ਹੈਰਾਨੀਜਨਕ : 9 ਸਾਲ ਦਾ ਬੱਚਾ ਕਰ ਰਿਹੈ ਗ੍ਰੈਜੂਏਸ਼ਨ, ਜਾਣੋ ਤੇਜ਼ ਦਿਮਾਗ਼ ਦਾ ਕਾਰਨ

Laurent Simmons

ਬ੍ਰਸੇਲਸ: ਯੂਰਪੀ ਦੇਸ਼ ਬੈਲਜੀਅਮ ਦਾ ਰਹਿਣ ਵਾਲਾ ਮੁੰਡਾ ਸਿਰਫ਼ 9 ਸਾਲ ਦੀ ਉਮਰ ਵਿਚ ਗ੍ਰੈਜੁਏਸ਼ਨ ਦੀ ਡਿਗਰੀ ਹਾਸਲ ਕਰ ਰਿਹਾ ਹੈ। ਲਾਰੇਂਟ ਸਿਮਨਸ ਨਾਮ ਦਾ ਇਹ ਮੁੰਡਾ ਇਲੈਕਟ੍ਰੀਕਲ ਇੰਜੀਨੀਅਰਿੰਗ ਦੀ ਪੜ੍ਹਾਈ ਕਰ ਰਿਹਾ ਹੈ। ਲਾਰੇਂਟ ਇੰਡੋਵਨ ਯੂਨੀਵਰਸਿਟੀ ਆਫ਼ ਤਕਨਾਲੋਜੀ ਵਿਚ ਪੜ੍ਹ ਰਿਹਾ ਹੈ। ਇਹ ਗ੍ਰੈਜੁਏਸ਼ਨ ਦੀ ਪੜ੍ਹਾਈ ਕਰਨ ਵਾਲੇ ਵਿਦਿਆਰਥੀਆਂ ਲਈ ਕਾਫ਼ੀ ਮੁਸ਼ਕਲ ਕੋਰਸ ਮੰਨਿਆ ਜਾਂਦਾ ਹੈ।

ਯੂਨੀਵਰਸਿਟੀ ਸਟਾਫ਼ ਦਾ ਕਹਿਣਾ ਹੈ ਕਿ ਲਾਰੇਂਟ ਦਸੰਬਰ ਵਿਚ ਆਪਣੀ ਡਿਗਰੀ ਪੂਰੀ ਕਰ ਲਵੇਗਾ। ਲਾਰੇਂਟ ਦੇ ਪਿਤਾ ਦਾ ਕਹਿਣਾ ਹੈ ਕਿ ਇਸ ਦੇ ਬਾਅਦ ਉਹ ਆਪਣੇ ਬੇਟੇ ਨੂੰ ਮੈਡੀਕਲ ਡਿਗਰੀ ਦੇ ਨਾਲ-ਨਾਲ ਇਲੈਕਟ੍ਰੀਕਲ ਇੰਜੀਨੀਅਰਿੰਗ ਵਿਚ ਪੀ.ਐੱਚ.ਡੀ. ਦੀ ਪੜ੍ਹਾਈ ਵੀ ਕਰਵਾਉਣਗੇ। ਲਾਰੇਂਟ ਦੀ ਮਾਂ ਲੇਡੀਆ ਅਤੇ ਪਿਤਾ ਅਲੈਗਜ਼ੈਂਡਰ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਲਾਰੇਂਟ ਦੇ ਦਾਦਾ-ਦਾਦੀ ਤੋਂ ਇਸ ਗੱਲ ਦਾ ਪਤਾ ਚੱਲਿਆ ਸੀ ਕਿ ਉਹ ਕੁਝ ਵੱਖਰਾ ਹੈ।

ਇਸ ਮਾਮਲੇ ਵਿਚ ਲਾਰੇਂਟ ਦੀ ਮਾਂ ਦੀ ਆਪਣੀ ਥਿਓਰੀ ਹੈ। ਉਨ੍ਹਾਂ ਦਾ ਕਹਿਣਾ ਹੈ,''ਗਰਭਵਤੀ ਹੋਣ ਦੌਰਾਨ ਉਸ ਨੇ ਕਾਫ਼ੀ ਮਾਤਰਾ ਵਿਚ ਮੱਛੀਆਂ ਖਾਧੀਆਂ ਸਨ।' ਲਾਰੇਂਟ ਦੀ ਕਾਬਲੀਅਤ ਦੇ ਬਾਰੇ ਵਿਚ ਉਸ ਦੇ ਅਧਿਆਪਕਾਂ ਨੇ ਵੀ ਸਹਿਮਤੀ ਜ਼ਾਹਰ ਕੀਤੀ ਸੀ। ਜਦੋਂ ਉਸ ਦੀ ਟੀਚਰ ਉਸ ਦੀ ਪ੍ਰਤਿਭਾ ਦੀ ਜਾਂਚ ਕਰਨ ਲਈ ਪ੍ਰੀਖਿਆ ਲੈ ਰਹੀ ਸੀ ਤਾਂ ਉਹ ਲਗਾਤਾਰ ਪ੍ਰੀਖਿਆ ਦਿੰਦਾ ਜਾ ਰਿਹਾ ਸੀ। ਲਾਰੇਂਟ ਉਂਝ ਤਾਂ ਡਾਕਟਰਾਂ ਦੇ ਪਰਿਵਾਰ ਤੋਂ ਹੈ ਪਰ ਉਸ ਦੇ ਪਰਿਵਾਰ ਵਿਚੋਂ ਕੋਈ ਇਸ ਗੱਲ ਦਾ ਪਤਾ ਨਹੀਂ ਲਗਾ ਸਕਿਆ ਹੈ ਕਿ ਆਖਿਰ ਲਾਰੇਂਟ ਦੀ ਯਾਦ ਰੱਖਣ ਦੀ ਸਮਰੱਥਾ ਇੰਨੀ ਚੰਗੀ ਕਿਵੇਂ ਹੈ।

ਲਾਰੇਂਟ ਦੇ ਅਧਿਆਪਕਾਂ ਦਾ ਕਹਿਣਾ ਹੈ ਕਿ ਉਹ ਕਾਫ਼ੀ ਹੁਸ਼ਿਆਰ ਮੁੰਡਾ ਹੈ ਅਤੇ ਸਭ ਕੁਝ ਜਲਦੀ ਸਮਝ ਜਾਂਦਾ ਹੈ। ਲਾਰੇਂਟ ਦਾ ਕਹਿਣਾ ਹੈ ਕਿ ਇਲੈਕਟ੍ਰੀਕਲ ਇੰਜੀਨੀਅਰਿੰਗ ਉਸ ਦਾ ਮਨਪਸੰਦ ਵਿਸ਼ਾ ਹੈ ਅਤੇ ਉਹ ਮੈਡੀਕਲ ਦੀ ਪੜ੍ਹਾਈ ਵੀ ਕਰਨੀ ਚਾਹੁੰਦਾ ਹੈ। ਲਾਰੇਂਟ ਦਾ ਪਿਤਾ ਦਾ ਕਹਿਣਾ ਹੈ ਕਿ ਉਹ ਉਸ ਨੂੰ ਉਸ ਦੇ ਮਨਪਸੰਦ ਕੰਮ ਕਰਨ ਤੋਂ ਨਹੀਂ ਰੋਕਦੇ। ਉਹ ਆਪਣੇ ਫੋਨ 'ਤੇ ਗੇਮ ਖੇਡਦਾ ਹੈ, ਆਪਣੇ ਕੁੱਤੇ ਨਾਲ ਖੇਡਦਾ ਹੈ। ਜਿਹੜੇ ਕੰਮ ਬੱਚੇ ਵੱਡੇ ਹੋ ਕੇ ਕਰਨ ਬਾਰੇ ਸੋਚਦੇ ਹਨ, ਉਹ ਕੰਮ ਲਾਰੇਂਟ ਇੰਨੀ ਛੋਟੀ ਜਿਹੀ ਉਮਰ ਵਿਚ ਕਰ ਚੁੱਕਾ ਹੈ।