ਟੋਕੀਓ ਪੈਰਾ ਉਲੰਪਿਕਸ ‘ਚ ਦੇਸ਼ ਦਾ ਨਾਂਅ ਰੌਸ਼ਨ ਕਰੇਗਾ ਕੈਥਲ ਦਾ ਸਿੱਖ ਤੀਰਅੰਦਾਜ਼ ਹਰਵਿੰਦਰ ਸਿੰਘ
ਡੇਂਗੂ ਦਾ ਟੀਕਾ ਲਗਾਉਣ ਕਾਰਨ ਖ਼ਰਾਬ ਹੋਈਆਂ ਸਨ ਲੱਤਾਂ
ਨਵੀਂ ਦਿੱਲੀ - ਟੋਕੀਉ ਉਲੰਪਿਕਸ 2020 ਦੇ ਮੁੱਖ ਸਮਾਰੋਹ ਖ਼ਤਮ ਹੋ ਗਏ ਹੋਣ ਪਰ ਹਾਲੇ ਟੋਕੀਉ ਪੈਰਾ ਉਲੰਪਿਕਸ 2020 ਹੋਣਾ ਬਾਕੀ ਹੈ। ਇਨ੍ਹਾਂ ਖੇਡਾਂ ਦੀ ਸ਼ੁਰੂਆਤ ਆਉਂਦੀ 24 ਅਗਸਤ ਤੋਂ ਹੋਣੀ ਹੈ ਤੇ ਇਹ 5 ਸਤੰਬਰ ਤੱਕ ਚੱਲਣਗੀਆਂ। ਇਹਨਾਂ ਖੇਡਾਂ ਵਿਚ ਕੈਥਲ (ਹਰਿਆਣਾ) ਦੇ ਪਿੰਡ ਅਜੀਤਨਗਰ ਦਾ ਜੰਮਪਲ਼ ਤੀਰਅੰਦਾਜ਼ ਹਰਵਿੰਦਰ ਸਿੰਘ ਅਪਣੀ ਕਿਸਮਤ ਅਜਮਾਏਗਾ ਹਰਵਿੰਦਰ ਪੰਜਾਬੀ ਯੂਨੀਵਰਸਿਟੀ, ਪਟਿਆਲਾ ਤੋਂ ਪੀਐੱਚ.ਡੀ. ਕਰ ਰਿਹਾ ਹੈ
ਪਰ ਹਾਲ ਦੀ ਘੜੀ ਉਹ ਟੋਕੀਉ ਪੈਰਾ ਉਲੰਪਿਕਸ ਦੀਆਂ ਤਿਆਰੀਆਂ ਕਰ ਰਿਹਾ ਹੈ ਤੇ ਉਸ ਦੀ ਅੱਖ ਐਤਕੀਂ ਗੋਲਡ ਮੈਡਲ ’ਤੇ ਹੈ। ਬਚਪਨ ’ਚ ਹਰਵਿੰਦਰ ਸਿੰਘ ਜਦੋਂ ਹਾਲੇ ਸਿਰਫ਼ ਡੇਢ ਕੁ ਸਾਲ ਦਾ ਸੀ, ਤਦ ਉਸ ਨੂੰ ਡੇਂਗੂ ਹੋ ਗਿਆ ਸੀ। ਮਾਪੇ ਉਸ ਨੂੰ ਇੱਕ ਸਥਾਨਕ ਡਾਕਟਰ ਕੋਲ ਲੈ ਕੇ ਗਏ। ਉਸ ਨੇ ਜਿਵੇਂ ਹੀ ਡੇਂਗੂ ਦਾ ਇੰਜੈਕਸ਼ਨ ਲਾਇਆ, ਉਸ ਦੀਆਂ ਲੱਤਾਂ ਪੂਰੀ ਤਰ੍ਹਾਂ ਖੜ੍ਹ ਗਈਆਂ। ਇਸ ਲਈ ਉਹ ਹੁਣ ਸਹੀ ਤਰੀਕੇ ਨਾਲ ਚੱਲ ਨਹੀਂ ਸਕਦਾ।
ਜਦੋਂ ਹਰਵਿੰਦਰ ਸਿੰਘ ਵੱਡਾ ਹੋਇਆ, ਤਾਂ ਉਸ ਨੇ ਆਪਣੇ ਮਾਪਿਆਂ ਨੂੰ ਸਪੱਸ਼ਟ ਆਖ ਦਿੱਤਾ ਸੀ ਕਿ ਉਹ ਹੁਣ ਉਸ ਦੀਆਂ ਲੱਤਾਂ ਦੇ ਇਲਾਜ ’ਤੇ ਫ਼ਿਜ਼ੂਲ ਪੈਸਾ ਤੇ ਸਮਾਂ ਬਰਬਾਦ ਨਾ ਕਰਨ; ਕਿਉਂਕਿ ਉਸ ਸਮੇਂ ਉਸ ਨੇ ਹਾਲਾਤ ਤੇ ਹੋਣੀ ਨਾਲ ਪੂਰੀ ਤਰ੍ਹਾਂ ਸਮਝੌਤਾ ਕਰ ਲਿਆ ਸੀ। ਇਕ ਰਿਪੋਰਟ ਅਨੁਸਾਰ ਕੋਰੋਨਾ ਮਹਾਮਾਰੀ ਦੇ ਬਾਵਜੂਦ ਹਰਵਿੰਦਰ ਸਿੰਘ ਨੇ ਬਹੁਤ ਮਿਹਨਤ ਕੀਤੀ ਹੈ ਤੇ ਨੀਦਰਲੈਂਡਜ਼ ’ਚ ਹੋਈ ਵਰਲਡ ਪੈਰਾ ਆਰਚਰੀ ਚੈਂਪੀਅਨਸ਼ਿਪਸ ਵਿੱਚ ਉਹ ਟੋਕੀਓ ਪੈਰਾ ਉਲੰਪਿਕਸ ਲਈ ਕੁਆਲੀਫ਼ਾਈ ਕਰਦਿਆਂ 9ਵੇਂ ਨੰਬਰ ’ਤੇ ਰਿਹਾ ਸੀ।
ਹਰਵਿੰਦਰ ਸਿੰਘ ਹੁਣ W2/ST ਵਰਗ ਦੇ ਮੁਕਾਬਲੇ ’ਚ ਹੋਵੇਗਾ ਤੇ ਇਸ ਨੂੰ ਉਲੰਪਿਕ ਵਿਚ ਪੈਰਾ ਆਰਚਰੀ ਦਾ ਖੁੱਲ੍ਹਾ ਵਰਗ ਆਖਿਆ ਜਾਂਦਾ ਹੈ। ਹਰਵਿੰਦਰ ਸਿੰਘ ਇਸ ਤੋਂ ਪਹਿਲਾਂ 2018 ਦੀਆ ਏਸ਼ੀਆਈ ਪੈਰਾ ਗੇਮਜ਼ ਵਿਚ ਗੋਲਡ ਮੈਡਲ ਜਿੱਤ ਚੁੱਕਾ ਹੈ। ਉਸ ਨੂੰ ਸੋਨ ਤਮਗ਼ਾ ਜਿੱਤਣ ਦੀ ਭਾਵੇਂ ਖ਼ੁਸ਼ੀ ਸੀ ਪਰ ਚੈਂਪੀਅਨਸ਼ਿਪ ਤੋਂ ਸਿਰਫ਼ 20 ਦਿਨ ਪਹਿਲਾ ਹੀ ਉਸ ਦੀ ਮਾਂ ਦਾ ਦਿਹਾਂਤ ਹੋ ਗਿਆ ਸੀ।
ਇਸੇ ਲਈ ਉਹ ਤਮਗ਼ਾ ਉਸ ਨੇ ਆਪਣੀ ਮਾਂ ਨੂੰ ਹੀ ਸਮਰਪਿਤ ਕੀਤਾ ਸੀ। ਸਾਲ 2019 ’ਚ ਬੈਂਕੌਕ ਵਿਖੇ ਹੋਈਆਂ ਏਸ਼ੀਆਈ ਪੈਰਾ ਆਰਚਰੀ ਚੈਂਪੀਅਨਸ਼ਿਪ ਵਿੱਚ ਹਰਵਿੰਦਰ ਸਿੰਘ ਨੇ ਕਾਂਸੇ ਦਾ ਤਮਗ਼ਾ ਜਿੱਤਿਆ ਸੀ।