12 ਸਾਲ ਦੀ ਬੱਚੀ ਨੇ ਬਣਾਈ ਖਾਣਯੋਗ ਪਾਣੀ ਦੀ ਬੋਤਲ
ਇਸ ਨੂੰ ਬਣਾਉਣ 'ਤੇ ਲਗਭਗ 100 ਰੁਪਏ ਖਰਚ ਆਉਂਦਾ ਹੈ।
ਕੈਲੀਫੋਰਨੀਆ: ਸਿਰਫ਼ 12 ਸਾਲ ਦੀ ਉਮਰ ਵਿੱਚ ਕੈਲੀਫੋਰਨੀਆ ਦੀ ਮੈਡੀਸਨ ਚੈਕੇਟਸ ਨੇ ਅਜਿਹੀ ਕਾਢ ਕੱਢੀ ਹੈ, ਜੋ ਪਾਣੀ ਦੇ ਸੋਮਿਆਂ ਤੋਂ ਹੋਣ ਵਾਲੇ ਪ੍ਰਦੂਸ਼ਣ ਨਾਲ ਨਜਿੱਠਣ ਵਿੱਚ ਅਹਿਮ ਸਾਬਤ ਹੋ ਸਕਦੀ ਹੈ। ਉਸ ਨੇ ਪਾਣੀ ਦੀ ਅਜਿਹੀ ਬੋਤਲ ਬਣਾਈ ਹੈ, ਜਿਸ ਨੂੰ ਖਾਧਾ ਵੀ ਜਾ ਸਕਦਾ ਹੈ।
ਦਰਅਸਲ, ਮੈਡੀਸਨ ਹਰ ਸਾਲ ਛੁੱਟੀਆਂ ਮਨਾਉਣ ਲਈ Escondido ਬੀਚ 'ਤੇ ਜਾਂਦੀ ਸੀ। ਉਥੇ ਪਲਾਸਟਿਕ ਦੀਆਂ ਸੈਂਕੜੇ ਬੋਤਲਾਂ ਦਾ ਕੂੜਾ ਦੇਖ ਕੇ ਦੁੱਖ ਹੋਇਆ। ਇਸ 'ਤੇ ਉਸ ਨੇ ਪਲਾਸਟਿਕ ਪ੍ਰਦੂਸ਼ਣ 'ਤੇ ਖੋਜ ਕੀਤੀ ਅਤੇ 'ਈਕੋ-ਹੀਰੋ' ਪ੍ਰੋਜੈਕਟ 'ਤੇ ਕੰਮ ਕਰਨਾ ਸ਼ੁਰੂ ਕਰ ਦਿੱਤਾ। ਮੈਡੀਸਨ ਜੈਲੇਟਿਨ ਦੀ ਵਰਤੋਂ ਕਰ ਕੇ ਇਸ ਖਾਣਯੋਗ ਬੋਤਲ ਨੂੰ ਬਣਾਇਆ। ਚੈਕੇਟਸ ਦੇ ਪ੍ਰੋਜੈਕਟ ਨੇ 2022 ਬ੍ਰੌਡਕਾਮ ਮਾਸਟਰਜ਼ ਮੁਕਾਬਲੇ ਵਿੱਚ ਪਹਿਲਾ ਸਥਾਨ ਪ੍ਰਾਪਤ ਕੀਤਾ, ਯੂਟਾ ਵਿੱਚ ਇੱਕ ਵੱਕਾਰੀ STEM ਖੇਤਰ ਮੁਕਾਬਲਾ। ਹੁਣ ਉਹ ਇਸ ਪ੍ਰੋਜੈਕਟ ਨੂੰ ਰਾਸ਼ਟਰੀ ਪੱਧਰ ਦੇ ਮੁਕਾਬਲੇ ਵਿੱਚ ਪੇਸ਼ ਕਰੇਗੀ।
ਸ਼ੁਰੂਆਤੀ ਖੋਜ ਵਿੱਚ, ਚੈਕੇਟਸ ਨੂੰ ਪਤਾ ਲੱਗਾ ਕਿ ਪਾਣੀ ਦੀਆਂ ਬੋਤਲਾਂ ਨੂੰ ਸਿੰਗਲ ਵਰਤੋਂ ਲਈ ਤਿਆਰ ਕੀਤਾ ਗਿਆ ਹੈ। ਇਨ੍ਹਾਂ ਨੂੰ ਵਰਤੋਂ ਤੋਂ ਬਾਅਦ ਸੁੱਟ ਦਿੱਤਾ ਜਾਂਦਾ ਹੈ। ਜਿਸ ਕਾਰਨ ਬਹੁਤ ਜ਼ਿਆਦਾ ਪ੍ਰਦੂਸ਼ਣ ਫੈਲਦਾ ਹੈ। ਇੱਕ ਅੰਦਾਜ਼ੇ ਅਨੁਸਾਰ, ਅਮਰੀਕਨ ਹਰ ਸਾਲ ਲਗਭਗ 300 ਮਿਲੀਅਨ ਪਾਣੀ ਦੀਆਂ ਬੋਤਲਾਂ ਦੀ ਵਰਤੋਂ ਕਰਦੇ ਹਨ। ਇਹਨਾਂ ਵਿੱਚੋਂ ਜ਼ਿਆਦਾਤਰ ਦੀ ਰੀਸਾਈਕਲਿੰਗ ਸੰਭਵ ਨਹੀਂ ਹੈ।
ਅਕਸਰ ਬੋਤਲਾਂ ਦਾ ਇਹ ਕੂੜਾ ਪਲਾਸਟਿਕ ਦੇ ਟੁਕੜਿਆਂ ਦੇ ਰੂਪ ਵਿੱਚ ਨਦੀ ਜਾਂ ਸਮੁੰਦਰ ਵਿੱਚ ਪਹੁੰਚ ਜਾਂਦਾ ਹੈ ਅਤੇ ਪਾਣੀ ਨੂੰ ਪ੍ਰਦੂਸ਼ਿਤ ਕਰਦਾ ਹੈ। ਚੈਕੇਟਸ ਨੇ ਜੈੱਲ ਦੀ ਬਣੀ ਝਿੱਲੀ ਵਿੱਚ ਤਰਲ ਨੂੰ ਬਚਾਉਣ ਦੀ ਪ੍ਰਕਿਰਿਆ ਦੀ ਖੋਜ ਕੀਤੀ। ਉਸ ਨੇ ਇਸ ਗੁਣ ਨੂੰ ਆਪਣੀ ਨਵੀਨਤਾ ਵਿੱਚ ਵਰਤਿਆ। ਜੈਲੇਟਿਨ ਦੀ ਝਿੱਲੀ ਦੀ ਬਣੀ ਇਹ ਬੋਤਲ ਇੱਕ ਕੱਪ ਤੋਂ ਥੋੜ੍ਹਾ ਘੱਟ ਪਾਣੀ ਰੱਖ ਸਕਦੀ ਹੈ। ਇਸ ਨੂੰ ਬਣਾਉਣ 'ਤੇ ਲਗਭਗ 100 ਰੁਪਏ ਖਰਚ ਆਉਂਦਾ ਹੈ।