ਇਟਲੀ ਦਾ ਲੋਰੈਂਸੋ ਬਾਰੋਨੇ ਦੁਨੀਆ ਦੀ ਸਭ ਤੋਂ ਵੱਡੀ ਸਾਇਕਲ ਯਾਤਰਾ ਲਈ ਰਵਾਨਾ

ਰੋਮ : ਇਟਾਲੀ ਦੇ ਤੇਰਨੀ ਜ਼ਿਲ੍ਹੇ ਨਾਲ ਸੰਬਧਤ 24 ਸਾਲਾ ਨੌਜਵਾਨ ਲੋਰੈਂਸੋ ਬਾਰੋਨੇ ਦੁਨੀਆ ਦੀ ਸਭ ਤੋਂ ਵੱਡੀ ਸਾਇਕਲ ਯਾਤਰਾ 29000 ਕਿਲੋਮੀਟਰ (18000 ਮੀਲ) ਦੱਖਣੀ ਅਫ਼ਰੀਕਾ ਦੇ ਦੱਖਣੀ ਸਿਰੇ ਤੋਂ ਏਸ਼ੀਆ ਦੇ ਪੂਰਬੀ ਬਿੰਦੂ ਤਕ ਕਰਨ ਲਈ ਫ਼ਰਵਰੀ 2022 ਤੋਂ ਰਵਾਨਾ ਹੋ ਗਿਆ ਹੈ। ਇਟਲੀ ਤੋਂ ਲੋਰੈਂਸੋ ਬਾਰੋਨੇ ਆਪਣੇ ਸਾਇਕਲ ਤੇ ਹੋਰ ਜ਼ਰੂਰੀ ਸਮਾਨ ਨਾਲ ਹਵਾਈ ਉਡਾਣ ਰਾਹੀਂ ਰੋਮ ਦੇ ਫ਼ਿਊਮੀਚੀਨੋ ਏਅਰਪੋਰਟ ਤੋਂ ਦਖਣੀ ਅਫ਼ਰੀਕਾ ਦੇ ਸ਼ਹਿਰ ਅਗੁਲਹਾਸ ਲਈ ਰਵਾਨਾ ਹੋ ਗਏ ਹਨ।

ਜਿਥੋਂ ਕਿ ਉਹ ਦੁਨੀਆ ਦੀ ਸਭ ਤੋ ਵੱਡੀ ਸਾਇਕਲ ਯਾਤਰਾ ਸ਼ੁਰੂ ਕਰੇਗਾ, ਜਿਸ ਦੌਰਾਨ ਉਹ ਨਾਮੀਬੀਆ, ਜਾਂਬਿਆ, ਤਨਜਾਨੀਆਂਨ, ਯੂਗਾਂਡਾ, ਕੀਨੀਆ, ਇਥੋਪੀਆ, ਸੂਡਾਨ ਅਤੇ ਮਿਸ਼ਰ ਵਿਚੋਂ ਲੰਘੇਗਾ ਤੇ ਤੁਰਕੀ ਤੇ ਜੌਰਜੀਆ ਨੂੰ ਪਾਰ ਕਰਦਿਆਂ ਰੂਸ ਪਹੁੰਚੇਗਾ।

ਇਹ ਸਾਇਕਲ ਯਾਤਰਾ 14 ਮਹੀਨਿਆਂ ਦੀ ਹੋਵੇਗੀ, ਜਿਸ ਦੌਰਾਨ ਲੋਰੈਂਸੋ ਬਾਰੋਨੇ 3 ਮਹਾਂਦੀਪਾਂ ਦੇ 12 ਦੇਸ਼ਾਂ ਦੀ ਇਤਿਹਾਸਕ ਯਾਤਰਾ ਕਰੇਗਾ। ਲੋਰੈਂਸੋ ਬਾਰੋਨੇ ਨੇ ਕਿਹਾ ਕਿ ਉਸ ਨੂੰ ਆਪਣੀ ਇਸ ਮਹਾਨ ਸਾਇਕਲ ਯਾਤਰਾ ਪ੍ਰਤੀ ਕੋਈ ਚਿੰਤਾ ਨਹੀਂ ਹੈ ਕਿਉਂਕਿ ਉਸ ਨੇ ਪਹਿਲਾਂ ਹੀ ਯਾਤਰਾ ਸਮੇਂ ਆਉਣ ਵਾਲੀਆਂ ਪ੍ਰਸਥਿਤੀਆਂ ਦਾ ਵਧੀਆਂ ਢੰਗ ਨਾਲ ਅਨੁਭਵ ਕਰ ਲਿਆ ਹੈ।

ਉਹ ਆਪਣੇ ਆਪ ਨੂੰ ਪਰਖਣਾ ਚਾਹੁੰਦਾ ਹੈ ਕਿ ਉਹ ਇਹ ਯਾਤਰਾ ਨਿਰਵਿਘਨ ਕਰ ਸਕਦਾ ਹੈ। ਜਦੋਂ ਕਿ ਇਸ ਤੋਂ ਪਹਿਲਾਂ ਵੀ ਉਹ 43 ਦੇਸ਼ਾਂ ਦੀ ਸਾਇਕਲ ਯਾਤਰਾ ਦੌਰਾਨ ਹਜ਼ਾਰਾਂ ਮੀਲ ਦਾ ਪੈਂਡਾ ਤੈਅ ਕਰ ਚੁੱਕਾ ਹੈ। ਸੰਨ 2020 ਤੇ 2021 ਵਿਚ ਸਾਈਬੇਰੀਆ ਦੇਸ਼ ਦੀ ਉਚੀ ਸੜਕ ਦੀ ਬੇਹੱਦ ਠੰਡੇ ਸਮੇਂ ਵਿਚ ਸਫ਼ਲਤਾ ਪੂਰਵਕ ਸਾਇਕਲ ਉਪਰ ਯਾਤਰਾ ਕੀਤੀ ਹੈ।