ਸਿੱਖਾਂ ਦੇ ਬਕਰੇ ਝਟਕਾਉਣ ਜਾਂ ਭੰਗ ਵੇਚਣ ਦੇ ਵੀਡੀਉ ਕਰਦੇ ਹਨ ਸ਼ਰਮਸਾਰ : ਖ਼ਾਲਸਾ
ਜਦੋਂ ਜਮੀਰ ਮਰ ਜਾਂਦੀ ਹੈ ਤਾਂ ਸਰੀਰ ਇਕ ਪੁਤਲੇ ਸਮਾਨ ਅਰਥਾਤ ਨਿਰਜੀਵ ਵਿਅਕਤੀ ਦਿਖਾਈ ਦਿੰਦਾ ਹੈ..............
ਕੋਟਕਪੂਰਾ : ਜਦੋਂ ਜਮੀਰ ਮਰ ਜਾਂਦੀ ਹੈ ਤਾਂ ਸਰੀਰ ਇਕ ਪੁਤਲੇ ਸਮਾਨ ਅਰਥਾਤ ਨਿਰਜੀਵ ਵਿਅਕਤੀ ਦਿਖਾਈ ਦਿੰਦਾ ਹੈ। ਉਘੇ ਪ੍ਰਚਾਰਕ ਪਰਮਜੀਤ ਸਿੰਘ ਖ਼ਾਲਸਾ ਨੇ ਸਥਾਨਕ ਫ਼ੇਰੂਮਾਨ ਚੌਕ 'ਚ ਸਥਿਤ ਗੁਰਦਵਾਰਾ ਗੁਰੂ ਨਾਨਕ ਸਤਿਸੰਗ ਸਭਾ ਵਿਖੇ ਕਰਵਾਏ ਧਾਰਮਕ ਸਮਾਗਮ ਦੌਰਾਨ ਉਕਤ ਸ਼ਬਦਾਂ ਦਾ ਪ੍ਰਗਟਾਵਾ ਕਰਦਿਆਂ ਆਖਿਆ ਕਿ ਸਾਡੇ ਅਣਖੀਲੇ ਨੌਜਵਾਨਾਂ ਦੀ ਅਣਖ਼, ਗ਼ੈਰਤ ਅਤੇ ਜਮੀਰ ਮਾਰਨ ਲਈ ਪਹਿਲਾਂ ਹੀ ਨਸ਼ਿਆਂ ਦੀ ਬਹੁਤਾਤ ਹੈ, ਸੰਪੂਰਨ ਬਾਣੇ 'ਚ ਕਈ ਵਿਅਕਤੀ ਸ਼ਰੇਆਮ ਭੰਗ ਪੀ ਅਤੇ ਵੇਚ ਰਹੇ ਹਨ ਪਰ ਹੁਣ ਪੰਜਾਬ 'ਚ ਖਸਖਸ ਦੀ ਖੇਤੀ ਕਰਨ ਦੀ ਛੋਟ ਮੰਗਣ ਦੀਆਂ ਗੱਲਾਂ ਹੋਣ ਲੱਗ ਪਈਆਂ ਹਨ।
ਇਕ ਪਾਸੇ ਦੁਨੀਆਂ ਦੇ ਕੋਨੇ ਕੋਨੇ 'ਚ ਦਰਸ਼ਨੀ ਸਿੱਖਾਂ ਦੇ ਕਾਰਨਾਮਿਆਂ ਦੀਆਂ ਧੂਮਾਂ ਪੈਂਦੀਆਂ ਰਹੀਆਂ ਹਨ ਪਰ ਦੂਜੇ ਪਾਸੇ ਦੁਮਾਲਾ ਸਜਾ ਕੇ ਸੰਪੂਰਨ ਬਾਣੇ 'ਚ ਕਈ ਵਿਅਕਤੀਆਂ ਵਲੋਂ ਬਕਰਿਆਂ ਨੂੰ ਝਟਕਾਉਣ ਅਤੇ ਭੰਗ ਜਾਂ ਸੁੱਖਾ ਵੇਚਣ ਵਾਲੇ ਵੀਡੀਉ ਸੋਸ਼ਲ ਮੀਡੀਏ ਰਾਹੀਂ ਸਾਨੂੰ ਸ਼ਰਮਸਾਰ ਕਰਨ ਦਾ ਸਬੱਬ ਬਣ ਰਹੇ ਹਨ।
ਉਨ੍ਹਾਂ ਬਿਨਾਂ ਕਿਸੇ ਦਾ ਨਾਮ ਲਿਆ ਆਖਿਆ ਕਿ ਪਿੰਜਰੇ 'ਚ ਬੰਦ ਤੋਤਿਆਂ ਨੇ ਅਪਣੇ ਹਾਕਮਾਂ ਦੀ ਬੋਲੀ ਬੋਲਣੀ ਹੁੰਦੀ ਹੈ
ਪਰ ਗੁਰੂ ਨਾਨਕ ਦੇਵ ਜੀ ਅਸਮਾਨ 'ਚ ਉਡਣ ਵਾਲੇ ਉਸ ਤੋਤੇ ਦੀ ਤਰ੍ਹਾਂ ਆਜ਼ਾਦ ਸਨ, ਜਿਨ੍ਹਾਂ ਤਰਕ, ਬਿਬੇਕ ਅਤੇ ਦਲੀਲ ਨਾਲ ਹਰ ਇਕ ਨੂੰ ਸੰਤੁਸ਼ਟ ਅਤੇ ਕਾਇਲ ਕੀਤਾ। ਪਰਮਜੀਤ ਸਿੰਘ ਖ਼ਾਲਸਾ ਨੇ ਅਨੇਕਾਂ ਦਲੀਲਾਂ ਦਿੰਦਿਆਂ ਦਾਅਵਾ ਕੀਤਾ ਕਿ ਨਸ਼ਈ ਸਿੱਖਾਂ ਲਈ ਗੁਰੂ ਦੀ ਬੇਅਦਬੀ ਕੋਈ ਮਹੱਤਤਾ ਨਹੀਂ ਰੱਖਦੀ ਜਿਸ ਕਰਕੇ ਦੁਸ਼ਮਣ ਤਾਕਤਾਂ ਸਾਡੇ 'ਤੇ ਭਾਰੂ ਹੁੰਦੀਆਂ ਜਾ ਰਹੀਆਂ ਹਨ।