Poem : ਉਹ ਹੱਸਦਾ ਨਹੀਂ...

ਉਸ ਦੇ ਸਿਰ ਉਧਾਰ ਹੈ, ਉਹ ਤਾਹੀਉਂ ਹੱਸਦਾ ਨਹੀਂ। 
            ਜਾਂ ਫਿਰ ਤੇਜ਼ ਬੁਖ਼ਾਰ ਹੈ, ਉਹ ਤਾਹੀਉਂਂ ਹੱਸਦਾ ਨਹੀਂ। 

ਉਸ ਦੇ ਸਿਰ ’ਤੇ ਭਾਰ ਹੈ, ਉਹ ਤਾਹੀਉਂ ਹੱਸਦਾ ਨਹੀਂ। 
            ਜਾਂ ਫਿਰ ਕਢਦਾ ਧਾਰ ਹੈ, ਉਹ ਤਾਹੀਉਂ ਹੱਸਦਾ ਨਹੀਂ। 

ਰਾਤੀਂ ਦਾਰੂ ਪੀ ਕੇ ਬਹੁਤਾ ਹੱਸਿਆ ਹੋਣਾ ਸ਼ਾਇਦ,
            ਹੋਇਆ ਦਿਨੇ ਬਿਮਾਰ ਹੈ, ਉਹ ਤਾਹੀਉਂ ਹੱਸਦਾ ਨਹੀਂ। 

ਜਿੱਤਣ ਵਾਲੇ ਅਕਸਰ ਤਾਅ ਦਿੰਦੇ ਨੇ ਮੁੱਛਾਂ ਨੂੰ,
            ਉਸ ਨੂੰ ਦਿਸਦੀ ਹਾਰ ਹੈ, ਉਹ ਤਾਹੀਉਂ ਹੱਸਦਾ ਨਹੀਂ। 

ਹਾਰੇ ਹੋਏ ਵਜ਼ੀਰ ਦੇ ਅਜੇ ਵੀ ਜ਼ਿਹਨ ’ਚ ਘੁੰਮ ਰਹੀ, 
            ਝੰਡੀ ਵਾਲੀ ਕਾਰ ਹੈ, ਉਹ ਤਾਹੀਉਂ ਹੱਸਦਾ ਨਹੀਂ। 

ਕਿਸੇ ਦੀ ਪੱਤ ਰੋਲਣ ਦੀ, ਸੋਚ ਰਿਹਾ ਹੋਣਾ ਸ਼ਾਇਦ,
            ਪੀਲਾ ਪੱਤਰਕਾਰ ਹੈ, ਉਹ ਤਾਹੀਉਂ ਹੱਸਦਾ ਨਹੀਂ।

‘ਪੱਤੋ’ ਵਰਗੇ ਦੀਵਾਨੇ ਹੀ, ਇੱਥੇ ਹੱਸਦੇ ਨੇ ਯਾਰੋ,
            ਦੁਖੀਆ ਸਭ ਸੰਸਾਰ ਹੈ, ਉਹ ਤਾਹੀਉਂ ਹੱਸਦਾ ਨਹੀਂ।
- ਪ੍ਰਸ਼ੋਤਮ ਪੱਤੋ, ਮੋਬਾਈਲ : 98550-38775