ਪੱਤਕਕਾਰ ਗੁਰਮੀਤ ਸਿੰਘ ਵਾਲੀਆ ਮੁੜ ਬਣੇ ਦੋ ਸਾਲ ਲਈ ਪ੍ਰਧਾਨ

ਪਰਥ, 11 ਮਈ (ਪਿਆਰਾ ਸਿੰਘ ਨਾਭਾ): ਸੰਸਥਾ ਇੰਡੀਅਨ ਆਸਟ੍ਰੇਲੀਅਨ ਮੀਡੀਆ ਆਫ਼ ਸਾਊਥ ਆਸਟ੍ਰੇਲੀਆ ਦੇ ਨੁਮਾਇੰਦਿਆਂ ਦੀ ਅਗਲੇ ਦੋ ਸਾਲਾਂ ਲਈ ਚੋਣ ਕਰਨ ਦੇ ਸਬੰਧ ਵਿਚ ਚਾਹਤ ਰੈਸਟੋਰੈਂਟ ਐਡੀਲੇਡ ਵਿਖੇ ਹੋਈ ਵਿਸ਼ੇਸ਼ ਮੀਟਿੰਗ ਵਿਚ ਪੱਤਰਕਾਰ ਗੁਰਮੀਤ ਸਿੰਘ ਵਾਲੀਆ ਨੂੰ ਸਰਬਸੰਮਤੀ ਨਾਲ ਅਗਲੇ ਦੋ ਸਾਲ ਲਈ ਮੁੜ ਪ੍ਰਧਾਨ ਥਾਪਿਆ ਗਿਆ। ਮੀਟਿੰਗ ਵਿਚ ਪ੍ਰਿੰਟ ਅਤੇ ਇਲੈਕਟ੍ਰਾਨਿਕ ਮੀਡੀਆ ਨਾਲ ਸਬੰਧਿਤ ਪੱਤਰਕਾਰਾਂ ਨੇ ਸ਼ਮੂਲੀਅਤ ਕੀਤੀ।ਇਸ ਦੌਰਾਨ ਸੰਸਥਾ ਦੇ ਨੁਮਾਇੰਦਿਆਂ ਨੇ ਸੰਸਥਾ ਦੀਆਂ ਪਿਛਲੇ ਦੋ ਸਾਲਾ ਦੇ ਅਰਸੇ ਦੌਰਾਨ ਗਤੀਵਿਧੀਆਂ ਅਤੇ ਕਾਰਗੁਜ਼ਾਰੀ ਪ੍ਰਤੀ ਵਿਚਾਰ ਪੇਸ਼ ਕੀਤੇ ਅਤੇ ਸੰਸਥਾ ਵਲੋਂ ਭਵਿੱਖ ਵਿਚ ਪ੍ਰਿੰਟ ਅਤੇ ਇਲੈਕਟ੍ਰਾਨਿਕ ਮੀਡੀਆ ਦੇ ਮਿਆਰ ਨੂੰ ਬਰਕਰਾਰ ਰੱਖਣ ਲਈ ਉਲੀਕੀ ਗਈ ਵਿਸ਼ੇਸ ਰਣਨੀਤੀ ਪ੍ਰਤੀ ਇਕਜੁੱਟਤਾ ਨਾਲ ਸਹਿਯੋਗ ਦੇਣ ਉਤੇ ਸਹਿਮਤੀ ਜਤਾਈ ਗਈ ।

ਇਸ ਮੌਕੇ ਸੰਸਥਾ ਦੇ ਸਰਵਸੰਮਤੀ ਮੁੜ ਬਣੇ ਪ੍ਰਧਾਨ ਪੱਤਰਕਾਰ ਰੋਜ਼ਾਨਾ ਅਜੀਤ, ਗੁਰਮੀਤ ਸਿੰਘ ਵਾਲੀਆ ਦੀ ਪ੍ਰਧਾਨਗੀ ਹੇਠ ਸੰਸਥਾ ਦੇ ਬਾਕੀ ਅਹੁਦਿਆਂ ਦੀ ਚੋਣ ਕੀਤੀ ਗਈ ਜਿਸ ਵਿਚ ਮੀਤ ਪ੍ਰਧਾਨ ਟੀ ਵੀ ਜਰਨਲਿੱਸਟ ਦਲਜੀਤ ਸਿੰਘ ਬਖ਼ਸ਼ੀ,  ਜਨਰਲ ਸਕੱਤਰ ਪੰਜਾਬੀ ਟ੍ਰਿਬਿਊਨ ਦੇ ਪੱਤਰਕਾਰ ਬਚਿੱਤਰ ਕੋਹਾੜ , ਖ਼ਜ਼ਾਨਚੀ ਅਵਤਾਰ ਸਿੰਘ ਰਾਜੂ ਅਤੇ ਪੱਤਰਕਾਰ ਚੜਦੀ ਕਲਾ ਦਵਿੰਦਰ ਸਿੰਘ ਚਾਹਲ ਨੂੰ ਸਕੱਤਰ ਚੁਣਿਆ ਗਿਆ। ਇਸ ਮੌਕੇ ਪੱਤਰਕਾਰ ਭਾਈਚਾਰੇ ਵੱਲੋਂ ਸਮਾਜਿਕ , ਧਾਰਮਿਕ ਅਤੇ ਲੋਕ ਪੱਖੀ ਮਸਲਿਆਂ, ਮੁਸ਼ਕਿਲਾਂ ਭਾਰਤੀ ਭਾਈਚਾਰੇ ਦੀਆਂ ਸਿਆਸੀ ਤੇ ਸੱਭਿਆਚਾਰਕ ਗਤੀਵਿਧੀਆਂ ਨੂੰ ਬਿਨਾ ਕਿਸੇ ਮਤਾ ਭੇਦ ਤੋਂ ਨਿਰਪੱਖਤਾ ਨਾਲ ਪ੍ਰਕਾਸ਼ਤ ਕਰਨ 'ਤੇ ਸਹਿਮਤੀ ਕੀਤੀ ਗਈ ।