ਭਾਰਤ ਦੀ ਚਿਤਾਵਨੀ, ਸਰਹੱਦ 'ਤੇ ਯਥਾਸਥਿਤੀ ਬਦਲਣ ਦੀ ਕੋਸ਼ਿਸ਼ ਨਾ ਕਰੇ ਚੀਨ

India warns China do not try Change status quo on Border

ਬੀਜਿੰਗ : ਭਾਰਤੀ ਰਾਜਦੂਤ ਗੌਤਮ ਬੰਬਾਵਲੇ ਨੇ ਚੀਨ ਨੂੰ ਸਪੱਸ਼ਟ ਸ਼ਬਦਾਂ ਆਖਿਆ ਹੈ ਕਿ ਬੀਜਿੰਗ ਵਿਚ ਜੇਕਰ ਭਾਰਤੀ ਸਰਹੱਦ 'ਤੇ ਯਥਾਸਥਿਤੀ ਵਿਚ ਬਦਲਾਅ ਕਰਨ ਦੀ ਫਿਰ ਕੋਈ ਕੋਸ਼ਿਸ਼ ਕੀਤੀ ਗਈ ਤਾਂ ਉਸ ਦਾ ਨਤੀਜਾ ਵੀ ਡੋਕਲਾਮ ਦੀ ਤਣਾਤਣੀ ਵਰਗਾ ਹੀ ਹੋਵੇਗਾ। ਦਸ ਦਈਏ ਕਿ ਚੀਨੀ ਫ਼ੌਜ ਨੇ ਡੋਕਲਾਮ ਵਿਚ ਯਥਾਸਥਿਤੀ ਵਿਚ ਬਦਲਾਅ ਕਰਨ ਦੀ ਕੋਸ਼ਿਸ਼ ਕੀਤੀ ਸੀ, ਇਸ ਲਈ ਭਾਰਤ ਨੂੰ ਪ੍ਰਤੀਕਿਰਿਆ ਜ਼ਾਹਿਰ ਕਰਨੀ ਪਈ ਸੀ। 

ਹਾਂਗਕਾਂਗ ਸਥਿਤ 'ਸਾਊਥ ਚਾਈਨਾ ਮਾਰਨਿੰਗ ਪੋਸਟ' ਨੂੰ ਦਿਤੇ ਇਕ ਬਿਆਨ ਵਿਚ ਬੰਬਾਵਲੇ ਨੇ ਕਿਹਾ ਕਿ ਭਾਰਤ ਅਤੇ ਚੀਨ ਦੇ ਵਿਚਕਾਰ ਬਿਨਾ ਨਿਸ਼ਾਨਦੇਹੀ ਵਾਲੀ ਸਰਹੱਦ ਦੋਵੇਂ ਦੇਸ਼ਾਂ ਵਿਚਕਾਰ ਗੰਭੀਰ ਮਸਲਾ ਹੈ। ਇਸ ਕਰ ਕੇ ਦੋਵੇਂ ਹੀ ਦੇਸ਼ਾਂ ਨੂੰ ਸਰਹੱਦਾਂ ਦੀ ਨਿਸ਼ਾਨਦੇਹੀ ਜਲਦ ਤੋਂ ਜਲਦ ਤੈਅ ਕਰਨ ਦੀ ਲੋੜ ਹੈ। ਉਨ੍ਹਾਂ ਆਖਿਆ ਕਿ ਕੁੱਝ ਖੇਤਰ ਅਤੇ ਕੁੱਝ ਸੈਕਟਰ (ਭਾਰਤ ਅਤੇ ਚੀਨ ਸਰਹੱਦ 'ਤੇ) ਅਜਿਹੇ ਹਨ ਜੋ ਬੇਹੱਦ ਸੰਵੇਦਨਸ਼ੀਲ ਹਨ ਅਤੇ ਸ਼ਾਂਤੀ ਬਣਾਏ ਰੱਖਣ ਲਈ ਉਥੇ ਯਥਾਸਥਿਤੀ ਵਿਚ ਬਦਲਾਅ ਨਹੀਂ ਕੀਤਾ ਜਾਣਾ ਚਾਹੀਦਾ। 

ਭਾਰਤੀ ਰਾਜਦੂਤ ਨੇ ਕਿਹਾ ਕਿ ਡੋਕਲਾਮ ਵਰਗੀਆਂ ਘਟਨਾਵਾਂ ਤੋਂ ਬਚਣ ਦਾ ਸਭ ਤੋਂ ਸਹੀ ਤਰੀਕਾ ਸਪੱਸ਼ਟ ਅਤੇ ਖ਼ਰੀ-ਖ਼ਰੀ ਗੱਲਬਾਤ ਹੈ। ਜਦੋਂ ਡੋਕਲਾਮ ਵਰਗੀਆਂ ਘਟਨਾਵਾਂ ਹੁੰਦੀਆਂ ਹਨ ਤਾਂ ਇਸ ਦਾ ਮਤਲਬ ਹੈ ਕਿ ਆਪਸੀ ਗੱਲਬਾਤ ਵਿਚ ਅਸੀਂ ਇਕ ਦੂਜੇ ਦੇ ਨਾਲ ਸਪੱਸ਼ਟਵਾਦੀ ਨਹੀਂ ਹਾਂ। ਇਸ ਲਈ ਦੋਵੇਂ ਦੇਸ਼ਾਂ ਨੂੰ ਸਾਫ਼-ਸਾਫ਼ ਗੱਲ ਕਰਨ ਦਾ ਪੱਧਰ ਵਧਾਉਣਾ ਹੋਵੇਗਾ।

ਉਨ੍ਹਾਂ ਆਖਿਆ ਕਿ ਜੇਕਰ ਚੀਨ ਦੀ ਫ਼ੌਜ ਨੇ ਉਥੇ ਸੜਕ ਬਣਾਉਣੀ ਸੀ ਤਾਂ ਉਨ੍ਹਾਂ ਨੂੰ ਪਹਿਲਾਂ ਸਾਨੂੰ ਦਸਣਾ ਚਾਹੀਦਾ ਸੀ ਕਿ ਉਹ ਉਥੇ ਸੜਕ ਬਣਾਉਣਾ ਚਾਹੁੰਦੇ ਹਨ। ਜੇਕਰ ਅਸੀਂ ਸਹਿਮਤ ਨਾ ਹੁੰਦੇ ਤਾਂ ਅਸੀਂ ਉਨ੍ਹਾਂ ਨੂੰ ਦਸਦੇ ਕਿ ਤੁਸੀਂ ਯਥਾਸਥਿਤੀ ਵਿਚ ਬਦਲਾਅ ਕਰ ਰਹੇ ਹੋ। ਕ੍ਰਿਪਾ ਕਰਕੇ ਅਜਿਹਾ ਨਾ ਕਰੋ ਕਿਉਂਕਿ ਇਹ ਸੰਵੇਦਨਸ਼ੀਲ ਖੇਤਰ ਹੈ।

ਬੰਬਾਵਲੇ ਨੇ ਕਿਹਾ ਕਿ ਚਾਈਨਾ ਪਾਕਿਸਤਾਨ ਇਕੋਨਾਮਿਕ ਕਾਰੀਡੋਰ ਦਾ ਭਾਰਤ ਵਿਰੋਧ ਕਰਦਾ ਰਹੇਗਾ ਪਰ 'ਬੈਲਟ ਐਂਡ ਰੋਡ ਇਨੀਸ਼ਿਏਟਿਵ' 'ਤੇ ਮਤਭੇਦਾਂ ਨੂੰ ਉਹ ਚੀਨ ਦੇ ਨਾਲ ਵਿਵਾਦ ਦਾ ਰੂਪ ਨਹੀਂ ਲੈਣ ਦੇਵੇਗਾ। ਅਮਰੀਕਾ, ਜਪਾਨ ਅਤੇ ਆਸਟ੍ਰੇਲੀਆ ਦੇ ਨਾਲ ਬਲਾਕ ਵਿਚ ਭਾਰਤ ਦੇ ਸ਼ਾਮਲ ਹੋਣ ਸਬੰਧੀ ਖ਼ਬਰਾਂ 'ਤੇ ਬੰਬਾਵਲੇ ਨੇ ਜ਼ਿਆਦਾ ਗੱਲਬਾਤ ਨਹੀਂ ਕੀਤੀ।

ਗੌਤਮ ਬੰਬਾਵਲੇ ਨੇ ਦਸਿਆ ਕਿ 9-10 ਜੂਨ ਨੂੰ ਹੋਣ ਵਾਲੇ ਸ਼ੰਘਾਈ ਕੋਆਪਰੇਸ਼ਨ ਆਰਗੇਨਾਈਜੇਸ਼ (ਐਸਸੀਓ) ਸੰਮੇਲਨ ਵਿਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵੀ ਹਿੱਸਾ ਲੈਣਗੇ। ਇਸ ਦੌਰਾਨ ਉਨ੍ਹਾਂ ਦੀ ਚੀਨੀ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਨਾਲ ਦੁਵੱਲੀ ਗੱਲਬਾਤ ਵੀ ਹੋਵੇਗੀ।