ਹੋਏ ਹਨ। ਲੱਖਾਂ ਦੀ ਗਿਣਤੀ ਵਿੱਚ ਆਏ ਇਹ ਭਿਖਾਰੀ ਸ਼ਹਿਰ ਦੇ ਭੀੜ ਵਾਲੇ ਬਾਜ਼ਾਰਾਂ, ਮੁੱਖ ਸੜਕਾਂ, ਟਰੈਫਿਕ ਸਿਗਨਲਾਂ, ਸ਼ਾਪਿੰਗ ਮਾਲਾਂ ਅਤੇ ਮਸਜਿਦਾਂ ਦੇ ਬਾਹਰ ਹਰ ਪਾਸੇ ਨਜ਼ਰ ਆ ਰਹੇ ਹਨ।

ਅਜਿਹੇ ਸਮੇਂ ਵਿਚ ਜਦੋਂ ਪਾਕਿਸਤਾਨ ਵਿਚ ਤੇਲ ਅਤੇ ਖਾਣ-ਪੀਣ ਦੀਆਂ ਵਸਤੂਆਂ ਦੀਆਂ ਕੀਮਤਾਂ ਅਸਮਾਨ ਨੂੰ ਛੂਹ ਰਹੀਆਂ ਹਨ, ਲੋਕ ਇਨ੍ਹਾਂ ਪੇਸ਼ੇਵਰ ਭਿਖਾਰੀਆਂ ਤੋਂ ਤੰਗ ਆ ਚੁੱਕੇ ਹਨ, ਜੋ ਬਾਜ਼ਾਰਾਂ ਤੋਂ ਲੈ ਕੇ ਮਸਜਿਦਾਂ, ਮਾਲਾਂ, ਸੜਕਾਂ ਤੱਕ ਹਰ ਪਾਸੇ ਦਿਖਾਈ ਦੇ ਰਹੇ ਹਨ।

ਕਰਾਚੀ 'ਚ 3 ਤੋਂ 4 ਲੱਖ ਭਿਖਾਰੀ ਆਉਂਦੇ ਹਨ

ਦਾ ਨਿਊਜ਼ ਇੰਟਰਨੈਸ਼ਨਲ ਅਖਬਾਰ ਨੇ ਕਰਾਚੀ ਦੇ ਐਡੀਸ਼ਨਲ ਇੰਸਪੈਕਟਰ ਜਨਰਲ (ਏਆਈਜੀ) ਇਮਰਾਨ ਯਾਕੂਬ ਮਿਨਹਾਸ ਦੇ ਹਵਾਲੇ ਨਾਲ ਕਿਹਾ ਕਿ ਈਦ ਦੇ ਮੌਕੇ 'ਤੇ ਰਮਜ਼ਾਨ ਦੇ ਮਹੀਨੇ ਦੌਰਾਨ ਲਗਭਗ 3 ਤੋਂ 4 ਲੱਖ ਪੇਸ਼ੇਵਰ ਭਿਖਾਰੀ ਕਰਾਚੀ ਵਰਗੇ ਮਹਾਨਗਰਾਂ ਵਿੱਚ ਆਏ ਹਨ। ਮਿਨਹਾਸ ਨੇ ਕਿਹਾ ਕਿ ਭਿਖਾਰੀ ਅਤੇ ਅਪਰਾਧੀ ਬੰਦਰਗਾਹ ਵਾਲੇ ਸ਼ਹਿਰ ਕਰਾਚੀ ਨੂੰ ਇਕ ਵੱਡੇ ਬਾਜ਼ਾਰ ਵਜੋਂ ਦੇਖਦੇ ਹਨ। ਇਹ ਭਿਖਾਰੀ ਅਤੇ ਅਪਰਾਧੀ ਸਿੰਧ, ਬਲੋਚਿਸਤਾਨ ਅਤੇ ਦੇਸ਼ ਦੇ ਹੋਰ ਹਿੱਸਿਆਂ ਤੋਂ ਕਰਾਚੀ ਆਉਂਦੇ ਹਨ।

ਉਨ੍ਹਾਂ ਨੇ ਮੰਗਲਵਾਰ ਨੂੰ ਜਾਰੀ ਬਿਆਨ 'ਚ ਕਿਹਾ ਕਿ ਅਸੀਂ ਰਵਾਇਤੀ ਤਰੀਕਿਆਂ ਨਾਲ ਅਪਰਾਧਾਂ ਦਾ ਪਤਾ ਨਹੀਂ ਲਗਾ ਸਕਦੇ। ਉਨ੍ਹਾਂ ਨੇ ਅਧਿਕਾਰੀਆਂ ਨੂੰ ਅਪੀਲ ਕੀਤੀ ਕਿ ਉਹ ਅਪਰਾਧੀਆਂ ਦਾ ਪਤਾ ਲਗਾਉਣ ਅਤੇ ਉਨ੍ਹਾਂ 'ਤੇ ਨਜ਼ਰ ਰੱਖਣ ਲਈ ਸੂਬਾਈ ਰਾਜਧਾਨੀ ਵਿੱਚ ਹੋਰ ਕੈਮਰੇ ਲਗਾਉਣ।

ਜੀਓ ਨਿਊਜ਼ ਮੁਤਾਬਕ ਰਮਜ਼ਾਨ ਦੇ ਮਹੀਨੇ ਕਰਾਚੀ ਵਿੱਚ 6,780 ਅਪਰਾਧਿਕ ਘਟਨਾਵਾਂ ਵਾਪਰੀਆਂ, ਜਿਨ੍ਹਾਂ ਵਿੱਚ 20 ਵਾਹਨ ਖੋਹੇ ਗਏ ਅਤੇ 130 ਤੋਂ ਵੱਧ ਚੋਰੀ ਹੋਏ। ਪਾਕਿਸਤਾਨ ਦੇ ਮਨੁੱਖੀ ਅਧਿਕਾਰ ਕਮਿਸ਼ਨ ਦੇ ਅਨੁਸਾਰ, ਕਰਾਚੀ ਵਿੱਚ ਅਧਿਕਾਰੀਆਂ ਨੇ ਪਿਛਲੇ ਸਾਲ ਸਟ੍ਰੀਟ ਕ੍ਰਾਈਮ ਦੀਆਂ ਹਜ਼ਾਰਾਂ ਘਟਨਾਵਾਂ ਦਰਜ ਕੀਤੀਆਂ, ਜਿਨ੍ਹਾਂ ਵਿੱਚ ਸੌ ਤੋਂ ਵੱਧ ਲੋਕ ਮਾਰੇ ਗਏ ਸਨ। ਕਮਿਸ਼ਨ ਨੇ ਇਹ ਵੀ ਖੁਲਾਸਾ ਕੀਤਾ ਕਿ ਚਾਲੂ ਮਹੀਨੇ ਦੀ ਪਹਿਲੀ ਤਿਮਾਹੀ ਵਿੱਚ ਵੀ ਇਹੀ ਪੈਟਰਨ ਦੇਖਿਆ ਗਿਆ ਸੀ।