ਦੁਨੀਆਂ ਦੇ ਸੱਭ ਤੋਂ ਬਜ਼ੁਰਗ ਵਿਅਕਤੀ ਦਾ 112 ਸਾਲ ਦੀ ਉਮਰ ’ਚ ਦਿਹਾਂਤ

ਮੈਡਰਿਡ : ‘ਗਿਨੀਜ਼ ਵਰਲਡ ਰਿਕਾਰਡਜ਼’ ਵਲੋਂ ਦੁਨੀਆਂ ਦੇ ਸਭ ਤੋਂ ਬਜ਼ੁਰਗ ਵਿਅਕਤੀ ਦੇ ਰੂਪ ਵਜੋਂ ਨਾਮਜ਼ਦ ਕੀਤੇ ਗਏ ਸੈਟਰਨਿਨੋ ਡੇ ਲਾ ਫੁਏਂਤੇ ਦਾ ਮੰਗਲਵਾਰ ਨੂੰ 112 ਸਾਲ ਦੀ ਉਮਰ ਵਿਚ ਦਿਹਾਂਤ ਹੋ ਗਿਆ। ਰਿਕਾਰਡ ਏਜੰਸੀ ਨੇ ਇਹ ਜਾਣਕਾਰੀ ਦਿਤੀ। ਸਰਕਾਰੀ ਸਮਾਚਾਰ ਏਜੰਸੀ ‘ਈ.ਐਫ.ਈ.’ ਨੇ ਦਸਿਆ ਕਿ  ਸੈਟਰਨਿਨੋ ਡੇ ਲਾ ਫੁਏਂਤੇ ਦਾ ਦਿਹਾਂਤ ਸਪੇਨ ਦੇ ਉਤਰ ਪਛਮੀ ਸ਼ਹਿਰ ਲਿਓਨ ਵਿਚ ਉਨ੍ਹਾਂ ਦੇ ਘਰ ਵਿਚ ਹੋਇਆ।

ਏਜੰਸੀ ਨੇ ਦਸਿਆ ਕਿ ‘ਗਿਨੀਜ਼ ਵਰਡਲ ਰਿਕਾਰਡ’ ਨੇ ਪਿਛਲੇ ਸਾਲ ਸਤੰਬਰ ਵਿਚ ਡੇ ਲਾ ਫੁਏਂਤੇ ਨੂੰ ਦੁਨੀਆ ਦੇ ਸਭ ਤੋਂ ਬਜ਼ੁਰਗ ਵਿਅਕਤੀ ਦੇ ਰੂਪ ਵਜੋਂ ਨਾਮਜ਼ਦ ਕੀਤਾ ਸੀ ਅਤੇ ਮੰਗਲਵਾਰ ਨੂੰ ਉਨ੍ਹਾਂ ਦੇ ਦਿਹਾਂਤ ਦੀ ਪੁਸ਼ਟੀ ਕੀਤੀ।

ਫੁਏਂਤੇ ਦਾ ਜਨਮ 11 ਫ਼ਰਵਰੀ 1909 ਵਿਚ ਪੁਏਂਤੇ ਕਾਸਤਰੋ ਵਿਚ ਹੋਇਆ ਸੀ। ‘ਈ.ਐਫ.ਈ.’ ਦੀ ਖ਼ਬਰ ਮੁਤਾਬਕ ਫੁਏਂਤੇ ਇਕ ਮੋਚੀ ਸਨ ਅਤੇ 13 ਸਾਲ ਦੀ ਉਮਰ ਵਿਚ ਉਨ੍ਹਾਂ ਨੇ ਜੁੱਤੀਆਂ ਦੀ ਇਕ ਫ਼ੈਕਟਰੀ ਵਿਚ ਕੰਮ ਕਰਨਾ ਸ਼ੁਰੂ ਕਰ ਦਿਤਾ ਸੀ। ਫੁਏਂਤੇ ਦੇ ਪ੍ਰਵਾਰ ਵਿਚ ਉਨ੍ਹਾਂ ਦੀ ਪਤਨੀ, 8 ਬੱਚੇ, 14 ਪੋਤੇ-ਪਤੀਆਂ ਅਤੇ 22 ਪੜਪੋਤੇ ਹਨ। ਏਜੰਸੀ ਮੁਤਾਬਕ ਅੱਜ  ਬੁਧਵਾਰ ਨੂੰ ਉਨ੍ਹਾਂ ਦਾ ਅੰਤਮ ਸਸਕਾਰ ਕੀਤਾ ਜਾਏਗਾ।