‘‘ਸਿੱਖੀ ਗੁਰੂਘਰਾਂ ਦੀ ਚੌਧਰ ਤੱਕ ਸੀਮਤ ਹੋ ਕੇ ਰਹਿ ਗਈ ਹੈ'', ਰਾਗੀ ਸਿੰਘ ਨੇ ਕੀਰਤਨ ਛੱਡਣ ਦਾ ਕੀਤਾ ਐਲਾਨ

Sikhism has become limited to the Chaudhary of Gurudwaras: Ragi Singh

ਕੈਨਸਾਸ ਸਿਟੀ (ਕੈਨਸਾਸ) : ਅਮਰੀਕਾ ਦੇ ਕੈਨਸਾਸ ਸੂਬੇ ਦੇ ਕੈਨਸਾਸ ਸਿਟੀ ਸਥਿਤ ਮਿੱਡ ਵੈਸਟ ਗੁਰਦੁਆਰਾ ਸਾਹਿਬ ਦੇ ਇਕ ਪਾਠੀ ਸਿੰਘ ਦੀ ਇਕ ਭਾਵੁਕ ਵੀਡੀਉ ਸਾਹਮਣੇ ਆਈ ਹੈ, ਜਿਸ ਵਿਚ ਉਹ ਗੁਰਦੁਆਰੇ ਦੇ ਅੰਦਰ ਪ੍ਰਬੰਧਕਾਂ ਵਲੋਂ ਹੱਦ ਤੋਂ ਵੱਧ ਟੋਕਾ-ਟਾਕੀ ਕੀਤੇ ਜਾਣ ਦੇ ਦੋਸ਼ ਲਗਾ ਰਹੇ ਹਨ। ਕੀਰਤਨ ਦੌਰਾਨ ਰਾਗੀ ਜੱਥੇ ਨਾਲ ਜੁੜੇ ਰਾਗੀ ਸਿੰਘ ਨੇ ਭਾਵੁਕ ਹੋ ਕੇ ਕਿਹਾ ਕਿ ਸਿੱਖੀ ਗੁਰੂਘਰਾਂ ਦੀ ਚੌਧਰ ਤਕ ਸੀਮਤ ਹੋ ਕੇ ਰਹਿ ਗਈ ਹੈ ਅਤੇ ਰਾਗੀਆਂ ਨੂੰ ਬਹੁਤ ਤੰਗ-ਪ੍ਰੇਸ਼ਾਨ ਕੀਤਾ ਜਾਂਦਾ ਹੈ। ਉਨ੍ਹਾਂ ਕਿਹਾ ਕਿ ਉਹ ਇਸ ਵਿਤਕਰੇ ਵਾਲੇ ਮਾਹੌਲ ਵਿਚ ਹੋਰ ਜ਼ਿਆਦਾ ਸਮਾਂ ਨਹੀਂ ਰਹਿ ਸਕਦੇ, ਕਿਉਂਕਿ ਇੱਥੇ ਬੋਲਣ ਦੀ ਆਜ਼ਾਦੀ ਵੀ ਖਤਮ ਕਰ ਦਿਤੀ ਗਈ ਹੈ।

ਸੋਸ਼ਲ ਮੀਡੀਆ ਉਤੇ ਫੈਲ ਰਹੀ ਵੀਡੀਉ ਵਿਚ ਰਾਗੀ ਸਿੰਘ ਨੇ ਕੀਰਤਨ ਕਰਦੇ ਹੋਏ ਅਪਣੇ ਮਨ ਦੇ ਵਲਵਲੇ ਸੰਗਤਾਂ ਨਾਲ ਸਾਂਝੇ ਕਰਦੇ ਹੋਏ ਕਿਹਾ, ‘‘ਮੈਂ ਕੀਰਤਨ ਤੋਂ ਪੱਕੀ ਛੁੱਟੀ ਲੈਣਾ ਚਾਹੁੰਦਾ ਹਾਂ ਕਿਉਂਕਿ ਸਾਨੂੰ ਹਰ ਗੱਲ ’ਤੇ ਟੋਕਿਆ ਜਾਂਦਾ ਹੈ, ਹਰ ਗੱਲ ’ਤੇ ਸਾਨੂੰ ਮਜਬੂਰ ਕੀਤਾ ਜਾਂਦਾ ਹੈ। ਜਿਹੜੀ ਗੱਲ ਸਾਡੀ ਵੀ ਨਹੀਂ ਹੁੰਦੀ ਉਸ ਦੇ ਲਈ ਵੀ ਸਾਨੂੰ ਟੋਕਿਆ ਜਾਂਦਾ ਹੈ, ਜਿਵੇਂ ਨਿੱਕੀਆਂ-ਨਿੱਕੀਆਂ ਗੱਲਾਂ ’ਤੇ ਨਿਆਣੇ ਲੜਦੇ ਹੋਣ। ਪਤਾ ਨਹੀਂ ਹੁਣ ਕਿਸ ਤਰ੍ਹਾਂ ਦੇ ਗੁਰੂਘਰ ਬਣ ਗਏ ਹਨ ਕਿ ਹਰ ਨਿੱਕੀ-ਨਿੱਕੀ ਗੱਲ ’ਤੇ ਕਿਹਾ ਜਾਂਦਾ ਹੈ ਕਿ ਉਸ ਨੇ ਸਰੂਪ ਨਹੀਂ ਲੈਣਾ, ਉਸ ਨੇ ਚੌਰ ਨਹੀਂ ਕਰਨਾ, ਉਸ ਨੇ ਜੈਕਾਰਾ ਕਿਉਂ ਲਗਾਇਆ। ਤੁਸੀਂ ਅਰਦਾਸ ਵਿਚ ਇਹ ਨਹੀਂ ਬੋਲਣਾ, ਤੁਸੀਂ ਉਹ ਨਹੀਂ ਬੋਲਣਾ।’’

ਉਨ੍ਹਾਂ ਕਿਹਾ, ‘‘ਸਾਡੀ ਗਲਤੀ ਕੀ ਹੈ ਅਸੀਂ ਬੇਇਜ਼ਤੀ ਕਰਵਾਉਣ ਵਾਸਤੇ ਆਏ ਹਾਂ। ਅਸੀਂ ਅਪਣੇ ਬੱਚਿਆਂ ਨੂੰ ਵੀ ਨਹੀਂ ਟੋਕ ਸਕਦੇ, ਪਰ ਸਾਨੂੰ ਗੱਲ ’ਤੇ ਟੋਕਿਆ ਜਾਂਦਾ ਹੈ। ਸਾਨੂੰ ਦੱਸਣਗੇ ਕਿ ਅਸੀਂ ਕਿਸ ਤਰ੍ਹਾਂ ਕਰਨਾ ਹੈ ਅਪਣਾ ਕੰਮ। ਸਾਨੂੰ ਕਿਹਾ ਜਾਂਦਾ ਹੈ ਕਿ ਤੁਹਾਨੂੰ ਕਮਾਈ ਬਹੁਤ ਹੈ, ਜਦਕਿ ਅਸੀਂ 800 ਡਾਲਰ ਮਹੀਨੇ ’ਤੇ ਗੁਜ਼ਾਰਾ ਕਰਦੇ ਹਾਂ। ਗੁਰੂ ਦੇ ਦਰ ’ਤੇ ਬੈਠੇ ਹਾਂ ਅਤੇ ਮੈਂ ਕਿਸੇ ਨੂੰ ਮਾੜਾ ਨਹੀਂ ਕਹਿਣਾ ਚਾਹੁੰਦਾ ਪਰ ਗੁਰੂਘਰ ਅੱਜਕਲ੍ਹ ਸਿਰਫ਼ ਚੌਧਰ ਤਕ ਸੀਮਤ ਹੋ ਕੇ ਰਹਿ ਗਏ ਹਨ, ਨਾ ਕਿਸੇ ਨੂੰ ਸਿੱਖੀ ਨਾਲ ਪਿਆਰ ਅਤੇ ਨਾ ਹੀ ਕਿਸੇ ਨੂੰ ਗੁਰੂ ਨਾਲ ਪਿਆਰ ਹੈ।’’ ਰਾਗੀ ਸਿੰਘ ਨੇ ਕਿਹਾ ਕਿ ਉਹ ਇਸ ਹਾਲਾਤ ਤੋਂ ਤੰਗ ਆ ਚੁਕੇ ਹਨ ਅਤੇ ਹੁਣ ਅਮਰੀਕਾ ਛੱਡ ਕੇ ਸਥਾਈ ਤੌਰ ’ਤੇ ਵਾਪਸ ਅਪਣੇ ਬੱਚਿਆਂ ਕੋਲ ਭਾਰਤ ਵਾਪਸ ਜਾਣ ਦਾ ਫੈਸਲਾ ਕਰ ਚੁਕੇ ਹਨ।