ਯੂਰਪ ’ਚ ਸਿੱਖ ਭਾਈਚਾਰੇ ਨੂੰ ਮਾਨਤਾ ਦਿਵਾਉਣ ਲਈ ਕੋਸ਼ਿਸ਼ਾਂ ਜਾਰੀ, ਜਾਣੋ ਇਸ ਵਿਸਾਖੀ ਮੌਕੇ ਕੀ ਹੋਣਗੀਆਂ ਇਤਿਹਾਸਕ ਪਹਿਲਾਂ

ਬ੍ਰਸਲਜ਼: ਯੂਰਪ ਦੇ ਕੇਂਦਰ ’ਚ, ਸਿੱਖ ਭਾਈਚਾਰੇ ਨੂੰ ਮਾਨਤਾ ਦਿਵਾਉਣ ਅਤੇ ਸਿੱਖਾਂ ਨਾਲ ਹੁੰਦੇ ਵਿਤਕਰੇ ਵਿਰੁਧ ਸੰਘਰਸ਼ ਜਾਰੀ ਹੈ। ਇਸ ਸੰਘਰਸ਼ ਨੇ ਜਨਤਾ ਅਤੇ ਮੀਡੀਆ ਦੋਹਾਂ ਦਾ ਧਿਆਨ ਖਿੱਚਿਆ ਹੈ। ਯੂਰਪੀਅਨ ਸਿੱਖ ਆਰਗੇਨਾਈਜ਼ੇਸ਼ਨ ਦੇ ਮੁਖੀ ਸਰਦਾਰ ਬਿੰਦਰ ਸਿੰਘ ਨੇ ਯੂਰਪ ਭਰ ’ਚ ਰਹਿੰਦੇ ਸਿੱਖ ਪਰਵਾਰਾਂ ਨੂੰ ਦਰਪੇਸ਼ ਚੱਲ ਰਹੇ ਮੁੱਦਿਆਂ ’ਤੇ ਚਾਨਣਾ ਪਾਇਆ ਹੈ ਅਤੇ ਸਿੱਖ ਧਰਮ ਲਈ ਅਧਿਕਾਰਤ ਮਾਨਤਾ ਦੀ ਘਾਟ ਅਤੇ ਇਸ ਤੋਂ ਬਾਅਦ ਹੋਣ ਵਾਲੇ ਵਿਤਕਰੇ ਨੂੰ ਉਜਾਗਰ ਕੀਤਾ ਹੈ।

‘ਦ ਯੂਰੋਪੀਅਨ ਟਾਈਮਜ਼’ ਵਲੋਂ ਪੇਸ਼ ਕੀਤੀ ਰੀਪੋਰਟ ਅਨੁਸਾਰ ਬਿੰਦਰ ਸਿੰਘ ਅਨੁਸਾਰ ਯੂਰਪੀਅਨ ਸਿੱਖ ਆਰਗੇਨਾਈਜ਼ੇਸ਼ਨ ਗੁਰਦੁਆਰਾ ਸਿੰਤਰੂਦਨ ਸਾਹਿਬ ਅਤੇ ਬੈਲਜੀਅਮ ਦੀ ਸੰਗਤ ਦੇ ਸਹਿਯੋਗ ਨਾਲ ਇਨ੍ਹਾਂ ਚੁਨੌਤੀਆਂ ਨਾਲ ਨਜਿੱਠਣ ਲਈ ਸਰਗਰਮੀ ਨਾਲ ਕੰਮ ਕਰ ਰਹੀ ਹੈ। ਇਸ ਮਾਮਲੇ ਨੂੰ ਯੂਰਪੀਅਨ ਸੰਸਦ ਦੇ ਧਿਆਨ ’ਚ ਲਿਆਉਣ ਦੀਆਂ ਕੋਸ਼ਿਸ਼ਾਂ ਕੀਤੀਆਂ ਜਾ ਰਹੀਆਂ ਹਨ। ਬਿੰਦਰ ਸਿੰਘ ਨੇ ਕਿਹਾ, ‘‘ਅਸੀਂ ਯੂਰੋਪ ’ਚ ਰਹਿ ਰਹੀ ਸਿੱਖ ਆਬਾਦੀ ਨੂੰ ਲਾਮਬੰਦ ਕਰ ਰਹੇ ਹਾਂ ਅਤੇ ਵੱਖ-ਵੱਖ ਇਮਾਰਤਾਂ ’ਤੇ ਵੱਡੇ ਪੋਸਟਰ ਲਗਾਏ ਹਨ।’’

ਇਕ ਮਹੱਤਵਪੂਰਨ ਕਦਮ ਚੁੱਕਦੇ ਹੋਏ ਸਤਿਕਾਰਯੋਗ ਸਿੱਖ ਸ਼ਖਸੀਅਤਾਂ ਦਾ ਇਕ ਵਫ਼ਦ ਸੰਸਦ ਵਿਚ ਮਨਾਏ ਜਾਣ ਵਾਲੇ ਵਿਸਾਖੀ ਪੁਰਬ ਮੌਕੇ ਯੂਰਪੀਅਨ ਸੰਸਦ ਦੇ ਮੈਂਬਰਾਂ ਨਾਲ ਗੱਲਬਾਤ ਕਰੇਗਾ। ਇਸ ਵਿਚਾਰ-ਵਟਾਂਦਰੇ ਦਾ ਉਦੇਸ਼ ਯੂਰਪ ਵਿਚ ਸਿੱਖਾਂ ਨੂੰ ਦਰਪੇਸ਼ ਮੁੱਦਿਆਂ ਨੂੰ ਉਜਾਗਰ ਕਰਨਾ ਅਤੇ ਉਨ੍ਹਾਂ ਨੂੰ ਹੱਲ ਕਰਨ ਦੇ ਤਰੀਕੇ ਲੱਭਣਾ ਹੈ। 

ਸਿੱਖ ਸਭਿਆਚਾਰ ਬਾਰੇ ਜਾਗਰੂਕਤਾ ਫੈਲਾਉਣ ਦੇ ਯਤਨਾਂ ਨੂੰ ਹੋਰ ਤੇਜ਼ ਕਰਦਿਆਂ ਵਿਸਾਖੀ ਪੁਰਬ ਨੂੰ ਸਮਰਪਿਤ ਵਿਸ਼ਾਲ ਨਗਰ ਕੀਰਤਨ 6 ਅਪ੍ਰੈਲ ਨੂੰ ਸਜਾਇਆ ਜਾਵੇਗਾ। ਇਤਿਹਾਸ ’ਚ ਪਹਿਲੀ ਵਾਰ ਹੈਲੀਕਾਪਟਰ ਰਾਹੀਂ ਸੰਗਤਾਂ ’ਤੇ ਫੁੱਲਾਂ ਦੀ ਮੀਂਹ ਪਾਇਆ ਜਾਵੇਗਾ, ਜੋ ਨਗਰ ਕੀਰਤਨ ਨੂੰ ਵਿਲੱਖਣ ਦਿੱਖ ਪ੍ਰਦਾਨ ਕਰੇਗਾ। ਗੁਰਦੁਆਰਾ ਸਿੰਤਰੂਦਨ ਸਾਹਿਬ ਦੇ ਪ੍ਰਧਾਨ ਸਰਦਾਰ ਕਰਮ ਸਿੰਘ ਨੇ ਯੂਰਪ ਵਿਚ ਸਿੱਖਾਂ ਦੀ ਏਕਤਾ ਅਤੇ ਤਾਕਤ ਨੂੰ ਦਰਸਾਉਂਦੇ ਹੋਏ ਸਿੱਖਾਂ ਨੂੰ ਵੱਡੀ ਗਿਣਤੀ ਵਿਚ ਇਸ ਨਗਰ ਕੀਰਤਨ ’ਚ ਹਿੱਸਾ ਲੈਣ ਦਾ ਸੱਦਾ ਦਿਤਾ ਹੈ। 

ਸਿੱਖ ਭਾਈਚਾਰੇ ਦਾ ਮਾਨਤਾ ਲਈ ਅਤੇ ਯੂਰਪ ’ਚ ਵਿਤਕਰੇ ਦੇ ਵਿਰੁਧ ਜ਼ੋਰ ਦੇਣਾ ਉਨ੍ਹਾਂ ਦੀ ਲਚਕੀਲੇਪਣ ਅਤੇ ਦ੍ਰਿੜਤਾ ਦਾ ਸਬੂਤ ਹੈ। ਜਿਵੇਂ-ਜਿਵੇਂ ਉਹ ਅਪਣੀਆਂ ਚਿੰਤਾਵਾਂ ਨੂੰ ਯੂਰਪੀਅਨ ਸੰਸਦ ’ਚ ਲਿਜਾਣ ਅਤੇ ਅਪਣੇ ਸਭਿਆਚਾਰ ਨੂੰ ਮਾਣ ਨਾਲ ਮਨਾਉਣ ਦੀ ਤਿਆਰੀ ਕਰਦੇ ਹਨ, ਇਕ ਅਜਿਹੇ ਭਵਿੱਖ ਦੀ ਉਮੀਦ ਮਜ਼ਬੂਤ ਹੁੰਦੀ ਹੈ ਜਿੱਥੇ ਸਿੱਖ ਧਰਮ ਨੂੰ ਪੂਰੇ ਯੂਰਪ ’ਚ ਮਾਨਤਾ ਅਤੇ ਸਤਿਕਾਰ ਦਿਤਾ ਜਾਂਦਾ ਹੈ।