ਅਪਣੇ ਆਪ ਨੂੰ ਰੱਬ ਕਹਾਉਣ
ਵਾਲੇ ਬਾਬਿਆਂ ਵਿਚੋਂ ਇਕ ਵੱਡੇ ਅਪਰਾਧੀ ਰਾਮਪਾਲ ਵਿਰੁਧ ਆਇਆ ਫ਼ੈਸਲਾ ਹੈਰਾਨੀਜਨਕ ਹੈ,
ਭਾਵੇਂ ਕਿ ਇਨ੍ਹਾਂ ਦੋ ਇਲਜ਼ਾਮਾਂ ਤੋਂ ਬਰੀ ਹੋਣ ਦੇ ਬਾਵਜੂਦ ਵੀ ਰਾਮਪਾਲ ਜੇਲ 'ਚੋਂ ਬਾਹਰ
ਨਹੀਂ ਆਉਣ ਵਾਲਾ। ਰਾਮਪਾਲ ਨੇ ਅਦਾਲਤ ਵਿਚ ਸੱਦੇ ਜਾਣ ਦੇ ਬਾਵਜੂਦ ਅਪਣੇ 11 ਏਕੜ ਦੇ
ਡੇਰੇ ਵਿਚੋਂ ਬਾਹਰ ਆਉਣ ਤੋਂ ਇਨਕਾਰ ਕਰ ਦਿਤਾ ਸੀ। ਅਖ਼ੀਰ ਵਿਚ ਰਾਮਪਾਲ ਦੇ ਡੇਰੇ ਦੀ ਇਕ
ਹਥਿਆਰਬੰਦ ਖ਼ਤਰਨਾਕ ਟੋਲੀ ਅਤੇ 2000 ਪੁਲਿਸ ਮੁਲਾਜ਼ਮਾਂ ਵਿਚਕਾਰ ਇਕ ਛੋਟੀ ਜਿਹੀ ਜੰਗ ਛਿੜ
ਗਈ ਜਿਸ ਵਿਚ 28 ਪੁਲਿਸ ਅਫ਼ਸਰ ਜ਼ਖ਼ਮੀ ਹੋਏ ਤੇ 5 ਔਰਤਾਂ ਅਤੇ 18 ਮਹੀਨੇ ਦੀ ਇਕ ਬੱਚੀ ਦੀ
ਮੌਤ ਹੋ ਗਈ। ਗਵਾਹਾਂ ਦੀ ਕਮੀ ਕਾਰਨ, ਜਬਰਨ ਲੋਕਾਂ ਨੂੰ ਹਿਰਾਸਤ ਵਿਚ ਰੱਖਣ,
ਗ਼ੈਰਕਾਨੂੰਨੀ ਤੌਰ ਤੇ ਇਕੱਠ ਕਰਨ ਅਤੇ ਸਰਕਾਰੀ ਕੰਮ ਵਿਚ ਰੁਕਾਵਟ ਪਾਉਣ ਦੇ ਅਪਰਾਧ ਤੋਂ
ਰਾਮਪਾਲ ਨੂੰ ਬਰੀ ਕੀਤਾ ਗਿਆ ਹੈ। ਹੈਰਾਨੀ ਇਸ ਕਾਰਨ ਹੈ ਕਿਉਂਕਿ ਇਸ ਲੜਾਈ ਦਾ ਟੀ.ਵੀ.
ਚੈਨਲਾਂ ਵਲੋਂ ਸਿੱਧਾ ਪ੍ਰਸਾਰਣ ਚਲਦਾ ਰਿਹਾ ਹੈ। ਰਾਮਪਾਲ ਅਦਾਲਤ ਦੇ ਕਹਿਣ ਦੇ ਬਾਵਜੂਦ
ਪੇਸ਼ੀ ਤੇ ਨਾ ਆਇਆ ਅਤੇ ਉਸ ਨੂੰ ਕੈਦ ਵਿਚ ਲੈਣ ਵਾਸਤੇ 2000 ਪੁਲਿਸ ਅਫ਼ਸਰਾਂ ਨੂੰ ਜੰਗ
ਲੜਨੀ ਪਈ ਪਰ ਕਮਾਲ ਦੀ ਗੱਲ ਹੈ ਕਿ ਸਰਕਾਰੀ ਵਕੀਲ ਨੂੰ ਗਵਾਹ ਹੀ ਨਾ ਮਿਲੇ! ਹੁਣ ਜੇ ਰਾਮ
ਰਹੀਮ ਨੂੰ ਅਪਣੇ ਬਚਾਅ ਵਾਸਤੇ ਪੰਚਕੂਲਾ ਵਿਚ ਦਹਿਸ਼ਤਗਰਦੀ ਦੀ ਯੋਜਨਾ ਬਣਾਉਣ ਤੋਂ ਬਰੀ
ਕਰ ਦਿਤਾ ਜਾਵੇ ਤਾਂ ਕੀ ਉਹ ਨਿਆਂ ਹੋਵੇਗਾ? ਭਾਵੇਂ ਇਹ ਦੋਵੇਂ ਸ਼ਾਇਦ ਕਦੇ ਵੀ ਆਜ਼ਾਦੀ ਨਾ
ਪ੍ਰਾਪਤ ਕਰ ਸਕਣ, ਨਿਆਂ ਮੰਗਦਾ ਹੈ ਕਿ ਇਨ੍ਹਾਂ ਦੇ ਹਰ ਜੁਰਮ ਦੀ ਸਜ਼ਾ ਪੂਰੀ ਤਰ੍ਹਾਂ ਸਖ਼ਤ
ਹੋਣੀ ਚਾਹੀਦੀ ਹੈ ਤਾਕਿ ਬਾਕੀ ਲੋਕ ਸਮਝ ਜਾਣ ਕਿ ਭਾਰਤੀ ਨਿਆਂ ਹਰ ਇਕ ਵਾਸਤੇ ਬਰਾਬਰ
ਹੈ। -ਨਿਮਰਤ ਕੌਰ