ਨਵਜੋਤ ਸਿੱਧੂ ਦਾ ਪੰਜਾਬ ਮਾਡਲ, ਕੀ ਮੁੱਖ ਮੰਤਰੀ ਦੀ ਮਦਦ ਤੋਂ ਬਿਨਾਂ ਵੀ, ਕੋਈ ਕ੍ਰਿਸ਼ਮਾ ਵਿਖਾ ਸਕੇਗਾ?
ਪੰਜਾਬ ਕਾਂਗਰਸ ਵਿਚ ਪਿਛਲੇ ਕਈ ਸਾਲਾਂ ਤੋਂ ਚਲਦਾ ਵਿਵਾਦ ਹੁਣ ਇਕ ਕਿਨਾਰੇ ਲੱਗ ਤਾਂ ਗਿਆ ਹੈ ਪਰ ਕੀ ਇਸ ਨਾਲ ਪੰਜਾਬ ਕਾਂਗਰਸ ਦੀ ਅੰਦਰੂਨੀ ਲੜਾਈ ਖ਼ਤਮ ਹੋ ਗਈ?
ਪੰਜਾਬ ਕਾਂਗਰਸ (Punjab Congress) ਵਿਚ ਪਿਛਲੇ ਕਈ ਸਾਲਾਂ ਤੋਂ ਚਲਦਾ ਵਿਵਾਦ ਹੁਣ ਇਕ ਕਿਨਾਰੇ ਲੱਗ ਤਾਂ ਗਿਆ ਹੈ ਪਰ ਕੀ ਇਸ ਨਾਲ ਪੰਜਾਬ ਕਾਂਗਰਸ ਦੀ ਅੰਦਰੂਨੀ ਲੜਾਈ ਖ਼ਤਮ ਹੋ ਗਈ? ਅੱਜ ਜਿਸ ਤਰ੍ਹਾਂ ਨਵਜੋਤ ਸਿੰਘ ਸਿੱਧੂ (Navjot Singh Sidhu) ਦਾ ਕਾਂਗਰਸ ਪ੍ਰਧਾਨ ਦੇ ਅਹੁਦੇ ਤੇ ਸਵਾਗਤ ਹੋ ਰਿਹਾ ਹੈ, ਇਕ ਗੱਲ ਤਾਂ ਸਾਫ਼ ਹੈ ਕਿ ਕਾਂਗਰਸ ਦੇ ਜ਼ਿਆਦਾਤਰ ਵਿਧਾਇਕ ਇਹ ਮੰਗ ਲੈ ਕੇ ਆਪ ਹਾਈਕਮਾਨ ਕੋਲ ਗਏ ਸਨ। ਸੋਨੀਆ ਗਾਂਧੀ (Sonia Gandhi) ਹਮੇਸ਼ਾ ਹੀ ਪੁਰਾਣੇ ਕਾਂਗਰਸੀਆਂ ਦੀ ਢਾਲ ਬਣੀ ਚਲੀ ਆ ਰਹੀ ਹੈ ਤੇ ਇਹ ਸ਼ਾਇਦ ਪਹਿਲੀ ਵਾਰ ਹੈ ਕਿ ਸੋਨੀਆ ਨੇ ਰਾਹੁਲ ਤੇ ਪ੍ਰਿਯੰਕਾ ਦੇ ਫ਼ੈਸਲੇ ਨੂੰ ਮੰਨ ਲਿਆ।
ਕਾਂਗਰਸ ਵਿਚ ਨਵੇਂ ਖ਼ੂਨ ਤੇ ਟਕਸਾਲੀ ਆਗੂਆਂ ਦੀ 2014 ਤੋਂ ਹੀ ਲੜਾਈ ਚਲ ਰਹੀ ਹੈ। ਪੰਜਾਬ ਵਿਚ ਸਫ਼ਲ ਹੋਣਾ ਨਾ ਸਿਰਫ਼ ਪੰਜਾਬ ਦੇ ਕਾਂਗਰਸੀਆਂ ਵਾਸਤੇ ਜ਼ਰੂਰੀ ਸੀ ਬਲਕਿ ਇਹ ਦੇਸ਼ ਭਰ ਵਿਚ ਕਾਂਗਰਸ ਦੀ ਹੋਂਦ ਤੇ ਹਸਤੀ ਨੂੰ ਮਿਲੀ ਚੁਨੌਤੀ ਦਾ ਜਵਾਬ ਦੇਣ ਲਈ ਵੀ ਜ਼ਰੂਰੀ ਸੀ। ਸੋ ਜਵਾਨੀ ਇਕ ਵਾਰ ਤਾਂ ਜਿੱਤ ਗਈ ਹੈ ਪਰ ਅੱਗੇ ਕੀ ਬਣੇਗਾ? ਇਹ ਸਿਰਫ਼ ਇਕ ਕੁਰਸੀ ਦੀ ਲੜਾਈ ਨਹੀਂ ਸੀ ਜੋ ਕੈਪਟਨ ਅਮਰਿੰਦਰ ਸਿੰਘ (Captain Amarinder Singh) ਤੇ ਨਵਜੋਤ ਸਿੰਘ ਸਿੱਧੂ ਵਿਚਕਾਰ ਚਲ ਰਹੀ ਸੀ।
ਇਹ ਅਸਲ ਵਿਚ ਕਾਂਗਰਸੀ ਆਗੂਆਂ ਦੀ ਲੋਕਾਂ ਦੇ ਦਰਬਾਰ ਵਿਚ, ਅਪਣੇ ਵਲੋਂ ਕੀਤੇ ਵਾਅਦੇ ਨਾ ਨਿਭਾਉਣ ਕਾਰਨ, ਪੇਸ਼ ਹੋਣ ਤੋਂ ਘਬਰਾਹਟ ਸੀ ਜਿਸ ਕਾਰਨ ਉਨ੍ਹਾਂ ਨੇ ਚਾਰ ਸਾਲ ਬਾਅਦ ਅਪਣੀ ਹੀ ਸਰਕਾਰ ਵਿਰੁਧ ਬਗ਼ਾਵਤੀ ਸੁਰਾਂ ਅਲਾਪਣੀਆਂ ਸ਼ੁਰੂ ਕਰ ਦਿਤੀਆਂ। ਅੱਜ ਤਕ ਦੀ ਸਾਰੀ ਬਗ਼ਾਵਤ ਅਤੇ ਸੋਸ਼ਲ ਮੀਡੀਆ ਉਤੇ ਕੀਤੀ ਬਿਆਨਬਾਜ਼ੀ ਦਾ ਸਿਰਫ਼ ਇਕ ਹੀ ਸਿੱਟਾ ਨਿਕਲਿਆ ਹੈ ਕਿ ਨਵਜੋਤ ਸਿੰਘ ਸਿੱਧੂ ਕਾਂਗਰਸ ਦੇ ਪ੍ਰਧਾਨ ਬਣ ਗਏ ਹਨ। ਨਵਜੋਤ ਸਿੰਘ ਸਿੱਧੂ ਦਾ ਪੰਜਾਬ ਵਿਚ ਅੱਜ ਇਕ ਅਜਿਹਾ ਨਾਮ ਬਣ ਗਿਆ ਹੈ ਜਿਸ ਨਾਲ ਨਾ ਸਿਰਫ਼ ਪੰਜਾਬ ਕਾਂਗਰਸ ਵਿਚ ਹੀ ਬਲਕਿ ਪੂਰੇ ਪੰਜਾਬ ਵਿਚ ਹਲਚਲ ਮਚ ਗਈ ਹੈ।
ਅਕਾਲੀ ਦਲ (ਬਾਦਲ) (Shiromani Akali Dal) ਤੇ ਨਵਜੋਤ ਸਿੱਧੂ ਵਿਚ ਇਕ ਪੁਰਾਣੀ ਜੰਗ ਚਲ ਰਹੀ ਹੈ ਜਿਸ ਕਾਰਨ ਹੀ ਉਹ ਭਾਜਪਾ ਛੱਡ ਕਾਂਗਰਸ ਵਿਚ ਆਏ ਸਨ ਪਰ ਕਈ ਅਜਿਹੇ ਹਾਲਾਤ ਬਣ ਗਏ ਜਿਨ੍ਹਾਂ ਸਦਕਾ ਉਹ ਅਪਣੀ ਤਾਕਤ ਨੂੰ ਪੰਜਾਬ ਵਿਚ ਕੁੱਝ ਲੋੜੀਂਦੇ ਬਦਲਾਅ ਲਿਆਉਣ ਲਈ ਇਸਤੇਮਾਲ ਨਹੀਂ ਕਰ ਸਕੇ। ਨਵਜੋਤ ਸਿੱਧੂ ਹੁਣ ‘ਆਪ’ ਦੇ ਦਿੱਲੀ ਮਾਡਲ ਦੇ ਮੁਕਾਬਲੇ ਅਪਣਾ ‘ਪੰਜਾਬ ਮਾਡਲ’ (Punjab Model) ਪੇਸ਼ ਕਰਨਗੇ ਤੇ ਉਨ੍ਹਾਂ ਕੋਲ ਅਪਣੇ ਇਸ ਮਾਡਲ ਦੀ ਝਲਕ ਪੰਜਾਬ ਵਾਸੀਆਂ ਨੂੰ ਦਿਖਾਉਣ ਵਾਸਤੇ 6 ਮਹੀਨੇ ਦਾ ਸਮਾਂ ਬਾਕੀ ਹੈ।
2017 ਦੇ ਮੈਨੀਫ਼ੈਸਟੋ ਤੋਂ ਲੈ ਕੇ ਹੁਣ ਤਕ ਪੰਜਾਬੀਆਂ ਨਾਲ ਕਾਂਗਰਸ ਨੇ ਕਈ ਵਾਅਦੇ ਕੀਤੇ, ਕਈ ਸੁਪਨੇ ਵਿਖਾਏ ਪਰ ਅਫ਼ਸੋਸ ਕਿ ਕੋਈ ਵੀ ਵਾਅਦਾ ਪੂਰਾ ਨਹੀਂ ਕੀਤਾ। ਬਿਜਲੀ, ਬੇਰੁਜ਼ਗਾਰੀ, ਕਰਜ਼ਾ ਮਾਫ਼ੀ ਤਾਂ ਪੰਜਾਬ ਦੇ ਮਾਫ਼ੀਆ ਨਾਲ ਜੁੜੇ ਹੋਏ ਹਨ। ਜੋ ਪੈਸੇ ਮਾਫ਼ੀਆ ਲੁੱਟ ਕੇ ਲੈ ਜਾਂਦਾ ਹੈ, ਜੇ ਉਹ ਸਰਕਾਰ ਦੇ ਹੱਥ ਵਿਚ ਆ ਜਾਣ ਤਾਂ ਸਰਕਾਰ 300 ਤਾਂ ਕੀ, 500 ਯੂਨਿਟ ਮੁਫ਼ਤ ਬਿਜਲੀ ਵੀ ਦੇ ਸਕਦੀ ਹੈ। ਬਰਗਾੜੀ ਦਾ ਮੁੱਦਾ ਪੈਸੇ ਨਾਲ ਨਹੀਂ ਜੁੜਿਆ ਹੋਇਆ ਬਲਕਿ ਸੂਬੇ ਵਿਚ ਨਿਆਂ ਤੇ ਪਾਰਦਰਸ਼ਤਾ ਨਾਲ ਜੁੜਿਆ ਹੋਇਆ ਹੈ। ਭਾਵੇਂ ਬਰਗਾੜੀ ਦਾ ਮਾਮਲਾ ਭਾਵਨਾਵਾਂ ਨੂੰ ਠੇਸ ਪਹੁੰਚਣ ਦਾ ਮਾਮਲਾ ਹੈ ਪਰ ਅੱਜ ਦੇ ਨਵੇਂ ਸ਼ਕਤੀ ਕੇਂਦਰਾਂ ਤੋਂ ਸੱਭ ਪੱਖਾਂ ਤੇ ਕੰਮ ਕਰਨ ਦੀ ਉਮੀਦ ਕੀਤੀ ਜਾਵੇਗੀ ਹੀ।
ਇਥੇ ਸਵਾਲ ਇਹ ਉਠੇਗਾ ਕਿ ਵਾਅਦੇ ਜੇ ਚਾਰ ਸਾਲ ਵਿਚ ਨਹੀਂ ਪੂਰੇ ਹੋ ਸਕੇ ਤਾਂ ਹੁਣ ਕਿਵੇਂ ਪੂਰੇ ਹੋ ਜਾਣਗੇ? ਜਿਸ ਪੰਜਾਬ ਮਾਡਲ ਨੂੰ ਸਿੱਧੂ ਲਾਗੂ ਕਰਨਾ ਚਾਹੁੰਦੇ ਹਨ, ਉਸ ਨੂੰ ਅਮਲੀ ਜਾਮਾ ਦੇਣ ਲਈ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਤੇ ਪੰਜਾਬ ਦੇ ਕਾਂਗਰਸੀ ਮੁੱਖ ਮੰਤਰੀ ਆਪਸ ਵਿਚ ਇਕਜੁਟ ਹੋ ਕੇ ਕੰਮ ਕਰ ਸਕਣਗੇ? ਕੀ ਇਕ ਦੂਜੇ ਉਤੇ ਕੀਤੇ ਗਏ ਨਿਜੀ ਹਮਲਿਆਂ ਨੂੰ ਭੁਲਾ ਕੇ ਪੰਜਾਬ ਵਾਸਤੇ ਅਪਣੇ ਜੋਸ਼ ਤੇ ਹੋਸ਼ ਦਾ ਮੇਲ ਕਰ ਕੇ ਅਗਲੇ 6 ਮਹੀਨਿਆਂ ਵਿਚ ਲੋਕਾਂ ਨੂੰ ਵਿਖਾਏ ਗਏ ਸੁਪਨੇ ਪੂਰੇ ਕਰ ਸਕਣਗੇ ਜਾਂ ਅੰਦਰੂਨੀ ਲੜਾਈਆਂ ਪੰਜਾਬ ਵਿਚ ਕਾਂਗਰਸ ਨੂੰ ਖ਼ਤਮ ਕਰ ਜਾਣਗੀਆਂ? -ਨਿਮਰਤ ਕੌਰ