ਆ ਵੇ ਕਾਵਾਂ, ਜਾਹ ਵੇ ਕਾਵਾਂ,
ਬਹਿ ਤਲੀ 'ਤੇ, ਚੋਗ ਚੁਗਾਵਾਂ।
ਸੁਨੇਹਾ ਲੈ ਮਾਹੀਏ ਦਾ ਆਵੀਂ,
ਦਿਲ ਦੀ ਤੈਨੂੰ ਗੱਲ ਸੁਣਾਵਾਂ।
ਆ ਵੇ ਕਾਵਾਂ.....
ਤੋਤੇ, ਚਿੜੀਆਂ ਸੱਭ ਭੇਜੇ ਮੈਂ,
ਮੋਰ ਵੀ ਗਿਆ ਪਾ ਪੈਲਾਂ।
ਵਿਚ ਵਿਛੋੜੇ ਇੰਝ ਤੜਫਾਂ ਮੈਂ,
ਜਿਉਂ ਹੀਰ, ਸੱਸੀ ਤੇ ਲੈਲਾ।
ਦਰਦ ਜੁਦਾਈ ਦਾ ਅੜਿਆ,
ਦਸ ਮੈਂ ਕੀਹਨੂੰ ਵਿਖਾਵਾਂ।
ਆ ਵੇ ਕਾਵਾਂ.....
ਅਖੀਆਂ ਬੂਹੇ ਵਲ ਨੇ ਟਿਕੀਆਂ,
ਰਾਹ ਤੱਕਣ ਨਿਤ ਉਸ ਦਾ।
ਐਡੀ ਤਾਂ ਕੋਈ ਗੱਲ ਵੀ ਨਾਹੀਂ,
ਜਿੰਨਾ ਮਾਹੀਆ ਰੁਸਦਾ।
ਖ਼ੁਸ਼ੀਆਂ ਟਲ ਕੇ ਪਾਸੇ ਹੋਈਆਂ,
ਗੀਤ ਗ਼ਮਾਂ ਦੇ ਗਾਵਾਂ।
ਆ ਵੇ ਕਾਵਾਂ......
ਪਾਕ ਮੁਹੱਬਤਾਂ ਦੇ ਲੜ ਲੱਗ ਕੇ,
ਦਗਾ ਨਾ ਕਦੇ ਕਮਾਈਏ।
ਇਕ ਦੂਜੇ ਤੋਂ ਵਾਰ ਕੇ ਆਕੜ,
ਚੁੱਲ੍ਹੇ ਵਿਚ ਜਲਾਈਏ।
ਜੇ ਤੁਰੀਏ ਤਾਂ ਧੁਰ ਪਹੁੰਚੀਏ,
ਭਾਵੇਂ ਔਖੀਆਂ ਨੇ ਇਹ ਰਾਹਵਾਂ।
ਆ ਵੇ ਕਾਵਾਂ......
ਦਿਲ ਦੇ ਵਿਹੜੇ ਖ਼ੈਰ ਪੈ ਜਾਵੇ,
ਬੇੜੀ ਹੋ ਜਾਏ ਪਾਰ ਮੇਰੀ।
ਦੇਵਾਂ ਦੁਆਵਾਂ ਰੱਜ-ਰੱਜ ਤੈਨੂੰ,
ਸਫਲੀ ਹੋ ਜਾਏ ਕਾਰ ਤੇਰੀ।
ਕਮੀ ਕੋਈ ਨਾ ਛਡਾਂ ਤੈਨੂੰ,
ਵਿਚ ਸੋਨੇ ਚੁੰਝ ਮੜ੍ਹਾਵਾਂ।
ਆ ਵੇ ਕਾਵਾਂ, ਜਾਹ ਵੇ ਕਾਵਾਂ,
ਬਹਿ ਤਲੀ 'ਤੇ, ਚੋਗ ਚੁਗਾਵਾਂ।
-ਮਨਜੀਤ ਕੌਰ ਧੀਮਾਨ, ਸ਼ੇਰਪੁਰ, ਲੁਧਿਆਣਾ।
9464633059