ਕਾਵਿ ਵਿਅੰਗ: ਜਿਊਂਦੀਆਂ ਅਣਖਾਂ

ਬੜੇ ਬਣਦੇ ਪੰਜਾਬੀ ਦੇ ਘੜੰਮ ਚੌਧਰੀ,
    ਬੱਚੇ ਅਪਣੇ ਅੰਗਰੇਜ਼ੀ ਸਕੂਲਾਂ ਵਿਚ ਲਾਏ ਨੇ।
ਆਉਣ ਵਾਲੀਆਂ ਪੀੜ੍ਹੀਆਂ ਲਈ ਹੱਕਾਂ ਦੀ ਗੱਲ ਕਰਦੇ,
    ਅਪਣੀ ਪੀੜ੍ਹੀ ਦੇ ਜੀਅ ਹੀ ਗ਼ੁਲਾਮ ਬਣਾਏ ਨੇ।
ਕਈ ਧਰਮਾਂ ਦੇ ਨਾਮ ਉੱਤੇ ਰਾਜਨੀਤੀ ਕਰਦੇ,
    ਮੋਨੇ ਸਵਾਰਥ ਲਈ ਸਿਰਾਂ ਉਤੇ ਪੱਗਾਂ ਧਰਦੇ।
ਜਿਨ੍ਹਾਂ ਦੇ ਕਿਰਦਾਰ ਵਿਗੜੇ ਹੋਏ ਚਿਰਾਂ ਦੇ,
    ਵੱਡੇ ਪ੍ਰੈੱਸ ਦੀ ਆਜ਼ਾਦੀ ਦੀ ਉਹ ਗੱਲ ਕਰਦੇ।
ਜਿੱਤੇ ਹੋਏ ਉਮੀਦਵਾਰ ਡੱਕੇ ਨੇ ਜੇਲਾਂ ਵਿਚ,
    ਸਰਕਾਰਾਂ ਹਾਰਿਆਂ ਨੂੰ ਮੰਤਰੀ ਬਣਾ ਦਿੰਦੀਆਂ।
ਜਿੰਦਰ ਹੋਰਾਂ ਦੀ ਚੁੱਪ ਨੂੰ ਕਾਇਰਤਾ ਨਾ ਸਮਝੀ,
    ਜਿਊਂਦੀਆਂ ਅਣਖਾਂ ਭੁੱਲ ਪਦਵੀ ਚਪੇੜੇ ਲਾ ਦਿੰਦੀਆਂ।
- ਜਿੰਦਰ ਮਾਵੀ ਕੋਟ ਸ਼ਮੀਰ, ਮੋਬਾ : 95927-36981