2018 'ਚ 1.395 ਅਰਬ ਰਹੀ ਚੀਨ ਦੀ ਆਬਾਦੀ

ਬੀਜਿੰਗ  : ਚੀਨ ਦੀ ਆਬਾਦੀ 'ਚ ਸਾਲ 2018 'ਚ 1.523 ਕਰੋੜ ਦਾ ਵਾਧਾ ਹੋਇਆ ਹੈ ਜੋ ਕਿ ਦੁਨੀਆ ਦੇ ਸਭ ਤੋਂ ਵਧ ਆਬਾਦੀ ਵਾਲੇ ਦੇਸ਼ 'ਚ ਆਬਾਦੀ ਵਾਧਾ ਦਰ 'ਚ ਗਿਰਾਵਟ ਦਾ ਸੰਕੇਤ ਹੈ । ਰਾਸ਼ਟਰੀ ਜਨਸੰਖਿਆ ਬਿਊਰੋ ਵਲੋਂ ਸੋਮਵਾਰ ਨੂੰ ਜਾਰੀ ਅੰਕੜਿਆਂ ਮੁਤਾਬਕ ਚੀਨ ਦੀ ਆਬਾਦੀ 2018 'ਚ 1.395 ਅਰਬ ਰਹੀ ਜੋ ਉਸ ਦੇ ਪਿਛਲੇ ਸਾਲ ਦੀ ਤੁਲਨਾ 'ਚ .381 ਫੀਸਦੀ ਵਾਧੇ ਨੂੰ ਦਰਸ਼ਾਉਂਦੀ ਹੈ । ਕੁਲ ਆਬਾਦੀ 'ਚ ਪੁਰਸ਼ ਔਰਤਾਂ ਤੋਂ ਤਿੰਨ ਕਰੋੜ ਜ਼ਿਆਦਾ ਹਨ। ਇਸ ਨੂੰ ਹਾਲ ਹੀ 'ਚ ਛੱਡੀ ਗਈ ਇਕ ਬੱਚਾ ਨੀਤੀ ਦਾ ਨਤੀਜਾ ਮੰਨਿਆ ਜਾ ਰਿਹਾ ਹੈ ।

ਇਸ ਨੀਤੀ ਤਹਿਤ ਸੰਸਕ੍ਰਿਤਿਕ ਕਾਰਨਾਂ ਕਰਕੇ ਲੜਕੀਆਂ ਦੀ ਥਾਂ ਲੜਕਿਆਂ ਨੂੰ ਤਰਜੀਹ ਦਿਤੀ ਜਾਂਦੀ ਸੀ। ਸਰਕਾਰ ਦਾ ਅਨੁਮਾਨ ਹੈ ਕਿ ਚੀਨ ਦੀ ਆਬਾਦੀ 2029 'ਚ ਸਭ ਤੋਂ ਜ਼ਿਆਦਾ 1.442 ਅਰਬ ਹੋ ਜਾਵੇਗੀ, ਜਿਸ ਤੋਂ ਅਗਲੇ ਸਾਲ ਤੋਂ ਬਾਅਦ ਹੀ ਇਸ 'ਚ ਗਿਰਾਵਟ ਸ਼ੁਰੂ ਹੋ ਜਾਵੇਗੀ। ਦੁਨੀਆ ਦੇ ਦੂਜੇ ਸਭ ਤੋਂ ਜ਼ਿਆਦਾ ਆਬਾਦੀ ਵਾਲੇ ਦੇਸ਼ ਦੇ ਆਬਾਦੀ ਵਾਧੇ 'ਚ ਵੀ ਗਿਰਾਵਟ ਆਈ ਹੈ।               (ਏਜੰਸੀ)