ਪਾਕਿ ਗਏ ਜਥੇ 'ਚੋਂ ਲਾਪਤਾ ਮੁੰਡਾ ਭਾਰਤ ਪਰਤਿਆ

ਪਾਕਿਸਤਾਨ ਵਿਖੇ ਵਿਸਾਖੀ ਮਨਾਉਣ ਭਾਰਤ ਤੋਂ ਗਏ ਸਿੱਖ ਜੱਥੇ 'ਚੋਂ ਲਾਪਤਾ ਹੋਇਆ 24 ਸਾਲਾ ਅਮਰਜੀਤ ਸਿੰਘ ਨੂੰ ਅੱਜ ਵਾਹਘਾ ਸਰਹੱਦ 'ਤੇ ਪਾਕਿਸਤਾਨੀ ਅਧਿਕਾਰੀਆਂ ਨੇ ਭਾਰਤੀ ਅਧਿਕਾਰੀਆਂ ਨੂੰ ਸੌਂਪ ਦਿਤਾ। ਅੰਮ੍ਰਿਤਸਰ ਦਾ ਰਹਿਣ ਵਾਲਾ ਅਮਰਜੀਤ ਸਿੰਘ ਪਾਕਿਸਤਾਨ ਵਿਚ ਵਿਸਾਖੀ ਮਨਾਉਣ ਲਈ 12 ਅਪ੍ਰੈਲ ਨੂੰ ਲਗਭਗ 1700 ਸਿੱਖ ਸ਼ਰਧਾਲੂਆਂ ਨਾਲ ਪਾਕਿਸਤਾਨ ਪੁੱਜਾ ਸੀ। ਅਮਰਜੀਤ ਦੇ ਲਾਪਤਾ ਹੋਣ ਬਾਰੇ ਉਸ ਸਮੇਂ ਪਤਾ ਲੱਗਾ ਜਦ ਸ਼ਰਧਾਲੂਆਂ ਦਾ ਜਥਾ 21 ਅਪ੍ਰੈਲ ਨੂੰ ਭਾਰਤ ਆਉਣ ਲੱਗਾ। ਅਮਰਜੀਤ ਸਿੰਘ ਜਥੇ ਨੂੰ ਛੱਡ ਕੇ ਪਾਕਿਸਤਾਨ ਪੰਜਾਬ ਦੇ ਸ਼ੇਖੂਪੁਰਾ ਵਿਚ ਸਥਿਤ ਅਪਣੇ ਦੋਸਤ ਅਮੀਰ ਰਜ਼ਾਕ ਦੇ ਘਰ ਚਲਾ ਗਿਆ ਸੀ। ਅਮਰਜੀਤ ਸਿੰਘ ਦੇ ਘਰ ਆਉਣ ਤੋਂ ਬਾਅਦ ਰਜ਼ਾਕ ਦੇ ਪਰਵਾਰਕ ਮੈਂਬਰਾਂ ਨੇ ਪਾਕਿਸਤਾਨੀ ਅਧਿਕਾਰੀਆਂ ਨਾਲ ਸੰਪਰਕ ਕੀਤਾ।  ਇਸ ਤੋਂ ਬਾਅਦ ਰਜ਼ਾਕ ਅਤੇ ਅਮਰਜੀਤ ਸਿੰਘ ਨੇ ਅਧਿਕਾਰੀਆਂ ਨਾਲ ਮੁਲਾਕਾਤ ਕੀਤੀ ਅਤੇ ਅਮਰਜੀਤ ਸਿੰਘ ਨੇ ਅਧਿਕਾਰੀਆਂ ਨੂੰ ਦਸਿਆ ਕਿ ਉਹ ਜਥੇ ਤੋਂ ਲਾਪਤਾ ਹੋ ਗਿਆ ਸੀ। ਅਮਰਜੀਤ ਸਿੰਘ ਨੇ ਕਿਹਾ ਕਿ ਉਸ ਨੇ ਸੋਚਿਆ ਕਿ ਉਸ ਕੋਲ ਇਕ ਮਹੀਨੇ ਦਾ ਵੀਜ਼ਾ ਹੈ

ਅਤੇ ਉਹ ਅਪਣੇ ਦੋਸਤ ਦੇ ਘਰ ਕੁੱਝ ਦਿਨ ਰਹਿਣ ਤੋਂ ਬਾਅਦ ਭਾਰਤ ਵਾਪਸ ਚਲਾ ਜਾਵੇਗਾ। ਜਾਣਕਾਰੀ ਅਨੁਸਾਰ ਅਮਰਜੀਤ ਸਿੰਘ ਤੋਂ ਪਾਕਿਸਤਾਨੀ ਖੂਫ਼ੀਆ ਏਜੰਸੀਆਂ ਨੇ ਕਈ ਘੰਟੇ ਪੁੱਛ-ਗਿਛ ਕੀਤੀ। ਇਹ ਭਰੋਸਾ ਹੋਣ ਤੋਂ ਬਾਅਦ ਕਿ ਅਮਰਜੀਤ ਸਿੰਘ ਦੇ ਭਾਰਤੀ ਖੂਫ਼ੀਆ ਏਜੰਸੀਆਂ ਨਾਲ ਕੋਈ ਸਬੰਧ ਨਹੀਂ ਹੈ, ਉਸ ਨੂੰ ਭਾਰਤ ਵਾਪਸ ਭੇਜਣ ਦੀ ਤਿਆਰੀ ਕੀਤੀ ਜਾ ਰਹੀ ਹੈ। ਅਮਰਜੀਤ ਸਿੰਘ 16 ਅਪ੍ਰੈਲ ਨੂੰ ਅਪਣੇ ਜਥੇ ਤੋਂ ਵੱਖ ਹੋ ਗਿਆ ਸੀ। ਜ਼ਿਕਰਯੋਗ ਹੈ ਕਿ ਪਾਕਿਸਤਾਨ ਗਏ ਸਿੱਖ ਸ਼ਰਧਾਲੂਆਂ ਦੇ ਜਥੇ ਵਿਚੋਂ ਇਸ ਵਾਰ ਦੋ ਜਣੇ ਲਾਪਤਾ ਹੋ ਗਏ ਸਨ। ਇਨ੍ਹਾਂ ਵਿਚੋਂ ਇਕ ਅਮਰਜੀਤ ਸਿੰਘ ਸੀ ਅਤੇ ਦੂਜੀ ਸੀ ਕਿਰਨ ਬਾਲਾ, ਜਿਸ ਨੇ ਜਥੇ ਨਾਲ ਪਾਕਿਸਤਾਨ ਜਾ ਕੇ ਲਾਹੌਰ ਰਹਿੰਦੇ ਇਕ ਪਾਕਿਸਤਾਨੀ ਵਿਅਕਤੀ ਨਾਲ ਮੁਸਲਿਮ ਧਰਮ ਅਪਨਾਉਣ ਤੋਂ ਬਾਅਦ ਵਿਆਹ ਕਰਵਾ ਲਿਆ ਸੀ ਅਤੇ ਹਾਲੇ ਵੀ ਕਿਰਨ ਬਾਲਾ ਪਾਕਿਸਤਾਨ ਵਿਚ ਹੀ ਹੈ। ਕਿਰਨ ਬਾਲਾ ਨੇ ਅਪਣੇ ਵੀਜ਼ੇ ਦੀ ਮਿਆਦ ਵਿਚ ਛੇ ਮਹੀਨੇ ਦਾ ਹੋਰ ਵਾਧਾ ਕਰਵਾ ਲਿਆ ਹੈ।  (ਪੀ.ਟੀ.ਆਈ.)